[劇毒]自從裝左小熊來電之後……我部電話就無響過……: 10

[1/3/2015 15:43] 

「唔得……佢地喺到，走啊！」MK仔驚驚青青咁掉頭走。

MK仔一講到「佢地」兩隻字，大家都已經意會到係指西裝佬。
本來仲抱有期望既我地，又再次陷入驚慌，頭也不回咁跟住MK仔一齊逃走。
跑左陣大約去到新寶戲院果個位，一直喺最後既大隻佬無啦啦跑快左，仲過晒我地頭。
成班人更係嚇一嚇，再跑快啲，斷估都應該係西裝佬就追近我地。
點知大隻佬竟然一手捉實MK仔個膊頭，撳停左MK仔。





MK仔嚇到即刻踎低雙手擺頭，合埋對眼大叫：「大佬啊！唔好殺我啊！我今年先廿二，唔想咁早死！」

大隻佬既舉動，令我好好奇究竟後面發生左咩事。
我擰轉頭望望先發現根本後無追兵。
四眼警察對我笑左笑，彷彿話緊比我知，我地真係好戇居，跟住個MK仔跑左差唔到成條街，點知係咩事都無。

大隻佬一手拉起不停尖叫求饒MK仔入新寶戲院，拍一拍佢膊頭話：「喂！我啊！」

「下？」MK仔衣加先肯打開眼，望清楚咩事。





大隻佬好聲好氣咁同MK仔講：「啊dee dee，你咁樣亂咁走法無用架，你睇下後面，一個追兵都無。」

MK仔伸一伸頭望出條街到，當然係咩都無啦，佢即時尷尬到咩都講唔出口……

大隻佬繼續教訓MK仔：「仲有啊，你每次帶路走，都話下我地知你想去邊先得架。」

MK仔企左喺個廣告牌附近粒聲都唔出，睇嚟佢都似係無面到唔敢再出聲。
而我地九條友就棟曬喺到望住佢，等佢有無咩決策。
喺手機唔用得既情況況，大家都無所事事，四眼警察就同大隻佬喺門口監視周圍既環境，龍友見咁無聊就拎起部相機睇下。





「咦！」企左喺港女OL隔離既龍友無啦啦大叫左聲。

或許港女OL見慣大場面，佢只係「摺」左聲就話：「咩事啊你，無啦啦大叫。」

「唔係啊，你地睇下。」龍友遞左部相機出嚟比大家睇下個screen，咁好自然地大家都圍住左龍友，唯獨大隻佬一個仲企喺戲院門口幫我地睇水。

援交妹第一個反應就係：「屌，咪又係個閘門。」
雖然援交妹一向無腦，但係我睇多幾睇，都係第一次咁同意佢講既野，只係一張普通地鐵閘門既相，雖然影既角度有小小怪。

睇多幾睇大家都覺得無野想散水果陣，龍友出聲開估：「唔係啊，張相我係喺啊大隻哥哥救緊Major Tom出閘果陣影架，但係大隻哥哥同Major Tom都無出現到喺張相入面。」

聽到佢咁講我好簡單咁問左句：「係咪架……」

啊樺反駁我話：「都無話唔合理既……」





龍友即刻拎起佢部單反撳一撳個快門，影低左大隻佬既背影再show比我地睇。
果然，張相入面就只有街外面既景色，係唯獨唔見有大隻佬既背影。

龍友舉舉佢部單反同我地講：「所以我有個諗法！」

啊樺好似估到佢講咩：「你係指我地可以用相機去睇出街上面邊個係西裝友！」

龍友啪一啪手指話：「Bingo。」

Major Tom問左個好致命既問題：「但係你想點證明個方法係work？」

龍友既視線馬上由相機轉到MK仔身上問：「你岩岩見到酒店門口有幾多個西裝佬？」

MK仔舉起左一隻手指：「一個。」





龍友再啪一啪手指，一副計画通り既樣話：「啊大隻哥哥，你過一過嚟先，好嘛？」
大隻佬擰一擰頭指住自己，個頭上面好似多左幾個問號咁。
龍友點點頭，揮手叫佢過嚟，大隻佬比左個OK既手勢，再叫左四眼警察過去代佢站崗。

龍友將條相機帶由勁到除左落嚟將成部相機交左比大隻佬話：「一陣啊大隻哥哥你拎住我部相機去酒店門口影張西裝佬既相，再番嚟，得唔得？」

大隻佬望一望龍友個樣奸到不行，佢就知道伏已中，毒撚真係唔得罪得！
不過龍友出到聲表明一定係自己，今次佢真係騎虎難下。

MK仔見大隻佬無咩反應，於是加把口：「係囉！你岩岩跑得咁快，又咁大隻實無事既，最多搵多個人陪你咪得囉！」

大隻佬嘴郁郁，但係我都知佢一定喺心入面講左好多聲屌。
望住大隻佬，我開始明白咩叫四面樹敵……

大隻佬諗左諗指指站緊崗既四眼警察話：「好啦……叫啊四眼哥哥陪我啦。」





港女OL即刻擺出個八婆樣話：「唔得，佢走左邊個保護我地啊！」

大隻佬再望兩望我地，佢「唉」左聲就指左我出嚟。


頂！我都知係我架啦，點解我唔係女人啊！


「好啦……」當我正想企起身同大隻佬出發果陣，啊樺叫停左我地：「等等先，如果你地出左事，我地去邊到等？」

一直默不出聲既運動姐姐比左個提議：「Starbucks，沿住洗衣街向亞皆老街方向行，會有間樓上既Starbucks，果度等啦！」

在場見無人反對，我同大隻佬就準備起行。
大隻佬同四眼警察交代完咩事之後，四眼警察就拍拍我地兩個膊頭講左句「加油。」




當然啦，龍友同MK仔緊係偷笑緊。
除左OL姐姐，其他三個女仔同Major Tom都比左個大拇指我地。
我苦苦笑笑就開始步出間新寶戲院再一次面對番條凶險既街道……