[劇毒]自從裝左小熊來電之後……我部電話就無響過……: 31

[2/3/2015 17:34]

我同啊樺拿拿聲行番入Starbucks執野，不過好老實咁講我同啊樺有幾多野可言？
大家都係得個背囊仔，一件風褸，同埋些小隨身物品。
啊樺走左去counter，當住班職員面，拎左幾支有汽礦泉水出嚟放落個袋到。
曾經我會叫依個動作做偷，依加？
拎你既咪拎你囉，洗比面，反正你又睇我唔到。
如其話我地係透明，倒不如話我地已經當左其他人係透明。
除左我地十個加埋班西裝佬，我地既世界就再無其他人……





好老實講，同紅van故入面既世界比，我地都咪又係差唔多，都係消失。
只不過唔係人地消失，而係我地消失。

望出窗外面，我見到既唔再係人群，而係草叢，一個充滿蛇蟲鼠蟻，妖魔鬼怪既草叢。
雖則話啊樺講過啲西裝佬應該就唔會殺我地，但係你信唔信一個對你揮刀相向既人唔係想殺你？

我跟住啊樺一齊拎多幾支果啲賣到天價既水入袋。
啊樺對住我伸出隻手：「電話。」

我望望佢，再拎番我部電話出嚟，望住部電話都未免有多小既感慨……




話晒都叫用左差唔多年幾，最重要係我同happy一齊買既情侶機。
估唔到咁就要拋棄佢。
我拆開左錫紙，撳多幾撳，我先發現原來whatsapp果到，有個未知既號碼send左個短訊嚟，叫我去旺角。
我望望個number，突然有種想法。
「等等，點解我地唔試下打番去sms個number到？咁咪知邊個係內鬼囉。」我望住啊樺，指番住sms個number到。

啊樺：「你唔好咁傻啦，邊有人個電話number有成n個碼咁長架？好明顯就無可能。」

的而且確啊樺講得無錯，個電話number太長：9707989088404585615057505
不過唔識死既我都係打左一次，當然個結果係長響無人聽。





啊樺將啲電話拆晒錫紙，收左喺個counter既收銀機到。
之後我同佢就走番出去同大隻佬會合。

當我地走到出去，天都開始暗，但係旺角依舊熱鬧。
依然有好多強國人拖住佢地既死人喼，成架坦克車咁周圍轆人腳指。
不過我諗家樂坊果到，你會注意到既多數都係果到既臭豆腐味。
但係逃亡緊既我地又邊有咁多時間去欣賞，我地跟住大隻佬走離開左家樂坊，行入左隔離果個公園既巷仔。
一路跑跑跑，點知一行出到碧街果陣，大隻佬就停左喺到，佢舉高個拳頭，叫我地一齊停低。
大隻佬指指對面，就已經見到有兩個西裝佬守住左喺個地鐵站出口。
「點算啊？」我問大隻佬。

大隻佬望兩望周圍既環境成條街有好多貨車泊左喺到。
於是乎，大隻佬叫我地踎低。
我就好似打機咁一路踎低一路行，急急腳咁衝左去架貨van則邊。




大隻佬貼住車邊，舉起個相機，透過架貨van影一影周環既環境，好彩對面好多貨車喺到，進入左班西裝佬既死角。
於是，我地就跑過對面，走到去一架貨車既車頭。

「呼……」我同啊樺都倒抽一口涼氣，但係淨低既就係最危險既一部份，點樣走入去山東街？

我地一路等等等，而大隻佬又成日望望行人路果邊，再望下馬路果邊，等緊一個機會。
最後有架貨車因為要讓路就停左喺山東街出口，我地三個拿拿聲，借架貨車，終於避開到西裝佬既視線，走入山東街。

點知行入去無耐，街上面既燈就熄晒，其他人又再一次消失。
係「大停電」……