[劇毒]自從裝左小熊來電之後……我部電話就無響過……: 48
[4/3/2015 02:44]
一踏正十二點，就進入左「大停電」感覺上比起之前「大停電」既維持時間又長左。
曾經我覺得只係自己既錯覺，但係愈著個差距愈嚟愈明顯，我就發現「大停電」既維持時間的確長左。
或者我地已經習慣左，不論我，運動姐姐，大隻佬定一話係港女OL，無人會再尖叫驚奇。
我只可以話人真係一種好易適應既生物，環境一變，唔洗好耐就習慣。
經過一輪傷心同憂愁，我地總算可以平復心情。
躺左喺地既大隻佬兩肩都膊上綁帶，雖然Major Tom果兩槍無打穿骨，但係都傷左肌肉，令到佢兩隻手活動都唔方便，暫時由運動姐姐去照顧佢，餵下佢食野。
而港女OL就喺七仔入面走嚟走去，左拎一包右拎一包，拎到成手零食慢慢。
至於我？無聊到同企左喺七仔個個Counter姐姐傾計，又或者叫做單方面呻。
「你叫咩名啊？」企counter個姐姐當然無理我，我望望佢個名牌，上面寫住happy。
「哦，你叫happy啊？我女朋友都係啊。」七仔姐姐繼續無視我。
「你唔應我，我當你應左架啦，嘿嘿。」我苦苦咁笑左笑，但係好快眼淚又再湧現。
「Happy，我好掛住你啊……你知唔知啊……你知唔知啊？」我捉實左七仔姐姐件衫不停喊。
「我依幾日已經走到好攰……好辛苦啦……點解個天要咁玩我啊？我只係想簡簡單單快啲畢業……之後搵工儲錢同你結婚姐……點解偏偏依個時侯……依個時侯先發生啲咁既野啊？」
我發現當啊樺一唔喺度，我個腦就開始停左唔再諗咁多野。
依個時侯，我個腦開始比Happy佔據，同佢好多好多既回憶，全部都一次過湧現。
果一種牽掛真係好痛苦，好痛。
失去佢真係好痛苦既事……
一諗到同佢既野，再諗下依加我就更加驚。
望住前路我真係睇唔清，兩日之後我係咪就會自由，番去原來既世界？定一話要比Major Tom殺我先會番去呢？
我愈諗愈灰，唯有捉住不為所動既七仔姐姐飲泣。
我真係好希望依個只係個夢啊！！
「喂，拎去用啦。」運動姐姐拍拍我膊頭喺counter到拎左包紙巾比我。
「嗯……」我接過紙巾抹走面上既眼淚。
「你ok就過嚟啦。」運動姐姐拍多拍我膊頭就走番去大隻佬果邊。
「嗯……」
我抹乾眼淚整理好自己就行左過去同大隻佬佢地三個，圍圈盆腿而坐。
「好啦，啊樺走左，剩低我地四個。或者我地應該再好好討論之後既去向。」運動姐姐嘆左口氣。
面色唔多好既大隻佬問：「去荃灣？」
運動姐姐面上帶點不安：「依個就係問題。Major Tom都知我地會去荃灣，都意味住係危險既。而且追索番去荃灣既原因基於我地推測西裝佬一早守住左我地既屋企既區域，唯獨是荃灣無人住。所以個問題就在於西裝佬既身份。」
我：「嗯，無錯。本來只有小熊來電同Major Tom兩個勢力，依加仲多左個不明既西裝佬。根據番今日睇，西裝佬應該係同Major Tom對立，如果唔係Major Tom大可以叫班西裝佬幫手睇住我地。但係啊樺佢拆穿左Major Tom既西洋鏡。」
大隻佬問：「咁果啲西裝佬係咩人？」
港女OL帶點鄙視既眼光望住大隻佬話：「摺，你咁蠢架。咪就係佢幫啲途人帶左頭盔同著西裝再呃我地。」
雖然港女OL講野幾衰格，但係大隻佬已經聽慣左，「哦」左聲就算。
運動姐姐：「而且仲有一點係Major Tom同西裝佬一樣都可以學佢地咁偽裝成其他人。」
我：「所以感覺上西裝佬同Major Tom應該係同一種人。唯獨是點解佢地又好似對立既關係。」
大隻佬：「仲有西裝佬同我地應該都係對立，因為佢地之前都會攻擊你同啊樺。」
運動姐姐：「照咁計，小熊來電同西裝佬都應該係對立，小熊來電應該係，又或者我地信係幫我地既。咁即係意味住西裝佬係第三勢力。」
我：「嗯，照咁睇就係。Major Tom，西裝佬，小熊來電。我諗若然企得係度，都表示我地無得揀，係小熊來電果邊。」
港女OL突然好霸氣咁SHOW左四支藍色液體出出嚟話：「咁又唔係BO！」
雖然港女OL一直都好黑人憎，但係依加我都為佢鼓掌：「掂啊！」
港女OL帶點囂張咁話：「當然啦，Karen姐幾時做野衰過？」
運動姐姐見到果四支藍色液體：「咁我地都係去荃灣啦。如果小熊來電真係信唔過，起碼我地都可以搵番Major Tom。我諗要起行就襯依加。」
港女OL：「摺，點解唔求奇搵架車咪得囉！」
運動姐姐：「你應該知道一同我地接觸既野，好多都會同我地一樣變到透明架啦。萬一架車都變左透明，你諗下會點？」
我代替港女OL答：「boom！好似碰碰車咁比人撞囉。」
運動姐姐點點頭：「嗯，所以我地依加起行去既話，起碼無日頭咁多車啊。」
運動姐姐望望大隻佬問：「但係你隻手點啊？」
大隻佬苦笑下話：「應該仲控制到架單車既放心！」
運動姐姐：「好啦，今次我諗大家都無得揀。Major Tom雖然危險，但係佢得一個人，但係西裝佬咁多人，仲留喺旺角太唔掂。執執野，一陣三點起行啦好無？」
大家點點頭，我地就各自執野，準備離開……