[劇毒]自從裝左小熊來電之後……我部電話就無響過……: 37

[3/3/2015 06:02]

望住運動姐姐個樣，就算佢依加訓著左，我都覺得好心寒。
佢每一下笑，每一下舉動，我都好怕佢會用唔知點既方法殺左我。


究竟我會好似異形啲人咁，無啦啦爆肚而死？定一話會無啦啦人體爆炸？


究竟佢想點？




點解要放我地出嚟，但係又將MK仔困入去？
點解唔比MK仔做佢既代罪羔羊？
佢下一步係點，我真係諗唔透。


我真係唔想再同佢共處一室，所以我同啊樺單單眼問：「不如……我地去頂啊stephen更？」

啊樺好似有小小明我意思，所以點點頭，同已經番左嚟既Major Tom講：「我地去頂stephen更，佢都應該有兩晚無訓。」

Major Tom點點頭表示佢知道就繼續休息。




我細細力拍醒左就快訓著既大隻佬：「我同啊樺去問MK仔拎料，一陣你同Stephen照顧大家。」
大隻佬點點頭，就坐直番個人，去留意番其他人既一舉一動。

我同啊啊樺走出左用嚟休息既鋪頭仔，沿住走廊行番去位於轉角位果間好似牢房既鋪頭仔。
一去到已經見到四眼警察攰到不似人形，佢挨住鋪頭既牆角位訓著左。 

我地去到就拍醒左佢，我話：「我地換更啦，你番去休息下，仲有同啊強哥互相照應下。」

四眼警察笑笑口正想拒絕我地既好意，但係啊樺指指MK仔，四眼警察就會意到我地想做咩。
於是佢都乖乖地咁讓座比我地兩個，仲要交左間鋪頭既鎖匙比我地。




見到四眼警察離去，啊樺就拍拍鋪頭既透明閘門叫醒MK仔。
攰到訓著左既MK仔一聽到閘門聲就即刻起身，好激動咁話：「我唔係內鬼啊！信我啦」

我：「我信你，我信你。但係你都要做到啲野話我知先得架。」

MK仔：「你想我點啊……我真係無辜架！」

啊樺：「你部手機呢？」

MK仔：「已經比個仆街啊白收Q左啦！」

啊樺暗暗地講左句「FUCK」，再問啊賢：「咁你有無撳個入小熊來電個APPS睇？」

MK仔點點頭：「有啊！有啊！佢仲彈左3個英文字msg。」





啊樺：「你有無同其他人講過？」

MK仔再點頭話：「有啊，咪Stephy囉。」

我：「咁佢有無話你知佢收到既係咩？」

MK仔話：「有啊佢話係TTN。」

啊樺諗左諗又再問：「係大楷定細楷？」

MK仔話：「我既係細楷，佢話過佢係大楷。」

我望住啊樺細細聲咁講話：「睇嚟大細楷都有意思？」

啊樺再問MK仔：「我想知番你同攝影師去執屍既野，你地點搬個女人上嚟？」





MK仔：「我地咪……啊！！邊Q過！」
無啦啦，我見到MK仔隻手無啦啦流血，身上面仲浮現得愈嚟愈多既傷痕，我同啊樺望住MK仔流得愈嚟愈多血。
而且佢仲出唔到聲求救，而且成個人就好似突然比人挑晒手筋腳筋咁軟弱無力。
佢成個人訓左喺到，好似個斷線木偶咁，望實我地。
皮膚開始撕裂，就好似脫皮咁，血紅色既肌肉漸露眼前，成個人仲冒出白煙……
我同啊樺都唔敢再講住佢，擰轉頭，合埋眼。


點解個內鬼每次都要用咁殘忍既方法殺人？
更重要係點解將MK仔鎖左入去無耐，又要殺左佢……