[劇毒]自從裝左小熊來電之後……我部電話就無響過……: 55

[4/3/2015 21:44] 

去到差唔多十點鐘，但係外面既霧氣依然未散，睇怕最壞既打算要發生啦。
我對住運動姐姐同港女OL點點頭，就開始去執我地既行裝。
運動姐姐求其搵左幾支水交比我，但係我都見到佢面上既膽心。
假如我既推斷錯誤，我地就全部人都會死於西裝佬既武士刀之下，就好似大隻佬咁……
一諗起大隻佬，同埋佢既死法，我嘆左有史以嚟最大既一口氣。
佢既死有兩種可能：
一，西裝佬根本就唔係幫我地，依個結果對我地而言係絕望。
二，就係因為比Major Tom呃，令我地唔敢拎電話出嚟，所以大隻佬先比人點錯相，依種死法對佢嚟講係最無辜。





諗諗下，為左以防萬一我決定要做番小小保護設備。
我自己一個跑左去七仔掃走左n本雜誌，效法某喪屍片入面咁，用膠紙將幾本雜誌包住自己既前臂，腹部，背部，同小腿。
運動姐姐同港女OL見到我咁，都有樣學樣，包實自己。
我再喺萬寧入面拎走左個掃把同埋垃圾筒蓋，盡可能就武裝化自己。
而運動姐姐就喺保安果到搵左幾支電筒交比我同港女OL
搞完一大輪野，已經去到十點三到，我地點都要出發。


我地三個企左喺門口望住出面，依舊一片迷霧，加上黑媽媽咁，只能夠依稀見到有小小既街燈由迷霧中穿透而來。




我開左運動姐姐交比我地既電筒，照住前路，沿住如心廣場既外圍行。
先經過左第一個停車場出入口，再經過埋第二個停車場出入口，都總算順利渡過。
但係都意味住，我地已經好接近西鐵站……

我地行到去如心廣場同荃灣公園既交界，我停低喺到，對佢地講：「拎晒所有電話出嚟，仲有Major Tom果幾支野。」

運動姐姐同港女OL點點頭就如我指示所做，將我地有既五部電話同Major Tom果四支毒藥交左比我。

「一陣有咩三長兩短，拆開晒啲電話既錫紙，再求其掉去任何一個方向。佢地咩都見唔到，唯有靠我地電話訊號搵我地。之後就……各顧各顧啦。」我講完之後就將所有野分晒比佢地，我自己就拎左個電話同毒藥就算。





佢地聽完我咁講之後就更加驚，的而且確，只要一陣我地真係被迫要逃走，就無辦法再一齊行。
加上咁重迷霧，都意味住一定會失散……
所以今次有可能係大家最後一次見面。

運動姐姐對我苦笑：「靠你啦。」

港女OL用佢既假abc tone：「thanks brother。」

我對大家苦笑一下，就拆開電話既錫紙，一步一步行近西鐵站。

「踏」

「踏」

「踏」





「踏」

當我地一行近西鐵站入口，我見到無西裝佬……
我望望佢地，佢地都只係聳聳肩。


唔死都死到依到，入去啦！


我吸左一大啖氣就帶住佢兩個落左去。
因為大霧既關係，站入面基本上就無人。
雖然依到電力正常，但係就顯得更加詭秘。
我同佢地踏電梯落去，依個時侯我地正正見到已經有兩個西裝佬守喺下面，但係佢地無意慾上前去殺我地，就一直望住電梯口。





我：「睇嚟，個方法係work！」

見到咁，我地髮左一口氣，睇嚟係太大霧所以西裝佬先入番西鐵站姐。
我地急步走落去西鐵站，就喺閘口，我地見番佢……
係大隻佬！