[劇毒]自從裝左小熊來電之後……我部電話就無響過……: 43

[3/3/2015 12:34]

當我地四個仲喺個牢房入面等緊機會既時侯，無啦啦我地聽到四眼警察大叫：「好熱啊！」

睇嚟Major Tom真係好急，佢又唔知幾時向四眼警察落手。
依一種無聲無息既死法真係好恐怖。
你永遠都唔知道究竟佢幾時同點樣落手，又或者佢可能已經喺我地背後落左手，只係我地唔知。
就算我地開始清楚左個大局，都依然係做唔到任何野。

「出去啦！」啊樺一聲令下，我地四個就即刻開左道閘，衝左出去，都懶理究竟背後有無西裝佬。





「去果間休息室！」大隻佬企喺我地最頭，怒氣沖沖咁帶住我地奔向休息室。

大隻佬「砰」一聲就推開對門，大大聲咁話：「Major Tom！你同我出嚟！」

但係房入面除左有好濃烈既焦臭味，同一具已經燒焦左既屍體之外，仲有兩個一模一樣既運動姐姐。

佢地互相指住大家話：「佢先係假既！」

我地三個當然唔知點算，唯有望去啊樺到，不過當然佢第一個反應係嘔。




至於本來已經帶住一身怒氣既大隻佬就即刻比成個情況搞到好迷惑……
佢完全唔知點算好，成個人企左喺到。
至於港女OL就去左關好對門，以防後面有西裝佬會殺到嚟。

一切都意味住我要去決定誰是誰非，我向兩個運動姐姐問：「你地部電話呢？」

企我左手邊既運動姐姐拎左個錫紙包既手機出嚟，而右手邊既運動姐姐都拎左個錫紙包既手機。

左手邊既運動姐姐瞪大對眼指住右手邊既話：「點解！你都會有架！」





右手邊既就指番左手邊：「你先係假架，我肯定佢拎左求其一個既手機扮！」

左手邊就話右手邊：「你咪扮野啦！明明就係你扮我！佢先係Major Tom啊！」

左手邊：「你先係……」

聽到佢兩個咁嘈，搞到我心都煩，我打斷左佢兩個話：「你地打開張錫紙啦。」

佢地即刻收聲，同時打開，都係一色一樣既三叔NOTE 3。

右手邊見到左手邊拎左一色一樣既手機，即刻眼都突埋，佢話：「點解你會有架！信我啊麟！」

左手邊：「你先係假啊！你真係要信我啊！」

望住佢兩個咁既情況，我即刻無晒計仔。




竟然可以扮到咁，我只可以話Major Tom太強大。
依個時侯，我諗到一樣野：「你地收到小熊來電果個密碼係咩！」

左手邊話：「GPVS EBZT UP GSFF」

右手邊話：「ORN」
 
大隻佬一聽到個答案就第一時間衝上去捉住左手邊既假運動姐姐。
但係假既運動姐姐比起大隻佬快一步，走左去真身到，捉住運動姐姐。
假既運動姐姐亮起一把警槍，指住運動姐姐個頭話：「啊強，你唔好迫我啊。」

望住咁既情況變化，一切都好公式既TBB劇情。
假既運動姐姐全身液化，現出佢既真身：西裝佬！
Major Tom同西裝佬一樣，一身黑西裝，再加個電單車頭盔。
佢掉左個手銬去大隻佬面前，話：「啊強，帶左佢。快啲啊！」





大隻佬：「點解你要咁做？你係咩人？」

Major Tom：「你都痴線既，做戲咩？你問我就要答？咪咁煩帶左佢。」

我話：「強哥，唔好啊。佢一日唔可以殺咁多人，而且唔會用槍殺佢架。」

Major Tom笑左笑話：「唉，你信我，我做咁多都係幫你地喳。」

我：「下？幫？唔好講笑啦！」

Major Tom：「我地喺嚟幫你地架，唔好信小熊來電啊！」

我：「你已經呃得我地好多次啦。」





「砰！」一聲，Major Tom對運動姐姐隻腳開左槍：「唉，我講啦！我殺你地都係為左令你地番去原本既世界喳！」

我：「咁點解你要將我地殺得咁殘忍？」

Major Tom：「因為依個就係個世界既rule，你要番去原本既世界就一定要咁！」

我聽住佢講既野，開始帶點疑惑，加小小動搖。
若然沒經過內鬼既事，我應該真係會信Major Tom。
但係我始終好懷疑佢講既野……

大隻佬：「咁我可唔可以唔帶……」

Major Tom用把槍指住運動姐姐個頭好激動咁講：「唔得，我唔信你地！快啲！如果唔係我就真係殺左佢，到時佢就真係死架啦！」

大隻佬舉手表示投降，如Major Tom所願帶上手銬。




Major Tom捉住運動姐姐一步一步退後到門口，之後就一腳將運動姐姐踢向我地到。

Major Tom即刻鎖實對門，將我地困左喺入面話：「你地唔好亂嚟，我地既線眼永遠都喺到監視住你地。」

佢一講完就途途離開我地既視線範圍……