[劇毒]自從裝左小熊來電之後……我部電話就無響過……: 34

[2/3/2015 22:54] 

「算啦，我都係唔應該再聽你地亂咁講。」四眼警察擰番轉頭決定唔理我地。

啊樺：「喂，你信我地先啦。」

四眼警察依舊唔理我地。

依個時侯，大隻佬：「等等！你話個sms真係小熊來電send架嘛，如果我知個內容係咩，咁我就唔係西裝佬扮架啦！」





四眼警察又再擰番個頭望住大隻佬，等佢開口：「係GPVS EBZT UP GSFF！」

四眼警察聽到，今次係真真正正咁受到動搖，佢話：「你地……點會知？」

我對住佢笑左笑話：「都話左我地唔係架啦！」

四眼警察：「對唔住啦……我放你地出嚟啦。」

當我正開開心心諗住可以走既時侯，啊樺竟然殺出嚟話：「唔好！千其唔好！你要扮唔知！我唔想咁快比個內鬼知道。」





聽到啊樺咁講，不論我，四眼警察定係大隻佬，都表示出不解既樣，望住啊樺問：「下？點解要咁做？」

啊樺望出鋪頭周邊確保無其他人，佢再細細聲講：「以我估計，個內鬼就係想我地三個處於咁既情形。等我地不被信任，再困住我地，咁佢就可以輕易殺左我地。所以我想借啊stephen你隻眼再觀察下邊個係內鬼。」

我望住啊樺問：「等等，但係點解佢唔直接快快手一次過殺晒我地？」

可惜啊樺都係答唔到，但係佢好快就將焦點轉去四眼警察到：「不如你同我講下你地失散之後既情況。」

四眼警察：「啦，事先聲明，雖然我信你地，但係唔代表我信我地之間係有內鬼。」





我唔耐煩咁對住四眼警察：「得啦！」

四眼警察：「我記得當我地一落樓就有西裝佬追我地，迫住要走，最後我地走左入朗豪坊，果陣係九點到。跟住我地留左喺入面一陣，去到十點到就好似琴日咁停晒電，所有有人都消失晒。」

大隻佬：「即係「大停電」啦。」

我點點頭話：「睇嚟「大停電」應該係同步發生，無論我地分隔幾遠，都係會同步發生。啊！你繼續啦。」

四眼警察笑左笑繼續講：「當回復正常之後，啊白就決定一齊去番Starbucks果邊搵下你地。不過當我地去到附近果陣，已經見到有班西裝友守住，所以最後我地都得出結論你地死左。所以我地先至會去現時點，打算等多兩日就離開旺角。之後，三點小熊來電既SMS就SEND左嚟。」

啊樺打斷左四眼警察問：「你地個個都喺埋一齊？」

四眼警察再擰擰頭：「唔係，啊賢同Stepy去左守門口。」

我一聽到就即刻打斷四眼警察，對住啊樺話：「下！佢咁講我覺得係個MK仔先係內鬼！」





啊樺舉起隻手指，示意要我聽埋四眼警察講野，我即刻對四眼警察SA LUM話：「唔好意思，你繼續。」

四眼警察面上開始有啲唔耐煩話：「好……咁我地同步收到SMS都好好奇。啊白就話要去其他地方睇個SMS，因為驚我地現時點依個地方會暴露左出去。於是啊白就同我地去左後面街既學校到睇。」

啊樺再問：「咁有無人解到個sms內容？」

四眼警察點頭：「有，係我。無論內容定一話係短訊發送者，個密碼都係我解既。」

啊樺聽完就比左手勢叫四眼警察繼續。四眼警察：「之後，都無咩特別發生，直到五點幾，stephy就無啦啦全身爆血死。跟住到七點幾八點又嚟多次停電。」

大隻佬問：「無其他特別？」

四眼警察擰擰頭話：「無。」





我：「咁果次拎電話出嚟，除左sms無傾其他野？」

四眼警察：「無。」

啊樺問：「咁你有無開過個Apps睇？」

四眼警察：「有啊。佢彈左個大階E字比我囉。」

依一刻我地三個相視，好似已經發現左內鬼……