[劇毒]自從裝左小熊來電之後……我部電話就無響過……: 36

[3/3/2015 03:45] 

我地三個一直坐左喺間鋪頭到眼光光望天光，但係又唔敢訓。
最怕一訓，又會唔知發生咩事。
唯有靠四眼警察幫我地拎啲罐裝咖啡比我地頂住，如是者一路捱，直到三點幾。
我已經攰到頭耷耷，但係又訓唔到，對眼雖然瞪到鬼死咁大，但係完全無咩精神。
點知依個時侯，我見到Major Tom捉住MK仔走過嚟我地到。

唔小心訓住左既四眼警察比Major Tom嚇一嚇，搞到個人差啲喺張櫈到跌落嚟。
四眼警察坐番直個人帶點尷尬咁問Major Tom：「咩事啊？」





Major Tom話：「Stephen，放佢地出嚟啦。仲有我地岩岩傾過啦，係啊賢。」

MK仔即刻反駁Major Tom：「都話左唔係我囉！我唔係咩內鬼，我無出賣過你地啊！」

Major Tom「唉」左聲，擰擰頭表示自己唔太相信，睇嚟係運動姐姐佢地既決定。
四眼警察面上既表情都好複雜，但係又無辦法唔聽話，唯有開閘將我地三個放番出嚟，再換入MK仔。
我地跟住Major Tom去左第二間轉角位無落閘既鋪頭入面。

「我落番去先。」Major Tom帶完路之後就走番去個門口站崗。





一入到去，運動姐姐就對住我地笑笑口咁話：「sorry啊，我地誤會左你地。」

望住佢個樣，我只係知依一下叫賊笑，我求奇應左句嗯，就搵左個角落坐低。
大隻佬同啊樺就同我坐埋一齊，遠離佢地。

運動姐姐見到個氣氛咁尷尬：「真係好對唔住，我叫stephen鎖住左你地。」

但係我同大隻佬都只帶住敵視既眼神望住佢，唯獨啊樺一個好冷靜咁問：「點解要鎖金毛入去？」





運動姐姐見到啊樺肯答佢，都好開心咁話：「曾經我地覺得唔會有內鬼，直到你地既出現，令我地開始構思到，其實西裝佬隨時都可以假扮成我地每一位。加上stephy既死太唔尋常，再諗番之前龍友既死都好奇怪，所以我地先覺得有西裝佬融入左我地。加上兩個死者死之前都係接觸過啊賢，所以啊賢有好大機會係兇手。」

聽住運動姐姐既解釋，就算佢好強調我地我地，但係我心入面都係認為佢口中既我地，其實咪又係得佢一個。
都正如啊樺既推測，MK仔好順利成為左最大嫌疑既人。
不過我心底相信佢只係代罪羔羊，始終支持佢係內鬼既理據太少，只係得推測……

啊樺再問：「咁點解要放番我地出嚟？」

運動姐姐：「過左成晚，但係都無西裝佬過嚟。若然你地真係西裝佬，又發現你地無音訊，佢地應該會去搵你地，但係事實係咩都無發生過。所以你地唔係西裝佬。」


又係一個推論，雖然好簡單，但係係我耳中聽落同藉口有咩分別？
個原因咪又係因為你急住殺人。






望住運動姐姐個樣，就算佢目無表情，我都完全感覺到佢果種奸詐既味道。
大隻佬依舊同我一樣敵視佢，啊樺就再問：「我想問你地知唔知啊Stephy個電話係邊？」

港女OL「摺」一聲話：「我點知啊？可能同佢條屍一齊消失囉。你由入嚟開始就問問問，好煩啊！仲有你兩個咁樣係咩眼神啊？難得係啊白話放你地出嚟，仲要咁樣望住人！我事先聲明，我唔信你兩個架。」

港女OL一句說話衝向我地而嚟，搞到我地三個都收聲。

運動姐姐就好聲好氣對住咁話：「Karen，啊……ok架啦。始終都係我做錯判斷姐。」

港女OL：「我都唔明你既，比著係我實屌到佢地飛起！明明你咁幫佢地，琴日一失散，你就話要搵番佢地。又怕佢地如果無事所以先留喺依個鬼地方。點知佢地就咁樣對你。」

運動姐姐無出聲，只係笑笑口咁望住港女OL。
港女OL好大力「唉」左聲就跑左出去，得番我地四個……