[劇毒]自從裝左小熊來電之後……我部電話就無響過……: 30

[2/3/2015 16:23] 

正當大隻佬要離座幫我地沖下咖咖啡果陣，啊樺大叫左句：「Fuck！」
搞到大隻佬當堂停左格，唔敢郁，都唔敢出聲，只係望住啊樺。
我問啊樺：「咩事啊？」

啊樺露出左一臉膽憂，望住我同大佬：「我地同金毛仔可能會失散……」

我：「係啊！如果佢地同我地一樣收到sms，又要睇既話……」





大隻佬：「即係佢地唯有轉場！如果我地再唔趕去現時點既話，我地好有可能會同佢地失散……」

依個時侯啊樺個樣就更加苦惱，佢無出聲，只係沉思。
本來想去沖咖啡既大隻佬一諗到要失散，佢就停左手，開始收腳架，準備走人。
啊樺個樣更加無奈，佢眼白白坐喺到睇住大隻佬執野，講唔出無任何野。
大隻佬收番起所有野入運動姐姐交比佢既袋，行到去門口前停低左。
佢擰轉頭對我地好決絕咁講：「我講過，無論點我都唔會拋棄佢地。你地走定唔走？」

我同啊樺都唔敢出聲，更加唔敢抬頭去望大隻佬。
內疚感由心底湧現，望住大隻佬既身影，我真係覺得好對唔住佢。




由今朝開始，佢都好保護我地，但係我地依加就係因為怕死，所以放棄左佢。

大隻佬低聲講左句：「咁我走啦。」就頭也不回踏出門口。

我完全唔知點面對佢好，更加唔敢去望去門口，唯有低頭唉左聲：「個sms既真係出現得唔係時侯……」

啊樺：「嗯……係囉？等等！」

啊樺講到一半就衝左出門口大叫：「啊強！」「啊強！」
我跟住佢走出去，當然大隻佬走得唔算快，都未行夠幾步就已經比啊樺捉住左。




我地三個就咁企左喺家樂坊門口，而其他人就無視我地繼續人來人往。

大隻佬：「咩事？」

啊樺帶點氣喘：「唔……唔好走……」

望住佢兩個咁樣捉住手既對話我仲以為係TBB拍果啲愛情片。

我打破佢兩個尷尬既氣氛問：「點解？」

啊樺：「我諗到啦！我諗到啦！」

大隻佬同我一樣望住佢下左聲。

啊樺：「我知道個SMS咩意思啦！」





我：「咪就係過多四日我地就會自由囉。」

啊樺擰擰頭：「唔係，個內容唔係重點。個重點係佢幾時SEND過嚟。係內鬼既計仔！一定係！」

大隻佬：「我……唔明？」

啊樺：「根本個SMS唔係小熊來電既人SEND嚟，係個內鬼！錫紙既方法根本就唔work！個內鬼想借個sms令我地盡快番去。」

我：「就係因為個內鬼諗到一步，我地應該會推斷到佢地為左睇個sms就迫住轉地方，所以就想借咁既計仔迫我地快啲番去同佢地會合？」

啊樺不停點頭話「係」

大隻佬：「但係點解佢一定要我地番去啊？大可以叫西裝佬殺左我地咪得。」





啊樺：「除非西裝佬唔可以殺我地？你諗下班西裝佬既身手，要殺Major Tom有幾難，但係最後Major Tom又走到，唔係太合理，除非Major Tom講大話，又或者根本就係班西裝佬唔可以殺我地。」

聽到啊樺咁既分析，我諗起套漫畫，叫火鳳燎原。
入面有一句：計謀之始，是要讓敵人知道你的下一步，然後小心預測敵人以後的每一步。
依個內鬼太高深，好彩我地都仲有個啊樺既。
若然我地發生既事係個故仔，我覺得個作者應該都係姓陳既。

我拍左下手掌指住啊樺：「oh my god, you are fucking genius！」

啊樺對我禮貌咁笑左笑話：「所以我地先唔可以咁快番去，而且我地一定要掉走部電話！」

大隻佬摸住佢個下巴一路思考一路點頭發出「嗯」既聲。

啊樺：「 你唔信，一係咁。無論點我地都要走，因為我覺得錫紙既方法太唔可信。將部電話留喺到，我地再轉場，搵個近現時點既地方行，好無。」





大隻佬聽到啊樺既方案都無咩好反對：「咁你地去執野啦，我喺到等你地。」
大隻佬由個背包到拎番部相機同電話出嚟，交左比啊樺。
啊樺接過部電話就拿拿聲同我行番入Starbucks執野……