[劇毒]自從裝左小熊來電之後……我部電話就無響過……: 27

[2/3/2015 14:04]
 
啊樺喺將紙上面寫左六個人既名：「將我地三個排除在外既話，仲有六個人有嫌疑，金毛仔，OL，果個靚妹，運動裝，警察同埋Major Tom。」

大隻佬指住Major Tom果名：「麻雀湯一定唔係內鬼，佢提供得太多西裝友既料，我地知。」

我都點點頭表示同意：「Major Tom唔會係。」

啊樺：「我都覺得係，照道理佢如果係內鬼，就唔會咁做。」





大隻佬話：「我覺得金毛仔啊賢最有可疑，你地諗下同龍友去做果啲事既係佢，最有機會落手既係佢。」

啊樺擰擰頭：「唔會，我覺得以內鬼既智力，佢一定唔會特登咁做去令自己受到懷疑，佢只係想轉移視線。」

聽到啊樺咁講，我表示極度同意：「岩，以內鬼既智力，可以令我地進入一個又一個既陷阱，一定唔會咁白痴等自己受到質疑。反而小出聲果啲最值得懷疑。」

大隻佬：「我就覺得stephen唔會係咁既人，佢同我一齊去救Major Tom，而且一開始仲幫我拖廷左啲時間。」

一諗起四眼警察個正氣樣，的確好難令人懷疑得落既，我點點頭問：「咁OL同靚妹呢？」





啊樺：「唔會，啊麟講得岩，小出聲的確係要懷疑，但係如果唔出聲去影響大家既決定，內鬼會好難行事。至小要掌握我地所在既地方，所以運動裝最可疑。」

經常同運動姐姐同一陣線既大隻佬好快就比出一種質疑既眼神望住啊樺話：「無可能既！」

啊樺：「你諗下，係邊個帶我地去Starbucks？又係邊個令我地三個落單？我覺得佢應該一早就同西裝友約好左，要喺果到伏我地。」

大隻佬同我都唔出聲，各自咬住薯條思考一番，的而且確運動姐姐係好有問題。
但係真係好難相信同我地都叫一陣線既運動姐姐係咁既人。

大隻佬反駁：「唔會，佢一路都照顧住Major Tom，照道理，應該一早殺左佢啦。」





啊樺：「同金毛仔唔係內鬼既理論一樣。如果佢殺左Major Tom，佢一定係最有問題，所以一定唔係佢。」

啊樺講既野的確係有道理……

望住我地依然一臉迷茫，啊樺再說服我地：「你諗下今朝，我提出左個地方，佢就即刻反對，仲好快有下一個地方既建議。所以我覺得佢最有問題。」

大隻佬對啊樺大叫：「無可能！」

望住大隻佬咁既反應，我有絲絲明白，不論我，四眼警察定係運動姐姐，都叫做同佢出生入死過。
一個咁既兄弟比人懷疑，以大隻佬咁重義氣既性格，嬲都好正常。

我見個氣氛開始有啲僵就走出嚟話：「算啦，依加討論都無咩意思，始終我地知既野都仲係好小。」

啊樺識趣地唔出聲，而大隻佬都擰轉頭唔出聲。




得番我一個夾喺佢兩個中間。
我唯有咬下薯條等自己有啲野做。
咬下咬下，我開始諗起一樣野……

我望住大隻佬：「啊大隻哥哥……」

大隻佬帶點怒氣咁話：「夠啦，唔好再叫我咩大隻佬，大隻哥哥，我叫啊強！」

大隻佬既霸氣嚇到我即刻sa lum話：「sorry啊，強哥。但係我有樣好重要既野想問你。」

大隻佬氣未消，依然嬲爆爆咁話：「咩啊？」

我：「你裝左個小能來電之後有無撳過入去睇？」

大隻佬點點頭：「有既……」





我：「咁你有無……」

啊樺見我未講完就搶閘問：「你有無見到個Apps有啲咩奇怪？」

聽到啊樺咁既問法，我明白佢驚我問得太白。
啊樺依然對大隻佬帶點戒心，所以驚我透露太多比大隻佬知。
如果我問佢有無見過三個字既密碼，佢就隨時可以跟住我講既pattern求奇比三個字我。

大隻佬：「有，佢無啦啦彈左三個英文字：NUY」 

啊樺再沉思一會：「下？」

我見啊樺都無再點問我就話：「我，啊樺同龍友收到既係： DTA ，1SO同ND6。」





大隻佬：「ER……咁會唔會係速成？」

啊樺擰頭：「唔係，無可能，DTA同你既NUY已經唔係速成碼。」

大隻佬：「但係個ND6同1SO呢？」

我：「最簡單既ND6係個除字，但係個1SO呢？應該係打SO1？定係掉轉睇OS1？」

大隻佬：「我唔係太識速成，我都唔知咩字……」

啊樺：「SO1係尺，OS1係仍。兩個都無咩意思咁……」

依個時侯，我地十年無響過既電話竟然同步一齊響……