[1/3/2015 16:21] 

大隻佬望住我尷尷尬尬咁話:「Um……對唔住啊……拉左你落水。」

我好假咁笑左笑,應左佢一句「唔緊要。」跟住就粒聲都唔出。

老實講,大隻佬咁做,比著你都嬲到仆街啦。
點解係都要拖我落水,你要死就死遠啲,唔好累街坊啊!
你話叫我陪你去買野,我都仲OK啊,但係衣加咁樣同送羊入虎口有咩分別?
就算我唔係女人,你仲可以搵龍友或者MK仔同你一齊死,係都要搵我?





我嬲爆爆咁跟住大隻佬行,又唔敢得失佢,廢時一陣真係奶野無人睇住我,唯有唔出聲。

當然大隻佬唔係傻既,佢行行下都唔想再見我咁落去,所以尷尷尬尬開口講:「真係唔好意思啊……你知女仔又唔揀得,果兩個……人又唔揀得……」

一聽到佢講野,我即刻大爆發:「頂,果兩個正一柒頭皮嚟既,又無啲'吉士",淨係推過波出嚟。」

大隻佬苦笑下話:「所以真係唔好意思,係你感覺NICE啲,唯有揀你。」

聽到佢咁讚我,就算我明知係客套說話,都笑左笑暗爽一下。




加上我又將心中既不快吐左出嚟,個心都開始無咩野。

「唉」我嘆左啖氣,扮晒嬲咁同佢講:「你啊……下次唔好再累街坊啊。」

「明白明白!」大隻佬Sa晒Lum咁同我再say多次Sorry。

「等等!」大隻佬比左個手勢叫我開始要警戒,佢壓低聲線同我講:「你喺個電錶箱隔離等我,我出事你就走先。」

我比左個OK既手勢大隻佬向前行。





每當大隻佬向前行一步,我就feel到一個心「噗!」一下咁跳。

無事既……小心啲就得……

「噗!」大隻佬又再行前多步,隱約間我見到佢頭頂上多左幾滴汗。

「噗!」今次到我開始流汗……

「噗!」大隻佬終於行到去酒店既角落,佢拎起左部單反對準西裝友,衣個時侯我都準備好向後跑。

「喳!」一下快門聲,我望一望佢,咩異樣都無……

「呼……」大隻佬收起部相機向我行埋嚟,比左個大拇指。忽然之間,我見到有個西裝佬由白布街轉左入黑布街……

「頂!入去啊!」我即刻捉住大隻佬走左入酒店隔離既一條暗巷。





「咩事啊?」大隻佬細細聲咁問。

「佢地嚟緊啊,快啲踎低!」我無解釋太多,喺架裝滿垃圾既推車仔後面踎低。

「踏!踏!踏!」西裝佬既腳步聲愈嚟愈近……


無事既……


「踏!踏!踏!」我閉上雙眼但求佢見我唔到……

唔會發現到我既……





「踏!踏!踏!」我個心跳得愈嚟愈快……

點解時間過得咁快既……

「踏!踏!踏!」我隻腳踎得愈嚟愈低……

快啲走啦……

「踏!踏!踏!」我背脊愈貼愈實近牆邊……

FUCK!唔好有事啊!

「踏!踏!……」腳步聲終於停低左……

唔係發現左啊……





「喂,佢走左啦……」大隻佬拍拍我膊頭就企左起身,佢一支公咁走左出巷仔到睇水。

當佢回頭比左個OK既手勢我,但係我隻腳仲痺緊,我指指我隻腳,佢擰擰頭就走過嚟扶我起身。

「行唔行到啊?」大隻佬笑左笑問我,我勉強比左個OK既手勢佢就急急腳行番去戲院。

我同大隻佬喺人群之間盡量融入正常人,希望唔好再比任何人發現我地。
大隻佬比左佢既成果我睇,果然同龍友既預測一樣,西裝友無出現喺張相入面,相就只係得番班職員同強國人。
我細想一下個結果既意思,即係意味住西裝友都係我地既同類?
但係點解又要追殺我地?
諗諗下,我地都行到番去新寶到。

大隻佬一番到去就嬲爆爆咁指住龍友講:「你岩啊!」





「Yeah!Bingo!」龍友興奮到啪一啪手指,點知就係衣一下,成間戲院停電……
等等,正確啲嚟講係成街都停左電……