[劇毒]自從裝左小熊來電之後……我部電話就無響過……: 28

[2/3/2015 14:34] 

當我地傾到一半，電話短短咁響左下，更重要既係我地三個人既電話係同步響起。
包左喺錫紙入面既手機振左下又響左下，係有人向我地發出短訊。
但係我同大隻佬都唔敢亂郁，因為依個短訊有太多奇怪之處。
我地三個拎左果舊包左錫紙既電話放喺枱面。

我同大隻佬唔出聲，望去分析力好既啊樺：「點啊？」

啊樺舉起隻手指做左個手勢，對我地講：「等等，唔好打開住。」





我：「嗯，個sms太奇怪。」

大隻佬：「會唔會係西裝佬班人為左引我地而send比我地？」

啊樺：「唔會，若然係佢地send sms比我地，則係表示我地既電話係可以收到外界既訊號。同時，相向地外界都會接收到我地既訊號，錫紙既方法根本就唔work。西裝佬一早就收到我地既訊號，咁又何必要特登send 個sms 比我地，去引我地出嚟先？」

我：「噢！則係個假設係矛盾。」

大隻佬：「咁則係放心啦。錫紙個方法仲work。」





我：「但係如果仲work，我地無可能會收到sms。」

啊樺：「係，太矛盾啦。若然包錫紙既方法一早唔work，西裝佬隨時都可以殺上門，咁點解又要安排內鬼喺到？」

我：「咁如果個sms係來自電話內部呢？」

啊樺同大隻佬望住我：「下？咩來自內部？」

我：「如果個sms根本唔係sms，係電話本身send比我地呢……um……則係小熊來電send比我地既。」





啊樺見到我出奇地比左個咁突破性既分析，拍左幾下手掌，笑左笑話：「岩，有好大機會係小熊來電既製造者send比我地。」

大隻佬：「但係小熊來電既製造者同西裝佬唔係同一伙咩？」

啊樺：「咁就睇個sms內容。更重要係會唔會又係另一個密碼……」

我：「但係如果我地一開就會……」

啊樺：「係，咁佢地就會知我地既藏身地。所以我地唔可以咁快開個電話。」

大隻佬：「我覺得未必要搵第二個地方睇，你諗下岩岩我同啊麟拋走龍友部電話，都無西裝佬出現。會唔會係因為每日殺一個人既目標已經做到，所以就咁？」

啊樺點點頭：「有好大機會，但係最保險都係搵個遠小小既地方睇啦。」





我：「咁不如去女人街果邊，依加果到咁多人，要走都走得快啲。」

啊樺擰擰頭：「但係多人都意味住危險，不過女人街好有用，我地經果邊逃走啦。」

大隻佬：「一係我地喺依到睇完再跑去下一個地方？」

我：「咁家樂坊既Starbucks啦，果到好易就睇到地面既情況，點都好過喺依間地下既m記，對於地面既情況知得太少。而且Starbucks既人流唔會多得去邊。」

啊樺同大隻佬點點頭都話OK。於是我地拎番起啲腳架同相機就企左喺M記出口，準備打開錫紙。

啊樺呼左啖氣：「一」
我望望大家，一手捉住張錫紙：「二」
大隻佬對大家比左個招牌式笑容：「三」

我地打折番開張錫紙，撳左SMS果到一睇，我地三個都收到同一個SMS，上面寫住： GPVS EBZT UP GSFF




又一個密碼……