[劇毒]自從裝左小熊來電之後……我部電話就無響過……: 59
[5/3/2015 5:34]
估唔到就喺依個時侯，Major Tom已經入到嚟我屋企。
Major Tom大叫：「唔洗走啦，我係嚟幫你地架！」
我即刻鎖住由樓梯走入大廳道門，Major Tom隔住道門：「無用架！」
我：「我已經知道你既身份啦！唔洗多講！你就係電腦病毒！係你hack左入小熊來電製造既電腦世界！」
Major Tom笑左笑話：「哈，我唔可以講太多比你知。總之你信我，我係幫你地既。」
我隔住道門，對住Major Tom話：「我唔會信你架！」
「咁唔好意思啦！」Major Tom一講完，我眼前道門於一瞬間消失，搞到我成個人掉左入Major Tom既懷抱之中。
Major Tom奸笑左一下，就喺佢口袋入面抽左支毒藥出嚟：「辛苦你啦。」
依個時侯，港女OL拎起左個風扇一野扑落去Major Tom到，搞到Major Tom成個人跌左落樓梯，頭破血流，仲斷左幾條骨咁。
但係佢就好似機械人咁，照撐起自己，向我地一步步走近。
「走啦！」港女OL扶番我起身，同我一齊上左露台。
但係望住空無一物毫無退路既露台，我忍唔住大罵道：「頂！點走啊！仲要頂到幾時啊！」
我同港女OL做出最後既掙扎，不過估唔到都係難逃Major Tom既魔掌。
一身傷既Major Tom已經走到上嚟，將我同港女OL迫近露台，而佢口中就不停重覆：「信我，我係幫你地架……」
我同港女OL一直退化直到再無退路，依個時侯小熊來電SEND左個SMS嚟：
[red]FREE NOW[/red]
於一瞬間，我成個人失去知覺，眼前一片白光……
眼前盡是一片黑暗……
我隱約聽到有人喺我耳邊話：「KEEP住塊晶片！」
我就喺黑暗之中經過漫長既等待，我無嘗試去數，但係感覺就係好耐好耐咁……
係死？
我唔知……
我淨係知道我成個人唔郁得，被人固定左，鎖住左，就好似桶中之腦咁……
忽然之間白光再臨，有大量片段湧現於我腦中。
我認得一部份係我既記憶，但係有七成都係我既，但係又唔係我……
點形容呢，應該話果個我同我係一樣樣，但係就經歷同成長都唔同。
係平行世界？
我唔知……
當我開始有番四肢知覺既時侯，我感覺成個人訓左喺地，而且有啲暖暖地既液體由我鼻流出，而鼻腔入面充滿住血腥既味道，我應該係流鼻血。
但係我眼前一片黑暗，而且個頭仲重重地，應該帶住左唔知咩咁。
我提手將頭頂舊野除低，我見到既就係一大片灰色既天空？啊，應該係天花板。
我發現頭頂好依都流緊血咁，我伸手一摸，先發現唔知幾時我既頭髮唔見晒，仲多左塊冷冰冰既野。
我將果塊野拎左出嚟，再望，係一塊染血既晶片？
一塊同NANO SIM卡一樣咁大既晶片。
而我右手都握住左塊差唔多大細既晶片。
我醒起有人叫我keep住塊晶片，所以我將兩塊野都一次過收入褲袋。
但係依個時侯我發現唔知幾時我成身都換左套白色既T-shirt同褲。
T-shirt上面寫住：yz329845690324
係一串好長既編號。
我再望望周圍，我見到有九個同我一樣剃光頭，著住全白套裝既人訓左喺地。
啊！唔止九個，係成個地方都有好多咁既人行嚟行去搬運貨物。
但係最奇怪既係，佢地就好似機械人咁，步伏一致向前行。
我企番起身再望下周圍，我只可以用工廠去形容依到，而且係一間大到望唔晒既工廠。
啲人就喺入面來回搬運貨物……
依個時侯有另一個人同我一樣起番身，我望望佢個樣，係港女OL……
但係佢比我印象中既後生，應該話感覺上同我同齡。
「Oh my god！ where is my hair？Oh！啊白？啊樺？啊！！！你係啊麟？」港女OL指住我大叫。
比港女OL咁樣一講，我先開始去望下同我地一樣訓左喺地果八個人，佢地就係龍友，大隻佬，MK仔，援交妹，啊樺，運動姐姐，四眼警察，仲有個好似Major Tom既人。
但係佢地同我印象唔同就係佢地既年齡同體格，全部都應該同我同齡，體格都差唔多。
究竟發生咩事？
我摸摸褲袋入面塊晶片，我記起一樣野！
喺M記到果份報紙，上面寫住：「某某科學家將晶片縮細左唔知幾多」
我再望望周圍既人，我醒起一套戲……係Matrix……
我諗個世界既真相就係，由頭到尾我所生活既地方，所有經歷都係假既……
無論係啊爸又好啊媽都好……
所有野都係假……
我地既意識比人放左去果個虛擬既世界入面，而個肉體就好似依加果班白衣人咁不停工作……
諗到依到，我見到啊樺佢地都起番身，我即刻走去捉實啊樺！
但係佢無視我，向住某一個方向行。
「點啊？」港女OL問我。
我：「跟住佢地行啦。」
如是者我同佢地行左差唔多成粒鐘，佢地行到去一個叫YZ zone既地方停低。
依到有十部機器，就好似IRONMAN果啲展示櫥之類既機器。
佢地八個行左入部機器到，上面有個顯示器寫住：RE INSTALL->REBOOT->RECONNECT
我望住果幾部機器同佢地，我諗我身處喺一個好恐怖既世界……
一個將人當做機器既世界？
「你好」忽然之間我同港女OL背後多左個一身白西裝既男人。
我：「你係……？」
白西裝佬：「Welcome to 2176, my name is Jesse Perring。我諗兩位應該大概估到咩事啊？」
我點點頭， 白西裝佬：「咁你地跟我嚟，我再詳細交代發生咩事。」
如是者個白西裝佬帶左我地又行左差唔多半個鐘，最行到左一部LIFT。
佢禮貌地做一做個手勢話：「Please。」
我就同港女OL一齊入去，白西裝佬其後再走入嚟。
當道閘門關埋之後，個LIFT唔洗幾秒就「叮」一聲到左地面。
我認得依到係信和。
我地跟住白西裝佬走左出信和，我見到其實個環境同我所認知既香港無咩唔同，除左一樣野。
就係我見到有一支高聳入雲既巨柱直插上天，白西裝佬望一望我既視線話：「哦，果個係我地既軌道電梯。唔好講咁多，去我office再講。」
白西裝佬「啪啪」兩聲，就有架全白既跑車出現喺我地面前，而我同港女OL就跟左佢上車……