[劇毒]自從裝左小熊來電之後……我部電話就無響過……: 24

[2/3/2015 10:43]

我跟住大隻佬行出M記，但係我唔敢同佢行得太近，一直同佢保有一定距離。
望住佢背脊，打量佢全身，百般想法由我腦中湧出。
如果啊樺講既野係岩，大隻佬隨時可以喺我背後桶我一刀，但係我心底又好唔希望件事成真。
但係無論點睇大隻佬都係個好人，就算到生死關頭，佢都依然係最有義氣果個。
定一話佢只係扮出嚟？
好亂啊！

大隻佬或許擦覺到我有異樣，問我：「喂，去邊個巴士站好？」





我望望大隻佬答：「下？」


唔得！我要正常啲！


我嘗試保持振定，唔去亂諗，望住大隻佬：「哦！去創興果邊啦，果到多巴士站。」

大隻佬：「你無咩野嘛？」





我擰擰頭，嘗試降低對佢既戒心，縮短大家既距離，以免佢擦覺我對佢既不信任。
大隻佬見我好似無咩野咁，於是比左個OK手勢就拎起部相機周圍影。
我就有樣覺樣咁拎起相機周圍影。
我嘗試將注意力放喺相機個screen到，但係往往唔夠幾秒又再投放到大隻佬身上。
心入面就不停重復同一條問題：「究竟幾時佢會變做西裝佬……」
與敵同行既感覺真係好難受，你又唔可以比佢知道你懷疑佢，又要提防佢害你。
更重要既係，除左大隻佬，仲有果班西裝佬，我完全唔知我應該將注意力放去邊？

相機好？定係大隻佬好？





我跟住大隻佬，貼住啲鋪頭行，希望西裝佬無咁易見到我地。
但係行左無耐，大隻佬停低左喺豐澤門口，擰轉頭問我：「你做咩咁奇怪？成日都偷望我，你發生咩事啊？」

我無言了，應該話我唔知點答佢好，話懷疑佢？定一話將啊樺講既野講一次佢聽？

大隻佬見我唔出聲就話：「我唔知個女人同你講過咩，但係我可以同你講我唔係咩壞人，更加唔係咩西裝佬既內鬼。」

我再度無言……

大隻佬見我咁既反應都估到咩事：「你唔出聲即係我估中左啦，我唔係傻既。個啊樺應該都係同你講話咩我係內鬼之類既野啦？」

「Er……咁……懷疑都合理既……」最後我都好唔爭氣咁認左……

大隻佬帶點憤怒既語氣道：「唉，果然係咁。都唔知佢係唔係內鬼。你諗下佢成日都分化我地，仲可以咁無情咁望住奇哥仔死。就算個奇哥仔的確成日擺我上枱，但係我望住佢咁死我自己都唔忍心，但係佢竟然可以咁做。」





我：「唉，我都唔知啊……」

大隻佬問我：「咁佢仲同你講過啲咩啊？」

我擰擰頭表示唔想答，始終大隻佬都係可疑既。

大隻佬見我咁嘆左口氣說：「唉，都唔知佢係唔係乘機馭走我地，等佢同班西裝佬通風報訊，一陣襯我地番去M記果陣殺我地！」

大隻佬雖然講得好悔氣但係又不無道理。
只要利用我同大隻佬出左去既時間，啊樺就可以斑定馬叫西裝佬嚟。
更重要既係，比起大隻佬，啊樺既嫌疑都差唔多。
佢對我講咁多都可能只係為左呃我既信任……

我再諗多諗，或者啊樺既計劃唔係咁簡單。




可能只要一番到去，啊樺就會消失。
到時再利用我對佢既信任，等我以為佢真係比西裝佬捉左，咁我就一定會離開大隻佬。
到時就變左我同大隻佬都落單，落手都易啲……

FUCK！信邊個好？
大隻佬？定啊樺？

我依加既心情就同佔中果陣一樣，究竟邊個消息先係真？
原來當信任一被打破，關係就會變到好複雜……
比起去掉低個電話，我更加驚之後發生既事……