[3/3/2015 09:34] 

經過完一輪大停電之後,我地四個坐左喺間鋪頭入面對視。
我望住岩岩比四眼警察踢左入嚟既港女OL,我真係為佢感到可憐。
無論我,啊樺,定一話係港女OL,全部都成為左運動姐姐既囊中物。
我望望隻錶,九點三十四分,再望望依間賣Figure既鋪頭,我見到好多進擊的巨人既Figure。
不期然,我諗起作者對生活喺圍牆下既人所作既描述:被圈養的人
我地四個正正就係運動姐姐所圈養既人。

一直都好冷靜分析同思考既啊樺已經放棄左再去諗野。




至於大隻佬唔敢再接近我或者啊樺,只係瑟縮一角,或者佢自責緊點解自己要咁有同情心,仲要帶埋我同啊樺番嚟。
至於港女OL?佢依然係擺出副八婆樣,一時望下我地三個,一時又對住個化妝盒化下妝咁。
我懶理佢,嘗試去諗下仲有咩可以反抗,但係每次既結果都係落到運動姐姐既奸笑樣,佢既計劃點都會成功。

世估唔到依個時侯,Major Tom竟然大叫:「有西裝佬啊!」

依一刻,我知道it's time to come。
本來處之泰然既港女OL,嚇到成個粉盒都跌落地。
我望住佢咁既樣,都忍唔住笑左笑。
港女OL好嬲咁啤左我啤,我就即刻收口。





啊樺帶點悔氣咁講:「睇嚟……時間到,係運動裝既來兵。」

我「嗯」左聲就決定沉默。
大隻佬望望閘門出面,又再耷低頭自責。

至於港女OL就帶點疑惑咁問:「點解我唔明發生咩事既?」

我諷刺咁問佢:「你真唔知定假唔知?」





港女OL:「摺!講你就講啦,仲咁多嗲,無時間啦。」

我望一望啊樺,睇下佢認為應唔應該講,不過意志消沉既佢求奇揮揮手,就叫我答。

睇嚟,大家都認命,我:「我諗,到依加你應該信我地入面真係有內鬼啦?」

港女OL點點頭,表示同意。

我:「一直以來,班西裝佬都只係出現過,但係都無確確實實咁要殺我地。所以我諗一定有原因,令到只有內鬼一個人先可以令到我地死。但係佢一人難敵我地九個,所以先要一直去融入我地,去搵機會殺我地。」

港女OL「摺」一聲:「得啦,我follow到,唔洗特登停去就我,keep going。」

我嘆左口氣,繼續解釋:「ok。如今佢終於可以一次過鎖住我地,咁咪可以任佢魚肉囉。」

港女OL問:「下?咁點解唔一開始就叫班西裝佬困住我地?」





我:「因為西裝佬既數目我諗最多只有六個。以咁既數目,喺唔殺我地既情況之下去捉我地係件好難既事。所以內鬼先要一直去融入我地,直到一個位,我地既人數夠少,又或者好似依加咁。」

港女OL再問:「你點解咁肯定只有六個?」

我反問佢:「你見過同場既西裝佬有幾多個?」

港女OL數一數手指,佢就點點頭明白,佢問:「但係佢地出現親既地方……」

我:「若然有內鬼喺我地到,佢根本隨時就可以話比班西裝佬知要去邊。咁咪可以將我地既活動範圍降低。」

啊樺:「大概就係咁啦,你再諗多樣野你就知道點解啊白就係內鬼,就係我地去邊既地點。全部都係佢決定好,只有咁樣,佢就更加肯定去執去佢既計劃。」

望住鋪頭外面既人行嚟行去,我已經feel到有人喺當中監視住我地四個,又或者佢地每個都係西裝佬扮……