[2/3/2015 10:13] 

當M記依然一片紛暗之時,坐左喺我則邊既啊樺無啦啦大叫:「啊!」

大隻佬摸黑咁衝入嚟問:「咩事!咩事!」

我依稀見到啊樺佢用手撳實隻腳話:「我隻腳比啲油淥到,好痛啊!」

「喳!」一聲,白光湧現,眼前先係一片空白,跟住一切回復正常。
M記在座既員工,顧客,全部都出現番,電力都回復正常,一切就同停電之前一樣,好平靜,更加無咩西裝佬出現。




唯一既改變係啊樺,佢坐左喺地下撳實自己隻腳,望住我地,更加正確啲講係大隻佬。

大隻佬見到啊樺咁面上百感交集,雖然好嬲啊樺既無情,但係見到佢受傷又為佢感到同情。
大隻佬猶豫左陣「唉」左聲,放低之前既憤怒,走近啊樺尷尷尬尬咁問:「你起唔起到身啊,比我睇下。」

啊樺拍開大隻佬果隻友誼之手,自己擰轉身背對大隻佬。

大隻佬再「唉」多聲,低聲下氣咁問:「啊樺妹妹,你行唔行到啊?」啊樺無出聲,只係擰擰頭。

大隻佬見到啊樺咁就轉過頭同我講:「喂,你老友佢咁,點做啊?你搞搞佢啦。」





我對住大隻佬苦苦咁笑左笑就走近啊樺踎低問佢:「你……點啊?」

啊樺偷偷望左眼大隻佬,再喺我耳邊話:「我隻腳其實無事,但係我希望今日我地三個留喺到先。」

我「下」左聲,啊樺捉實我隻手話:「總之信我,你同佢講話我行唔到要留喺到休息夜。」

「唉!」我雙手拍拍大腿,再企番起身對住大隻佬擰擰頭話:「佢應該行唔到,我地唔可以咁快同其他人會合住。」

大隻佬一聽拍拍額頭,擺出陶大宇既招牌動作話:「啊!唉……好啦……但係出面既西裝佬點啊。」





啊樺一聽到就即刻拉低我,交左龍友既手機比我話:「你同佢求其搵個巴士站,再拆左錫紙,將部手機掉上部巴士到。」

聽到啊樺既Plan,我忍唔住拍左下手掌,比左個大拇指佢。
的確係好方法,利用訊號引走班西裝佬。

我企左喺身show一show龍友既手機話:「佢叫我地搵個巴士站,將部手機拆左錫紙,再掉上架巴士到。」

大隻佬聽到同我作出一樣既反應,但係佢再望望啊樺:「咁我地掉低佢一個?」

啊樺又再拉低我,係我耳邊話:「同佢講ok。」

雖然啊樺係咁講,但係我諗諗大隻佬講既野,再問啊樺:「咁你點算?」

啊樺帶點燥燥地既語氣:「頂!你唔記得左我隻腳無事嫁咩!如果我出左事,你去家樂坊間Starbucks搵我,但係記住要掉低個大隻仔。總之你同佢講話如果咁唔好彩就當係我既贖罪。仲有啊你自己都要小心啲。」





聽到啊樺咁講,我開始明白佢想做咩。
係一個TEST,如果大隻仔真係西裝佬果邊既,依個絕對係好機會。
無論係我定啊樺,大家都得番一丁友,絕對係個一石二鳥既機會。

但係我忍唔住駁佢:「但係佢救過我地。」

啊樺:「唉,你自己諗下,依加咪就係個落手好機會?」

的而且確,啊樺咁講又岩,佢救我地只係為左可以更肯定咁喺我地背後對我地一刀,甚至其他人唔係走左,而係比西裝佬捉左……
我望住大隻佬,心入面開始對佢有點質疑。

我決定企番起身同大隻佬講:「佢話唔緊要,真係咁唔好彩就當係佢對啊奇既贖罪。」

大隻佬望望啊樺,又諗左諗龍友點死,佢再唉多聲望住啊樺話:「我唔係唔想救你,你咁講,好,我地走。」





大隻佬拎起相機,再拋左個相機架同啊樺講:「……真係出事既,用住佢當係拐杖啦。」

大隻佬頭也不回就步離M記,而我都拿拿聲跟佢走左出去……
或者這就是與敵同行……