[劇毒]自從裝左小熊來電之後……我部電話就無響過……: 26

[2/3/2015 12:32] 

信邊個好……
唔係，更重要既係我要點做……
我成個人無晒方向，企左喺個counter到，望住間m記入面啲人來來去去……
而我既生命就隨住時間一點一滴咁流逝，西裝友隨時都會嚟，但係我依然諗唔到點做。

果然有兩個人行緊落嚟，而且相機都影唔到佢入鏡。
我咩都無做就咁踎低左，將自己既身軀隱藏於counter之後。





「踏！」

果兩條友愈行愈近，我只係閉上眼，咩都唔睇。

「踏！」

究竟係啊樺定一話係大隻佬叫嚟架呢？
頂！個結果已經無意思啦！

「踏！」





睇嚟我都係無機會再見happy，仲有我屋企……

大隻佬大叫：「喂！出嚟啦！」


原來大隻佬先係內奸……
Fuck！唔怪得無面裝佬跟住架巴士，西裝佬一早就知道我地想點……






啊樺又話：「喂，出番嚟啦。」


下？唉點解啊樺都會喺到既？


我瞪大眼，企番起身，我見到啊樺同大隻佬正正企喺我面前。

我：「你地……？」

啊樺：「咩啊？啊大隻哥哥pass左我既信任test，就係咁囉。」

我：「下？咁你呢？」

啊樺：「你都傻既，我又點會坐喺m記入面等死啊。我當然係過左對面睇下有無西裝佬嚟。」






嗯……睇嚟除左信啊樺同大隻佬兩個choice，仲有第三個choice，就係兩個都信得……
Fuck！我岩岩究竟驚咁多做咩？


啊樺見我仲疑惑緊就話：「放心啦，我地三個都唔係內鬼。」

大隻佬無出聲只係轎住雙手望住我陰陰嘴笑，或者係恥笑緊我之前疑神疑鬼。
唉，比佢兩個咁點嚟點去，依加我淨係想搵個窿捐入去。

大隻佬：「岩岩啊樺同我講過架啦，我地今日暫時都係唔好咁快番去住。」

我指住啊樺隻腳話：「下？點解啊？佢行到架。」





啊樺話：「如果我地三個都唔係內鬼，則係表示淨低果六個就有人係內鬼。」

我聽到內鬼依個字，不禁打左個冷振，再提出一個可能：「但係會唔會根本就無內鬼一回事？」

啊樺啪一啪手指話：「無錯，都有咁既可能性，所以我地先唔可以咁快同佢地會合。」

我：「下？我唔明啊。」

啊樺問：「你知道龍友既死係過敏啦，但係我覺得無論點過敏既反應都唔會咁大。我覺得似係有人打左啲新形病毒去佢到。若然我地聽日去到發現有多個人咁有類似死法，咁就肯定佢地當中有人係內鬼。」

我：「但係點解佢唔一早就落手，明明有好多機會比佢出招。仲有西裝佬果到又點解釋？太多唔合理。」

啊樺：「唉，我都唔清楚，其實我覺得遠離佢地，我地三個搵個地方走就算，但係……」

啊樺不禁望一望大隻佬再唉多聲，大隻佬露齒一笑：「點都要去救佢地既，話晒都係兄弟，起碼我都想救啊Stephen走。」





啊樺：「你仲想企喺個counter入面幾耐啊？整啲野嚟食下啦，都十二點啦。」

比啊樺提一提，又的而且開始確肚餓……
我求其執左幾個餐，出去同啊樺佢地搵個位坐低食。

大隻佬一路咬住個巨無霸一路話：「哈，都有成年幾無食過m記啦。係呢，你有無同啊樺講？」

大隻佬望住我，我拎住件麥樂雞同佢兩眼對望：「下？講咩？」

大隻佬：「架巴士啊。」

我：「哦！係啊，啊樺，我地岩岩將龍友既電話掉左上車，但係出奇地西裝友無出現到。」

啊樺翹起二郎腿，優雅咁咬住佢條薯條，對我所講既野沉思一番：「或者我有個諗法，會唔會有個限制係每日只可以殺一個人？」





大隻佬：「下？點會咁低能啊，無可能。」

我：「咪係囉，唔合理。」

啊樺：「其實我發現過一樣野就係「大停電」既現象，每當進入「大停電」，西裝友就無再點出現過。另外，今日同琴日都只係發生過一次「大停電」，會唔會代表一日只會有一次「大停電」？
而且今日龍友既死左無耐，「大停電」就發生。
會唔會係代表每死一個人，就會「大停電」？
如果我果兩個假設都係岩，就表示每日只可以死一個人。」

我：「咁琴日既「大停電」代表有人死左？」

大隻佬補充：「跟住就有個西裝佬扮係我地一份子！所以內鬼既假設都岩！」

啊樺點點頭：「咁睇都合理啊。」

我：「但係點樣都好，我地永遠都係一對對咁行動，無落手既機會……」

啊樺：「咁又係……」


唉，仲以為內鬼既話題已經完結，點知又爆出個更大既內鬼問題……
點解個世界可以咁複雜……