[劇毒]自從裝左小熊來電之後……我部電話就無響過……: 42

[3/3/2015 11:03]

望住啊樺個奸樣，我明白佢既想法，我話：「你想襯佢入嚟既時侯，捉實佢？」

「係，今次咩證據都齊，佢插翼難飛啦，係咪啊強哥？」啊樺望住大隻佬笑一笑。

大隻佬點點頭話：「無錯！難為我一開始仲揹住佢跑左咁耐路。今鋪佢實死！」

我：「話雖如此，但係你又肯定佢一定要入嚟？每次死人佢都唔喺附近，佢根本唔洗接觸我地就殺到人。」





啊樺擰擰頭話：「No，唔係咁。你諗番，佢有接觸過所有既死者。好似金毛咁，就係佢送佢入嚟之後既三四粒鐘到，金毛仔就死左。之後，仲有本身果個Major Tom，佢應該係我地大家第一日會合果時比依加既Major Tom殺死，計番時間大約係十一點半到，再加三四粒鐘，則係大概兩三點死，之後過多一個鐘正正係「大停電」，同現實係相乎。」

我再諗諗補充：「仲有龍友，我知佢點死！照理MK仔同龍友去執屍番嚟既時侯點都會有人發現，但係果陣我已經訓著左，而唯一會發現既就係同我一齊睇緊水既Major Tom！佢應該就係等佢地執屍番嚟果陣，對龍友落手。當我醒番已經六點幾七點到，之後龍友就八點幾死。咁既推論，合理啊！」

啊樺：「以我估計，Major Tom應該持有一種病毒，可能係一粒藥丸又或者係針筒之類，咁就可以神不知鬼不覺咁殺左我地。」

聽到啊樺咁講，我有一個諗法：「啊！我知啦！就好似紅Van故咁，其實我地係被人做實驗既白老鼠！西裝友之所以唔殺我地就係為左比Major Tom去試佢既病毒！一定係咁。」

但係啊樺擰擰頭：「等等，無可能。會搞到我地今日咁既原因係小熊來電，但係佢到今日所做既野都唔似係幫緊Major Tom，太矛盾啦。」





大隻佬：「咁會唔會係我地去左第二個世界？」

啊樺：「我有咁諗過，但係如果真係咁，點解小熊來電要帶我地入嚟依個世界，之後又要放番我地出去？好矛盾。太多矛盾！」

直到依一刻，我先發現一樣野，由唔知幾時開始，我地既核心由討論發生緊咩事變到去搵內鬼。
我地將最重要既事忽略左，變左去處理內鬼既問題。
點解會咁樣變晒質？
其實內鬼既野，只要我地最初頭大家拎部電話出嚟，研究下小熊來電個apps，根本就唔難得出個結果。
我忍唔住自嘲咁笑左笑。
到今日，我地足足用左三條……啊！應該話係四條人命，不停去推理，最後我地推理得出一個唔岩既內鬼。




反而個關鍵根本就……
唉……
究竟由幾時開始我地錯晒方向……

一諗到依到，我忍唔住大大力咁踢左下道閘，搞到其他人都望住我。

依個時侯，港女OL又例牌咁「摺」左下話：「點啊，你係咪好想出去啊？我有鎖匙啊。」

港女OL斯斯然咁喺佢個化妝盒到拎左抽鎖匙出嚟。

我地三個望住條鎖匙再望望佢，我終於知咩叫做博屌。

我大大聲咁話：「屌你啊！你……」

但係啊樺既刻掩住我把口話：「冷靜啊！出面有線眼，我地都係等時機啦好無？」





港女OL見我地咁嬲，就鼓起泡腮扮無辜咁話：「啦，你地唔好怪我啊。係Stephen交比我，叫我睇情況先拎出嚟。你知啦，我點知你地係咪西裝佬bo……」

見到佢咁既樣，我真係好想好想打柒佢！