[劇毒]自從裝左小熊來電之後……我部電話就無響過……: 39

[3/3/2015 08:33]

我處理完Karen之後就走番去休息既鋪頭搵啊白同Major Tom。
一入到去，我已經見到啊白同Major Tom喺鋪頭入面走嚟走去，左執右執，收拾緊行裝。

啊白見到我番入嚟就問：「你鎖好佢地啦？」

我拓拓眼鏡答：「我搞掂啦。但係你地做緊咩？」

Major Tom對住我話：「兄弟，我地唔可以再留喺到啦。太危險啦，西裝佬隨時都會殺到嚟。」





我望過去啊白到問佢：「下？但係……如果佢地唔係內鬼呢？」

啊白無出聲只係擰擰頭，依個時侯Major Tom搶先答：「我地唔可以再好似琴日咁樣等落去，證明佢地係唔係內鬼啦。最保險既方法就係我地三丁友走，等多兩日，咁就一切天光啦。」

我望住啊白仲有Major Tom，我不禁唉左聲。
原來生死關頭，真係唔應該再去諗其他人……

我企左喺度諗左諗，最後我得出結論，的而且確走係最好。
我走埋去同佢地一齊執野走。





執執下，無啦啦「喳」一聲，我知道係時侯啦，又係停電……
鋪頭入面，應該話成個商場進入左一片紛暗。
唔知幾時我可以習慣左依個場面，我懶理所有事，拎左我自己部相機出嚟，借住個screen既餘光去執野。
點知當我正想開機既時侯，我先發現原來部野已經用到無電。
所以我停左手，點知「噹」一聲，我聽到有樣好重既野跌左落地。

隨後就係啊白既慘叫聲：「啊！」

我問：「咩事？」





隱約間，我見到啊白坐左喺地下撳住隻腳：「我隻腳指啊！比唔知咩揼親！好痛啊！」

Major Tom問：「點啊！你行唔行到先？」

啊白勉強咁話：「我諗……仲得既。」

聽到啊白既語氣，我知道都佢唔係太走到。
但係Major Tom話：「一係我地去個近小小既地方？」

啊白點點頭：「我……應該ok架。」

我：「留喺到多一陣啦？」

啊白唔好意思咁講：「er……我真係得架。」





我：「Major Tom一係等多陣先走啦？」

Major Tom聳聳膊無咩表示。
過左陣，經過完一輪白光之後，一切又再正常番。
我見到啊白坐左喺地下，而佢則邊就有個載住啞鈴既膠箱。
睇嚟係執執下野，整跌左佢。
我走埋去啊白到問：「你點啊？」

啊白擰轉頭話：「我……真係ok架，我入廁所搞搞就得架啦。」
佢借身邊張櫈既力，撐起成個人。
望住佢一拐一拐咁行去廁所，我忍唔住走上前扶住佢。

依個時侯，Major Tom「唉」左聲就拎起佢部相機同腳架話：「我去番下面睇水，你地小心啦。」





如是者我送左啊白入女廁而我就喺出面等佢。
我望住隻手錶，喺門口等啊白，我一路等等等，等左好耐佢都未出嚟。

直到我聽到Major Tom大叫：「有西裝佬啊！」

啊白一聽到Major Tom咁講，就拿拿聲咁由廁所走番出嚟。
Major Tom向我地衝過嚟話：「走唔到啦！死得啦！佢地喺彌敦道兩邊過緊嚟，我地走唔到啦。」


FUCK！現時點兩個出口都喺彌敦道，則係走唔到啦……


我：「入番鋪頭，喺果到，希望避到啦！」






唉！睇嚟啊白真係講得岩……Karen又或者啊樺真係西裝友扮。
班西裝友係佢地引過嚟既！


我同Major Tom拿拿聲走番入鋪頭到，鎖實對門。
我地幾個坐左喺張枱面，希望班西裝佬搵我地唔到啦……
我將成個人瑟縮於此，望實隻錶。


十點……

十點零一……

十點零二……





十點零三……

十點……

數下數下我已經訓著左……

直到我feel到我全身愈嚟愈熱果陣，我先終於起身。
我見到身上標得愈嚟愈多冷汗，我再望望隻錶原來已經一點幾。
唔知係咪無開冷氣，點解會咁熱既……
我開始頂唔順，仲郁嚟郁去，搞到啊白同Major Tom望實我。

我問：「你地覺唔覺好熱啊？」

啊白同Major Tom就咁望住我，而我啲冷汗標得愈嚟愈多。
我已經熱到頂唔順，由張枱到走左出去，除晒身上面既衫。
但係我啲冷汗就好似開左水喉咁，愈流愈多，而且我見到我既皮膚變得紅通通咁。

我再大叫：「好熱啊！」

我依加淨係feel到全身都發咁熱咁，而且好似比火燒咁。
啊唔係！係我成個人於一瞬間著火！
FUCK！
原來我要死啦……
我成個人熱到喺地上面碌嚟碌去，但係啲火無熄過……
慢慢我已經無力再碌，就咁訓左喺地，望住啊白同Major Tom，一路望實佢地。
直到我就死果刻，我聽到「佢」奸笑左聲……