[劇毒]自從裝左小熊來電之後……我部電話就無響過……: 32

[2/3/2015 19:44]

我同啊樺停左喺條街到唔敢郁，唯獨是大隻佬，佢無遲疑就一手捉住我地兩個入左去間停左電既粥鋪。
我地三個企左喺鋪頭入面等，等待一切回復正常。

大隻佬一掌打落張枱到：「豈有此理！咁既情況即係又有人死啦！」

雖然大隻佬既矛頭唔係指向啊樺，但係我隱約都見到啊樺比大隻佬嚇到縮一縮。

我：「我諗今次都無辦法唔去番搵佢地啦……」





啊樺無表示，又或者佢仲自責緊自己所推斷既錯誤。
再一次「大停電」有機會係有人被殺，又或者「大停電」同有人死無關係。
若然真係有人被殺，再咁樣等落去已經無意思，因為就結果而論，已經睇到係有內鬼存在。
如果我地再等到第二日已經無意思……

「行啦。」大隻佬踏出門口。

而我同啊樺就密密咁跟住佢走。
大隻佬帶我地走左入條巷仔，一路行一路行。




不過因為入夜加上無燈，跟本就睇唔到路，於是大隻佬就用住相機MON果小小既光，依稀前進。
好彩係條巷仔好短，好快就行左出彌敦道。
一條黑媽媽，無街燈，無霓虹，無車，無人既彌敦道。
如果你問我咩感覺，我都只可以答你，得個驚字。
因為我真係接近咩都睇唔到，最怕既就係西裝佬唔知邊到彈出嚟。


今次既「大停電」耐左……






「喳！」一聲，我地又再回復番正常，啲人出番晒嚟，所有野回復正常，而現時點正正喺我地既側邊。
我地三個企左喺個門口，大大啖咁吸左口氣就一齊行入去……


唔知道有其他人去過現時點，但係佢同其他大形商場比起，完全反其道而行。
佢既門口無豪華既裝飾，設計一啲都唔摩登，感覺仲停留緊喺九十年代。
更重要係佢一啲都唔起眼，內部紛紛暗暗咁，仲有門口仲殘留住啲千年未洗既污漬，的確好難吸引人入去。
我地三個大大喺咁吸左口氣，壯壯膽就行入去。
大隻佬推開道玻璃門，為我地帶頭入去，點知唔洗問啊貴，已經睇得出有人死得好慘。
我地一入喺門口已經見到地上有灘血，血泊中有個腳架跌低左，而且仲有一個個血腳印由，血水中步向往上一層既電梯。
我地跟住血腳印，經電梯上到一樓，可以清楚見到血腳印向住商鋪既方向廷伸而去。
我地線線就一路望住地下，跟住啲腳印，最後停左喺到。
而視線就由地下，移番周邊既商鋪，已經估到咩事……
係一種好慘既死法……





周邊鋪頭既櫥窗染上一片紅血，鮮血甚自將成個櫥窗都掩沒，令我地完全睇唔到商鋪入面既狀況。
但係唯獨唔見屍體，就連些少肉塊都唔見左……

係人體爆炸……

「櫓櫓……喀」啊樺一想像到個情景又忍唔住嘔左出嚟。

我同大隻佬，帶啊樺去左個遠小小既地方，等佢嘔。
我一路掃佢背脊，等佢舒服啲，但係啊樺就繼續嘔……

「係佢地啊！」依個時侯我聽到四眼警察把聲由走廊既盡頭傳過嚟。

佢開始向我地飛奔過嚟，但係仲嘔緊既話舉起隻手掌叫四眼警察唔好再行前……

一路嘔緊既啊樺勉強講左句：「其……他……櫓櫓……喀……人？」





四眼警察對住佢本來走過嚟既方向大叫左句：「無事啦！唔係西裝佬佢地。」

之後其他人都陸續出現，除左一個人……係援交妹。

大隻佬問四眼警察：「係……個靚妹？」

四眼警察默不出聲，低頭點下就算。
依個時侯第一個趕過嚟既運動姐姐對住我地話：「電話呢？」


一聽到運動姐姐咁急咁問，我第一時間係起戒心。
睇嚟佢真係內鬼，咁急要我地電話，應該係知道左密碼既事！
我拿拿聲就作左個大話：「啊！我地留低左。」





運動姐姐即刻對四眼警察下令：「鎖起佢地啊，stephen，啊賢！」
四眼警察一聽到運動姐姐咁講，本來對我地露出一面慈祥既佢，即刻變左樣。
佢由背後拎起左個手扣扣實大隻佬，而MK仔就馬上上前用索帶綁住左我。
至於啊樺就由運動姐姐上前親手用索帶綁住佢地。

我對住佢地大叫：「咩事啊！做咩要綁住我地啊！」

運動姐姐：「你地點證明你唔係西裝佬啊？就連電話都無，好難去信你姐！」

停左嘔既啊樺細細講：「Fuck又中計！點解連依一步都計埋！」

大隻佬：「下？」

啊樺：「中伏啦，就係因為個運動裝知道我地實會拋棄個電話，所以佢就可以順利成章咁去捉住我地，甚至殺我地……」





我聽到啊樺既解釋，我就知道個內鬼太高深，應該話係運動姐姐好高深。
仲以為可以搵到方法避開個內鬼既追跡，點知咁又成為左個致命傷……