[劇毒]自從裝左小熊來電之後……我部電話就無響過……: 52

[4/3/2015 08:32]

「你睇下出面，好大霧啊。」我指一指窗外面既景況。
基本上就大霧到唔正常，就連對面馬路都見唔到，能見度好低。
而且街上面開始愈嚟愈少人，感覺上好似就快有大事發生咁……

當然察覺到既唔止我，運動姐姐第一個反應：「睇定啲先啦。」

至於港女OL就扮晒振定咁去個Counter到拎野食。





我望住運動姐姐：「依加點算？」

運動姐姐：「唉，我都唔知咩事，但係睇怕都走唔到，能見度低成咁。」

港女OL執左幾個早晨全餐番嚟比我地話：「我執多左，食野先啦。」

望住佢既舉動，我第一次覺得佢係有用。
港女OL依一下舉動比左一個藉口我同運動姐姐去逃避現況。
我地三個決定暫時無視現況，進入沉默，去享用依個早餐。
但係我睇得出我地三個無一個人真係有心情去食。




港女OL自從將包鹽同黑椒撈埋左一齊之後就係咁攪嚟攪去，都無郁個啲野食。
至於運動姐姐，佢就心不在焉咁切塊豬柳扒，切到塊野爛晒，都無放入口。
望住佢，我睇得出佢係到扮冷靜，佢嘗試去學啊樺去帶領我地。
不過我知道，運動姐姐始終都唔係啊樺。
一諗到依到，我不期然咁對住塊薯餅「唉」左聲……

運動姐姐見我咁，先回過神，叉起塊豬柳扒對住我同港女OL講：「我地要搵定後路。」

我問：「點搵？」





運動姐姐望住窗外面：「我地要有定下一個逃走既地方，咁大霧既話，西裝佬都唔知會唔會出現。」

我：「但係荃灣……」

運動姐姐：「唔可以再咁諗，我相信突然間咁大霧，絕對唔會係偶然，可能係西裝佬發現左我地身處既位置，又或者係Major Tom，再唔係就小熊來電……」

聽住運動姐姐開始亂咁分析，我知道佢壓力爆煲。
佢愈嚟愈語無倫次，睇怕得番我自己幫到自己。
運動姐姐好似傻婆咁望住窗外面不停口噏噏，我拍拍佢膊頭，佢先清醒番望住我。

我對佢笑笑口講：「你都攰啦，休息下啦。我地等啲霧散左再走，好無？」

運動姐姐開始喊出嚟：「嗚嗚嗚……我好辛苦啊……我做唔到啊樺咁西利啊……嗚嗚嗚……我唔知點做好啊……嗚嗚嗚……」

港女OL望見運動姐姐咁樣樣，唔忍心攬住佢話：「啊白，你做得好好架啦。」





我：「Karen，你帶啊白入去廁所啦，我睇住個場啦。」

港女OL比左個ok既手勢就帶運動姐姐入左廁所。
而成張枱就得番我一個，我望住果四支藍色既液體，我伸手拎起左支……