[劇毒]自從裝左小熊來電之後……我部電話就無響過……: 53

[4/3/2015 09:07] 

西裝佬究竟係咩？
Major Tom呢？
小熊來電呢？
我拎起支藍色液體左睇右睇，我望唔透。
我就連邊個係幫我地既都唔知。
點解要去到聽日先會有真相？
點解無啦啦會咁大霧？





有大量既問題一次過衝擊我既腦袋，將我既思緒搞到好混亂。

不如直接將支野飲左佢啦好嗎？
我唔想再思考，好攰啦……
唔得，唔可以就咁就算既，要搞清楚！

假如小熊來電真係幫我地既，則係Major Tom同西裝佬都係敵對既。
咁既推理好合理啊，無論係Major Tom定一話西裝佬，兩邊都想殺左我地，但係點解又好似有唔同咁……

岩岩同運動姐姐去完廁所既港女OL走出嚟問：「喂，你做咩啊？」





我拎住支毒藥舉起手話：「下……無啊，唔係啊。」

佢兩個見到我咁既反應都不期然感到懷疑：「你係Major Tom既線眼？」

我：「唔係啊。」

運動姐姐：「咁點解你會拎住支野，你係咪想毒死我地？」

我好大反應咁擰頭fing手話：「唔係啊，唔係啊。唔好誤會，要殺你地既話我一早落左手……咦？」





運動姐姐問：「做咩啊？」

我：「我諗到啲野，係西裝佬同Major Tom既分別。」

運動姐姐：「下？」

我：「等等先，你地諗下到今日為止，雖然Major Tom同西裝佬都好似要殺左我地咁，但係佢地之間有個好大既分別？」

運動姐姐：「哦！你指佢地對於殺我地既意慾。」

港女OL：「你既意思係，由一開始，Major Tom已經好主動去接近我地，但係西裝佬就好似無咩野咁。」

我點點頭：「就係咁，但係點解會咁呢？」





運動姐姐：「除非班西裝佬唔急去殺我地？至於背後個原因會唔會同FOUR DAYS TO FREE既SMS有關？又或者佢地由頭到尾就知道我地過埋聽日就會free既消息？」

港女OL捲曬利講：「Hey come on，it doesn't make sense」

我：「除非我地一開始既假設有錯，就係佢地根本就唔係要殺我地。」

港女OL：「Oh my god，你係唔係失憶啊，你又話佢地之前襲擊過你地？But i pretty sure that 佢地係追住我地斬既。」

運動姐姐：「唔係，唔一定係我地，可以係Major Tom。」

我：「但係……Karen又講得岩啊，佢有襲擊我地架。」

運動姐姐：「如果佢地分唔清我地同Major Tom呢？」

我話：「有咩……可能？係既……Major Tom同我地又有咩分別？」





運動姐姐笑左笑反問番我：「係呢，有咩分別呢？」

港女OL：「摺，快啲講啦。」

運動姐姐指指我個袋：「係電話，我地既電話收到小熊來電既sms，但係Major Tom唔得，應該話佢根本就無電話。」

比運動姐姐點一點，我即刻諗到樣野：「Back to basic！Don't Trust Anyone 除 people receive message！」

港女OL：「Oh! Fucking bitch！唔怪得佢一開始就話要我地掉低啲電話喺間書局到啦！」

運動姐姐：「照咁睇，小熊來電同西裝佬先係同一陣線？但係又點解釋佢地有人守喺地鐵站，仲有啊賢做野既地方。」

我唔肯定咁話：「我估……佢地主要既目的係要確保我地捱到去聽日？」





港女OL：「小熊來電真係好蠢啊，點解唔一早就SMS我地？」

運動姐姐：「因為小熊來電都唔知我地發生緊咩事。」

我：「我地開番個電話，啲錫紙block左訊號，所以先會咁。」

運動姐姐：「咁我地點知個假設係真唔係？」

我：「唯有等霧散左之後再試啦……」