[劇毒]自從裝左小熊來電之後……我部電話就無響過……: 25

[2/3/2015 10:57]

「唉，行啦，你想就跟住我啦，我唔逼你信我。」大隻佬轉身繼續前進，決定放棄去遊說我。

而我就決定同佢保持距離，唔會太遠，都唔會太近。
我拎住部相機對住街上面既人一影再影，始終見唔到有咩異像。
我地一路前進，直到係豐澤既轉角口既時侯，大隻佬舉起隻手叫我停低。

我低聲問佢：「咩事？」





大隻佬比左個手勢示意要我貼實牆邊，答我：「你自己睇下。」
我以一種疑惑既眼神望向佢，佢一隻食指，指實轉角位果個方向。
我正想走前拎起部相機影既時侯，我停低左。
我既警戒心話我知要小心，可能佢想借機做瓜我。
我示意叫大隻佬行埋一邊，佢帶點灰心咁唉左聲就走左去架泊左喺路邊既貨車到等我。

我安心咁拎起部相機一影，我見到商務書局果邊有個偽裝過既西裝友喺到行嚟行去。
睇嚟之前Major Tom講既野無錯，果班西裝佬的確會追跡到我地既電話訊號，再嚟搵我地。
但係西裝佬既出現都表示此路不通，要過對面睇嚟又要花一段時間……






我走番去同大隻佬講：「我見到啦，佢地有人守左喺到，條行人隧道過唔到啦。」

大隻佬：「咁我地行第二條路咪得。」

當我正想答好既時侯，我停左口，我諗一諗話：「都係唔好。若然佢地就連書局依邊都可以放個人喺到守住，睇嚟佢地人手一定唔小，搵個最近既巴士站啦。」

大隻佬：「我知恆生果邊有車，行啦。」

我答左句好，就跟住大隻佬行番回頭路。




我打量著大隻佬，心諗：「或者佢真係信得過既，始終岩岩佢就可以落手……」
我開始對大隻佬放下戒心，都唔介意同佢縮短同佢既距離。


可能都係自己多心姐


如是者，喺有驚無險之下，我地好快就行到去恆生銀行前面既巴士站。
我同大隻佬企左喺恆生入面，一邊留意住出入口既人，一邊望住有無巴士靠站。

我拎出龍友部電話問大隻佬：「將部電話拋去邊架巴士到？」

大隻佬諗一諗答：「果架117，去跑馬地既。」

我望住部電話開始思考，究竟應該我拋電話，定一話交比大隻佬？




始終由我拋好危險，但係交比大隻佬都唔知佢會點做……

大隻佬一手拍喺我膊頭話：「信我啦，等我嚟。你驚我害你既，一陣巴士到你先交比我囉。um……之後你再走嚟恆生到睇住我囉。就好似上次我地喺酒店門口偷影個西裝佬咁，好無？」

當大隻佬提到酒店既事，我動搖了。
我點點頭答左句yes就同佢一路等架117。
雖然九巴出名遲唔準時，但係今次架117好快就到。

我拎出龍友既電話交左比大隻佬，佢對我比左個自信既笑容同我講：「放心啦！」
我咩都無答但係都無擰轉身，我一直望住佢倒轉行，一路望實佢。
當架巴士終於靠站既時侯，大隻佬即刻拆開個錫紙，好似拋炸彈咁，將成部電話拋左入巴士站。
依一刻，我就好似聽到句：「fire in the hole！」
跟住大隻佬就九秒九咁跑番番嚟。
而我就一支公企左喺恆生到，望住架巴士。





「仲唔走？」大隻佬走過嚟問我。

我：「唔好住，如果班西裝佬發現左個電話既話應該嚟緊，我地走實會比佢地發現。所以等架巴士走左陣我地先走。」

大隻佬明白我既意思，拎起相機影影周圍既環境。
我同佢就喺恆生門口等左幾分鐘，直到架巴士開走，依然無西裝佬出現。


會唔會係個訊號太快出現？
點解西裝佬好似未有行動咁？


我決定再留多陣，睇下有無變化。
可惜足足等左差唔多半粒鐘，班西裝佬都無出現。
莫非啊樺既計劃唔work？





我花小心翼翼咁行番去M記，直到行到去m記門口之前，我叫停左大隻佬。
係揭開之前顧慮既時侯，究竟啊樺信得過？定係大隻佬信得過？

我同大隻佬：「我雖然好想信你，但係你喺門口等我。」
大隻佬無咩表示苦笑左下話：「好，無所謂。」

我急急腳衝落m記大叫：「啊樺！」

但係無人應我……

「啊樺！」我再叫。

Fuck，唔通大隻佬真係內鬼？但係佢無理由唔郁手？





「啊樺！」我走入個開放式廚房搵啊樺。

定一話係啊樺既計劃，想一次過搞掂我同大隻佬？
頂！有太多可能性啦！信邊個啊？