[劇毒]自從裝左小熊來電之後……我部電話就無響過……: 57

就喺十日之後，我走番去探啊樺，大隻佬佢地。
但係佢地已經唔認得我，我真係估唔到個結果會係咁……
不論Major Tom定一話係小熊來電，我只可以話某程度上，佢地都無講大話。
一切既結果，睇你點睇……
唉……


[5/3/2015 00:23]

最後，剩低我同港女OL喺元朗站落車，而且最奇怪係當我地一落車，站入面竟然有好多人要上車，不論係往屯門方向又好，往紅磡方向既車都好，兩邊都出奇地多人上車。





唔係好大霧架咩？

我喺個站入面望嚟望去，我發現左一個熟悉既身影，係Happy！
Happy上左對面往紅磡方向既西鐵！

「Happy！」我對住Happy大叫，佢竟然對住我揮手講拜拜。

「Happy！」我正想衝過對面既西鐵，但係港女OL拉住我隻手。





港女OL指指電梯果邊，有兩個持刀既西裝佬正向我地衝過嚟。
我即刻拎番運動姐姐交比我既電話出嚟，即刻拆開錫紙。
點知佢地無停低，繼續向我地衝過嚟。

「無理由嫁……頂！Karen你拎住部電話。我地去B仔等。唔識就GOOGLE MAP啦！」我交左部電話比港女OL之後，就即刻向另一邊樓梯衝落去。

果然西裝佬變左追住我斬，無視左港女OL既存在。


頂！失策！我地得一部電話！




只可以保到一個，保唔到另一個！


港女OL雖然未了解到咩事，不過佢都急步咁樣衝左落去。

我一路衝落樓梯，點知又有多兩個西裝佬追過嚟。
於是乎，我跨過欄柵，跳出閘外，向住新元朗中心跑出去。
我跑出左新元朗中心，沿住天橋去到雞地果邊，我運用住左元朗廿年既經驗，總算避開左啲西裝佬既耳目，走到去B仔。
我望望隻手錶一點二十三分，但係港女OL未到。
於是乎我走入去B仔打算偷下野食，但係當我入去既時侯，我發現左一樣野。
我望番五日前我同Happy坐過既果一枱，我發現係佢地！
我認得佢地，我好記得當我番嚟拎番電話果陣，就係佢地坐左喺到唔理我！


莫非……






我忽然有種想法，等埋港女OL嚟到果陣，我帶佢行上番去我屋企。
但係有少少唔同，我地停左喺間教會前面，等等。
港女OL問我：「做咩啊？」

我望住隻錶同港女OL：「唔好嘈，等啦。」

直到02:14既時侯，有對情侶打打罵罵既情侶停左喺教會前面。

「頂你啊！」
「咩啊？」
「啊通點wo！分手啦！」

佢地開始嘈交，而且啲對白同當日一模一樣。




我笑左笑，但係港女OL依然唔明。

於是乎我再帶佢去下一個地方，係個臭河既十字路口。

我地停低左喺到指指左手邊條路話：「望住隻錶，去到02:37既時侯，就會有班飛仔車隊踩住單車出嚟。UM……仲要播住伊健既極速傅說。」

港女OL帶住半信半疑既態度望住我：「REALLY？」

果然，一到02:37就有幾個MK仔踩住單車，播住極速傅說咁飛出嚟。
港女OL見到即刻掩住個口話：「oh my Jesus Christ！How Come？點解你會知嫁？」

我：「我諗我有少少理解我地去左個咩世界……」

我帶港女OL上我屋企入左我間房，我：「你休息陣先，我一陣再比你睇啲野。」
港女OL「嗯」左聲就訓左喺我張床到。




望住佢，再望望部電話我不禁唉左聲。
原來個真相係咁……

直到03:34我見醒左港女OL，帶佢出左我間房：「你望實我間房門。」

港女OL就眼甘甘咁望住對門，直到03:53，我啊媽由佢間房行出嚟。
佢走左去我間房前，打開道門：「啊仔，你早啲訓啦。」

依個時侯，我好肯定我所估既野。
而港女OL就好驚奇咁話：「佢地……係機械人？」

我擰擰頭：「唔係，係Program，佢地set左timer，一到特定既時間就會做特定既野。」

港女OL：「即係我地入左個電腦世界？」





我點點頭：「我諗係啦……」

小熊來電……原來個真相就係咁……