[劇毒]自從裝左小熊來電之後……我部電話就無響過……: 58

[5/3/2015 4:23]

忽然之間，「大停電」又嚟啦，但係我已經唔再怕，或者我已經知道成個世界既真相。
我同港女OL坐左喺我張床到等，我從黑暗中再望望自己隻手。
我彷彿見到有堆瑩光綠色既101010數字組成我隻手。
我忍唔住笑左笑，點解會發生咁既事……

「大停電」一完，港女OL就望住我問：「即係我地變左做DATA？」

我：「我估係，應該自從裝左小熊來電之後，我地就進入左依個世界。而所有人都只係Program，佢地只會跟佢地本身set好既指示做野。」





港女OL：「just like the sim city？」

我：「嗯，佢地全部都係NPC，除左我地十個人。我諗小熊來電係隻GAME，比我地喺依個模擬既世界到玩。」

港女OL：「Is it really a game? 咁點解小熊來電要將我地困入嚟再放番出去？」

我：「我諗係Major Tom，佢係一隻virus，目的係要消除我地。佢將我地同npc既互動都cut晒，所以小熊來電先要free番我地出去。」

港女OL：「That's why 其他人見我地唔到，就係因為有virus入侵？」





我：「係，咁都解釋到點解啊賢同龍友果日執完屍之後，點解果個女人唔見左。因為佢都只係program，就好似打機咁，當個npc比玩家推得太遠，佢就會自動消失，走番original既位置。」

港女OL：「則係話西裝佬係小熊來電用嚟驅逐virus既保護程式。」

我：「應該就係咁，都因為有咁既程式存在，所以Major tom先要約晒我地出嚟，佢唔單止要一次過殺晒我地，仲要令我地以為西裝佬係壞人，等我地可以幫佢一齊去對付西裝佬。同時，佢都利用西裝佬既盲點去限制我地既行動。」

港女OL：「That's why佢要我地收埋電話，就係為左要喺我地之間隱藏自己。Oh my god he is fucking genius！」

我拎起Major Tom果支毒藥，我知道佢就係VIRUS，只要一打入去，我地應該會比Major Tom帶左去邊。




又或者我地既肉身就同我地一樣咁死去……
我唔知，但係我清楚Major Tom絕對唔可信。

港女OL：「咁我地點？」

我：「等啦，等夠鐘，我諗小熊來電應該幫緊我地搵方法走。你訓喺到啦，我出廳做廳長啦。」

「OK，FINE。」港女OL一講完就喺我張訓上面訓著左……

我訓左喺廳張梳化上面，望住部電話。
所有野都係虛擬既……
但係一切都嚟得好真實……
究竟我既肉身做緊咩呢？
訓左喺張床到？
定一話係喺個實驗室入面？




諗諗下，我醒起一個哲學既問題桶中之腦。
佢係話：
如果有個痴線科學家將我地個腦抽左出嚟放左喺個缸入面，再博晒所有野去我地個腦既神經線到，等我地以為仲生存緊，咁我地點去分辦我地係真係存在？定一話只係得個腦？

望住部電話，我醒起一樣野，我彈番起身拉埋港女OL起身，同佢講：「走！Major Tom佢會接收到我地電話既訊號，所以佢先估到我地喺荃灣！走！」

訓左無幾耐既港女OL睡眼惺忪咁望住我：「下……但係依加先……五點幾。」

「走啊！」我拉住港女OL走出去，但係依個時侯，我聽到有人開左樓下道大閘……