[劇毒]自從裝左小熊來電之後……我部電話就無響過……: 49

[4/3/2015 03:33]

當我地喺七仔入面執野既時侯，我突然醒起一條問題。

「依加成三點，我地就算搵到單車鋪都唔會開，點拎單車啊？」我問運動姐姐。

但係運動姐姐笑左笑就喺佢個褲袋到拎左條鎖匙出嚟：「我有鎖匙咪得囉！」

我同仲訓喺地既大隻佬都 「下？」左聲，運動姐姐話：「其實……我個賤格ex近排開左間單車鋪，所以，嘿。」





聽到運動姐姐依一下「嘿」我不禁覺得心寒，真係寧得罪小人，莫得罪女人。

拎住左包卡樂B咬既港女OL忍唔住加把嘴：「岩架啦，依啲Hi Hi，唔洗同佢客氣，一於偷完單車再燒佢鋪頭！」

聽埋港女OL依句就更加體驗咩叫香港人，自己Hi Hi唔夠開心，係要人地一齊Hi Hi先得。
我同大隻佬唯有相視而笑。
運動姐姐走左去員工休息室到，撳左幾個制就入左去「借」走左當更果兩位員工既背囊。

我望住佢無言而對：「你……」





運動姐姐：「我放低晒我成個銀包啲錢架。」

港女OL：「反正Major Tom都話過依個世界唔係我地本來既世界。」

聽到港女OL咁講，又係既，不過都好過意唔去，話晒人地都係拎嚟番工既。
不過唔拎都拎左，所以我都無謂多講，反正做既又唔係我。

運動姐姐將七仔有既急救用品，乾糧同水都分別放左入果兩個gregory袋到。
一個佢自己揹，而另一個唔洗講實係我，因為你都知交比港女OL又要頂佢啲「摺」「摺」聲。





經過一輪準備，岩岩好三點，我地四個就企左喺七仔門口準備離開。
我地既七仔正正位於東方街同碧街交界既轉角位，只要出門口再擰轉頭，就可以見到油麻地地鐵站既出口，不出所料已經有兩個西裝佬企左喺到守住左。

我指指果邊既方向同運動姐姐：「果邊唔行得有西裝佬。」

運動姐姐點點頭話：「唔緊要，我有路行。」

運動姐姐行頭，而我就扶住大隻佬，至於港女OL就包尾。
我地由東方街行左出窩打老道，沿住窩打老道行到去廣華醫院，再轉番入登打士街。
因為夜深，根本咩人都無，就連西裝佬都唔多見。
就喺登打士街同廣華街既交界，個街頭第一間鋪頭就係運動姐姐講既單車鋪。
運動姐姐拎出條鎖匙，打開道鐵閘，帶左我地入左去。

我地各自搵左架BMX出嚟，因為我比較膽心大隻佬所以我同佢一早拎左各自架BMX出馬路試踩。





我問佢：「你踩唔踩到架？」

大隻佬比一比個OK手勢，就上車，兩腳一蹬，就開始喺馬路上踩嚟踩去。
而我同我既愛車，企左喺馬路則邊睇住佢。
見佢踩完一輪都總算控制到，大致上都算穩定，只係唔轉得太大既彎。

依個時侯，運動姐姐走左出嚟拍拍我膊頭：「睇嚟去荃灣應該無問題，你睇下佢地無派人去搵依間鋪頭，應該表示佢地唔知我同EX既關係。」

我點點頭，都開始放心荃灣依個決定。

「砰砰砰砰~」點知無啦啦單車鋪入面傳出好大既碰撞聲，嚇到仲試緊車既大隻佬炒車。
而我同運動姐姐都唔敢郁，望住個門口。
直到幾秒之後，有隻腳踏出個門口，係港女OL。
佢企喺門口對住我地奸笑話：「嘿嘿，啊白，我幫你報左仇啦。」





聽到港女OL咁講，我都唔知好嬲定好笑。

運動姐姐：「快啲出嚟啦，唔好再玩啦，無時間，要起程架啦。」

如是者我地既車隊組成，由運動姐姐帶頭，我行最尾，港女OL同大隻佬行中間。
運動姐姐帶我地踩出馬路，由廣華街，踩出染布房街，之後去到亞皆老街。
點知依個時侯，我地同守喺旺角東出口既西裝佬碰面！
佢地個個都持武士刀，由對面馬路衝過嚟。
運動姐姐就開始帶住我地，由亞皆老街直爆出彌敦道。

但係你萬萬都估唔到班西裝佬好似唔會攰咁。
佢地雖然跑速唔及我地踩得快，但係勝在夠穩定，就好似受訓過既特種部隊咁。
我地雖然未快到搞到佢地見唔到我地既車尾燈，但係都已經差左一個街口。

運動姐姐帶我地轉左入彌敦道，就喺依個時侯，大隻佬炒低左。




佢喺依個彎位炒低左。
大隻佬對住我地叫：「唔好理我啦！你地走啦！」

運動姐姐同我都停低左，而大隻佬就不停叫：「走啊！」

西裝佬都已經趕到，佢地就好似江湖仇殺片咁，圍住大隻佬斬。

每當佢比西裝佬插一刀就大叫一聲：「啊！走啊！」

依個時侯我知道要走。
我擰頭唔再睇，踩上腳踏，向前踩。
但係我就算踩到好遠，都彷彿聽到大隻佬既咆哮。
佢每一下「啊！」我都仲好記得，聽得好清楚……