[劇毒]自從裝左小熊來電之後……我部電話就無響過……: 8

[1/3/2015 13:44] 

「你係Major tom？咁你可以解釋下發生咩事啊？」一聽到負傷男話佢自己係Major Tom，我第一個反應係質疑。

但係負傷男好堅定咁答左句：「係。但係我知既比你地唔會多得去邊……」

「唉……」聽到佢既答覆，我既第一個反應係失望，應該話比起在場既咁多位我係最失望果位。

佢同我所預期既太唔同，我想像中既Major Tom絕對唔會係咁樣比人斬到一身血咁出場，而且佢點都會解答到我地一啲既問題，可惜佢唔係……
我一直抱有期望，企左喺地鐵站到等，逃過果班西裝佬既追殺，都係想變番做正常人姐，點解最後得個吉？





衣一種失落既氣氛圍繞住我地十個人，本來仲照顧緊Major Tom既運動姐姐都停左手坐番低。

一直都唔係點出聲既龍友問左一條問題：「咁你話我知點解你會搵到我？」

「啊……其實我係個電腦黑客……我用電腦Program……搵出所有6,9,5字頭既電話號碼組合……再向佢地發出短訊同whatsapp……再人肉插尋下……有無人有一樣既狀況……」仲未復原既Major Tom上氣不接下氣咁為我地解釋左一輪。

本來氣喘緊既大隻佬終於透順條氣問：「咁點解你會比果班西裝佬追殺。」
Major Tom都未答，四眼警察追問：「同埋果班西裝佬係咩人？佢地係咪唔死……」





Major Tom嘆左口氣：「唉……我唔知佢地係咩人……但係我相信佢地既目標就係我地……或者佢地今日就係搵到我電話既signal……所以先會追殺我……」

危機意識強既啊樺好快就提出左疑問：「下！咁我地……」

Major Tom揮揮手話：「啊……我已經將電話拋走左……」

啊樺得出左一個結論：「佢地到衣加都無搵上門則係表示佢地暫時都只係追跡左你既signal？」

Major Tom：「應該係……但係我估……佢地好快會搵到我地其他人既手機signal……」





啊樺：「大家拎你地部手機出嚟，我地將佢地收埋喺到應該可以拖一陣時間。」

龍友即刻反馭：「唔洗，我地可以用錫紙包實部電話，咁佢地就追跡唔到我地！」

「真既？但係去邊到搵錫紙啊？」啊樺問。

「我有……」運動姐姐就好似多啦A夢咁喺佢個背囊變左一卷錫紙比我地，而我地好好奇咁望實佢同佢個百寶袋。
當佢抬頭將卷錫紙交比我地果陣，佢發現大部份人既視線都投放上佢身上，佢即刻解話：「其實我今朝本身係約左班friend去行山，點知一夠鐘既時侯打比佢地又唔聽，而且係囉……無人見到我咁……」

本來喺書局入面巡邏緊既四眼警察走過嚟接過錫紙，講述自己情況：「嗯……我都係咁，今朝行番警局果陣個個都見我唔到，所以我知出事。」

挨住喺書架既大隻佬接過錫紙：「我就做搬運既，點知今日六點幾果陣，啲兄弟無理我就開左車去開工，打比佢地又唔聽，咪睇下個Major tom知唔知咩事。」

大隻佬將錫紙交左比坐喺堆書上面既援交妹：「咁本身今朝約左人「出街」嘛……」當援交妹講到「出街」兩個字既時侯，成班男人都暗暗點點頭就好似明白左某啲意思咁。





同援交妹一齊坐喺書架上面既MK仔緊接住答：「無啊……本來同條女喺MK睇九點既，點知去到地鐵站又入唔到閘，啲啊姐又唔穌我，咁咪知大檸樂囉。到你啦OL姐姐。」

MK仔拎住成卷錫紙拍拍港女OL既膊頭，佢即刻放低愛情小說加入我地既話題：「我今朝本來要去商場到睇住個SHOW既，但係，係囉，地鐵站果位就知出事。」

見港女OL包完部手機，龍友馬上狗衝過嚟拎卷錫紙答：「我……去影相囉，哈，哈……跟住出事囉……」望住龍友講到咁尷尬，或者大家都估到離不開私影果啲。

我接過錫紙挨左喺欄杆好順勢咁講：「其實我覺得應該琴晚一過十二點之後就開始出事，不過起初我都唔肯定，直到今朝我先開始接受發生咩事。」

企我隔離既啊樺：「我今日係約左人做Project，不過無人理我咁。我估大家都係因為裝左果個Apps？」

「係！」每位都好肯定咁點頭。

「嗯……我覺得……」當我正想延續個討論氣氛既時侯Major Tom打斷左我。

Major Tom話：「大家唔好再講……包完部電話就好走，我怕佢地搵到我地……」





「得！轉場！衣到我地頭，跟我嚟！」MK仔成個大佬咁即刻企左起身。當然個個見佢咁有主見都無反對既，只係我感到有種反感……

「等等……聽埋我講……要小心……因為班西裝佬可以係街上面任何一個人變……」仲企緊起身既Major Tom提左我地一句。

直到我地落樓，我見到街上面愈嚟愈多人，心入面就更加不安……
任何一個都可以係西裝佬……