[2/3/2015 21:32]

我地三個比運動姐姐一行人捉住左,仲要被佢地搵左個鋪位,鎖左我地喺入面。
而四眼警察就坐左喺道透明閘出面,看守住我地。

我企左起身喺依個細細既鋪位入面行嚟行去:「點解會咁嫁!」

啊樺佢無答我,只係閉上眼沉思。

大隻佬望住我行嚟行去都忍唔住話:「你唔好急啦,我諗過埋今晚,佢地應該會信我地既係清白既。」





我望住大隻佬大怒道:「清白!點證明啊?佢地一早已經咬定我地係西裝佬既人啊!」

大隻佬望住我咁燥都唔敢再出聲,於是乎我就向四眼警察:「喂!你好放我出去啦!」

但係四眼警察就好似尊佛咁坐左喺門口,無為所動。
大隻佬就借機同四眼警察搭話:「啊stephen你信下我啦,好無?我地真係清白架。你睇下我仲記得你叫stephen啊。」

依個時侯四眼警察就好似有啲動搖咁望向我地:「你唔洗止意呃到我啦,要知我叫stephen有幾難啊?佢地都分析過,若然樣都可以模仿,更何況記憶?要知有幾難啊?」





我一聽到「佢地」兩個字我就即刻出聲揶揄四眼警察:「佢地?你係指著運動裝個位姐姐啊?」

「咪係囉!實係啊運動裝叫你咁做架啦。」出奇地一路沉默既啊樺竟然開口一齊幫口。

四眼警察開始變得有啲唔耐煩,大隻佬見到咁就乘機加鹽加醋:「唉,啊stephen,你都唔知係唔係男人,比個運動裝咁既女人點嚟點去。」

「喂,夠啦下,人地叫做啊白啊!」四眼警察頂唔順就轉身對住我地發火。

啊樺一見到四眼警察上釣就比左個質疑既眼神望住佢問:「唔通你就無諗過個白小姐係西裝佬果邊既人?」





「一定唔會啊。」四眼警察反駁。

啊樺再整多個凌厲既眼神望住四眼警察問:「你肯定?係邊個帶我地去完一個又一個中伏既地方?點解西裝佬會知我地喺starbucks?」

四眼警察開始動搖,都答唔上啊樺既問題。
依個時侯,旁觀既我就好似見得到佢個腦,果個石化左既大腦,再次解封,繼續郁番。
望住四眼警察既反應,我突然覺得佢好可悲。
就係因為情況愈嚟愈複雜,所以我地開始放棄思考,所以就將思考既責任交左比團地既領袖。
最後,我地做既再唔係根據個人既意願同分析,而紛紛成為左依啲領袖既工具。
更甚者就人云亦云,人地講佢就信……

大隻佬依個時侯再打溫情牌:「Stephen,我希望你信我地三個係清白。我地三個離開左你地班人既時候,做過好多次分析,都係覺得你地果剩低果五個人入面,一定有個係內鬼。」

四眼警察無出聲,啊樺就接力:「我覺得運動裝的而且確係最可疑。正如我問過你,你都知,不論Starbucks,定一話係依加依個現時點商場,都係佢提出。你都知我地有用錫紙既方法,但係都依然比班西裝佬發現我地就喺Starbucks,一係錫紙既方法唔work,一係就有人通風報順。而依個人好大機會就係個運動裝。」





四眼警察:「個方法係work,因為我地躲避喺到都無人發現。」

啊樺:「我唔知,但係你諗下你今日下晝收到果個sms,我地都無signal又點會收到sms。」

四眼警察:「因為小熊來電send嚟。」

啊樺:「好明顯就係個運動裝呃你地啦!」

四眼警察擰擰頭:「唔係,你睇下個電話number,其實係九方字形碼,正正係寫住:我係小熊來電」

我:「咪又係運動裝講既。」

點知四眼警察個頭擰得仲大反應,佢話:「係我……你地依班人太唔可信。」






下……what the fuck……
唔通個message係真既?


啊樺見到四眼警察想轉頭唔理我地果陣:「等等先!你諗下攝影師既死法,真係普通過敏?就算係,咁靚妹呢?佢咁樣人體爆炸仲會係普通既病?好明顯係有人偷偷地打左啲唔知咩病去搵我地做白老鼠啦。」

四眼警察又再遲疑番,但係又再開口:「唔係,啊stephy唔係人體爆炸,而係全身啲血無啦啦由皮膚各處流出嚟,最後就一次過……佢條屍都仲留左喺果到。」

四眼警察指指岩岩我地經過既案發現場,但係條屍呢?
我地三個抱住懷疑既眼光望住大家,四眼警察見到我地有異樣就即刻問:「你地做咩?」

啊樺諗左諗都係決定講出嚟:「我地經過果陣無見到條屍……」

四眼警察:「咩話?無理由!」





啊樺問:「你地有無人睇住條屍?」

四眼警察擰左擰頭,啊樺面色開始變再問:「咁你地……都無人睇住個門口,咪則係班西裝佬……」

點知四眼警察竟然點頭:「有,我地有人睇住個門口,所以唔關西裝佬事,只係見到你地入嚟,所以你先見唔到有人站崗……」

四眼警察既答法,令到發生至今既事,更加複雜……
點解條屍會唔見……