[劇毒]自從裝左小熊來電之後……我部電話就無響過……: 13

[1/3/2015 17:57] 

一行入波鞋街，即使個天開始入黑，都依然見到街上面有為數唔小既強國人拖住個行李喼喺到行嚟行去。
睇嚟除左班神出鬼沒既西裝佬，都要小心下班強國人先得。
我同啊樺企左喺街口，望住林林總總既波鞋鋪，如果你問我難唔難揀？
我會同你講一啲都唔難，因為咁多間鋪頭，賣既都幾果幾個大牌子。
Adidas，Nike，con屎，離不開都係果啲牌子。
有左心水，求其入一間搵都得。

不過，我自己無咩所謂，所以我問啊樺：「你想去邊間？」




啊樺聳肩答道：「搵間近啲，小人啲既，會安全啲。」
聽到啊樺既答案，我嘆左道氣，借問聲波鞋街啲鋪頭，有邊間係會小人啊。
我求其比左個ok既手勢就帶住啊樺行入波鞋街，最後我地走左入間轉角位既Nike專門店。
出奇地既係入面真係唔多人，我同啊樺各有各睇。

我揀左件上黑下紅既Nike Windrunner風褸，再加多個全黑既Nike Ultimatum Gear背囊，咁好自然地我下意識就當然係比錢。
「唔……」但係到我拎銀包出嚟果刻，我先醒起，我係透明既，於是我行到去個門口前面，慾行又止……


點呢？




唔通就咁走出去？


啊樺見到我拎住件褸同呆左咁企喺收銀前，就走過嚟問我：「仲唔走？」

「下？但係咁個防盜器咪會響？」我反問。

啊樺笑一笑就拍多兩拍我膊頭話：「唔知啊……所以呢，就靠你啦！」
啊樺一掌將我送左出門口，但係個防盜器無響，啊樺舉起個大拇指就同我一齊走出間鋪頭向旺角電腦中心進發。






我問啊樺：「你又知個防盜器唔會響？」

啊樺又再發揮佢既神推理：「我都係估下架喳。
你諗下，若然龍友部相機影唔唔到我地，則係表示佢部相機同我地唔係同一個世界。
但係龍友又成日拎住部相機周街影，照道理，啲人應該只會見到部相機飛嚟飛去。
但係啲人都無理過部相機。
即係話部相機由龍友接觸果一下就變左透明。
如果係咁，我地既衫都應該都係一樣道理姐。」

「咁個閘門機都係一樣道理？因為我地既八達通已經變左透明，所以個閘門機感應唔到，都開唔到閘？」

「我覺得就係咁。」

雖然啊樺既解釋好似幾有道理，但係我始終有樣野解唔明，我話：「咁啲人呢？點解我地撞到佢地都若無其事咁？佢地又無消失到，又見我地唔到。」





啊樺比我個問題考起左：「Er……或者我講既野只係應用喺某啲死物？」


睇嚟啊樺未完善到佢既解答……


問問下我同啊樺都到左旺角電腦中心，我同佢都仲算早到。
啊樺：「我地去條巷仔等，衣到太多人出入，我地又無相機，唔知邊個係西裝友扮。」
我點點頭就跟左啊啊樺入後巷……