《香港傭兵》: [Day 04－進入天門] PART 07
「搵咗成日先搵到架車返嚟？我都兜咗好幾轉啦...」
呢個著住黑色大褸...
「嘩！咩車嚟㗎呢架？」
一隻手插住褸袋...
「仲要係棍波？！」
一隻手摸住爆炸頭嘅男人...
「喺邊度搵返嚟㗎？！」
就係今朝坐西鐵見過嗰個男人！
我可以肯定...一定係佢！
估唔到...原來佢都係行者...
仲要係今次委託嘅成員！
「唉...而家啲隨行者做嘢真係靠唔住...好彩我都識揸姐...」爆炸頭挨住車身，拎部電話出嚟睇。
嘩屌...食咗屎嚟吖？把口咁臭嘅？
『你好。』雖然你食完屎，但我有教養，會同你打招呼。
「嗯...」爆炸頭望住部電話點點頭。
『你係...負責揸車？』
「嗯...」
『小心啲揸喎...唔好整花架車喎...』
爆炸頭冇出聲，淨係擰咗個頭過嚟望實我...
我又望住爆炸頭對矇豬眼...
我哋默不作聲咁互相對望咗好一陣子...
爆炸頭唔理我咁多，望返自己部電話...
『係呢...今次嘅委託係要做啲咩㗎？』
「捉人...」
『詳情呢？』
「自己睇...」
屌！講咁耐都冇內容...又係自己睇！
我拎部電話出嚟，再搵返個委託...先發現喺成員裡面，除咗風化、綽姿同我之外，仲多咗兩個人！
一個係毒辣...另一個係快影...
咁爆炸頭係風化...毒辣...定係快影吖？
我再睇睇有關報酬分配係...
首先捉到目標人物者，可得80%報酬？！
咁㗎咩？！
報酬分配方式又夠多元化喎！
然後就再睇吓委託內容...
『睇唔到喎...』咪又係撳唔到入去！
「即係你冇需要知...」爆炸頭冷冷放下一句。
我屌...又係咁...
又係唔知頭唔知路，盲摸摸咁跟住你哋執行委託！
「喂！到咗喇？」突然又有把男人聲喺面前出現！
我望返上前，見到有兩個身影行緊過嚟！
一個黑黑實實咁...另一個骨瘦如柴咁！
兩個都係著住黑色大褸，雙手插褸袋。
越行越近，我就可以再睇得清楚啲...黑黑實實嗰個就唔好講，骨瘦如柴嗰個仲孱過我喎！
咁睇嚟其實我都唔係好差姐～
黑黑實實成碌柒左望右望：「仲差一個...」
差綽姿吖嘛～
骨瘦如柴孱仔強拎部電話出嚟望望：「仲未夠鐘～等吓啦～」
我哋四個人就企喺架Benz隔離，各自各咁等...
望吓條街...望吓條馬路...望吓遠處嘅樓...真係一粒聲都唔出！
其實究竟有冇計劃嘅呢？
其實係唔係個個都知個計劃，淨係得我唔需要知呢？
咁我係唔係除咗搵架車返嚟，就乜都唔使做呢？
咁我實唔會係捉到人嗰個啦！80%冇我份啦！公平咩？！
望住日落西斜，天色好快變暗...變黑...
街上嘅街燈亮起，發出柔和嘅黃光。
手頭上包Oreo都俾我食晒～飽飽喇～
綽姿都仲未到嘅？仲要等幾耐呢？
到咗夜晚，本來已經夠凍嘅馬路就更加凍！
嘩屌...幾時先嚟吖？
正當冷得我騰騰震之時，我望到遠處...正正有個嬌小嘅身影行緊過嚟...
我望清楚呢個著住黑色毛毛大褸...雙手插褸袋嘅嬌小身影...
係綽姿！終於都到喇！
大家都同我一樣，望住綽姿越行越近...
當綽姿行到嚟我面前之時...
「係...一個妹妹仔？」黑黑實實成碌柒疑惑咁打量住綽姿！
「有問題？」綽姿木無表情咁望住黑黑實實成碌柒。
「冇...冇...」黑黑實實成碌柒仲係有點驚訝，「係估唔到鼎鼎大名嘅瓦解...係咁細個...」
咦喂！又係聽過綽姿嘅大名？！
「更估唔到瓦解嘅隨行者會係咁弱～嘿嘿嘿...」骨瘦如柴孱仔強恥笑住我...
嘩我屌你啦...唔覺你會好得過我囉！
「話唔定人哋精神化後嚇死你呢。」黑黑實實成碌柒講嘢就有啲見地喇！
綽姿無視佢哋，喺褸袋拎咗支精神液俾我：「用佢。仲有...唔好信其他行者。」
『哦哦...』我接過綽姿手上支...Level 2精神液？！
冇錯！呢種鮮艷度...的確係Level 2精神液！
綽姿仲叫我...唔好信其他行者？
唔...我諗返起尋晚...
「哦？睇過～」骨瘦如柴孱仔強一講完，對眼發出紅光！
唔止...仲有黑黑實實成碌柒...爆炸頭...就連綽姿對眼都紅一紅！
要...用精神液喇？
我用力一捏手中嘅Level 2精神液！
望住手中嘅精神液粉碎！分散成紅色嘅粒子！
無數發住紅光嘅紅色粒子就喺我左手掌心中飄出！飄到去手背…倒轉嘅五角星！發出紅光！
寒意由手背傳遍手掌…傳到手臂…全身！
好凍…冇力…
當雙腳一軟…道寒意游到上頭之時…
「呢度係邊度呀？！」我又聽到…
「做咩要困住我？！」又係女仔聲！
「好凍吖...全身都好凍吖...」我又聽到…幾把女仔聲…
「救我...救我吖...我係唔係就快死喇？我唔想死吖...我唔想死呀！」好清楚…我真係好清楚聽到幾把女仔聲！
就好似喺我耳邊...
點解…點解又會喺呢個時候…又係喺呢個時候...
當陣寒意散走之後…
「車～咪又係咁弱～」骨瘦如柴孱仔強鄙視我！
同時，我感覺到綽姿嘅氣息...仲有三股陌生嘅氣息...
而喺呢三股氣息之中...最強嘅竟然係骨瘦如柴孱仔強？！
跟住先係黑黑實實成碌柒...最後就係爆炸頭。
不過佢哋三個加埋嘅氣息都唔夠綽姿強...
應該話就連綽姿嘅十分一都冇...
又真係估唔到喎！骨瘦如柴孱仔強會係佢哋三個之中氣息最強嗰個！
咁講法...我都應該算係潛力股嚟㗎喎～
「時間都唔早喇，IM咗先...風化，執行者。」原來黑黑實實成碌柒就係風化！
亦即係今次委託嘅隊長！
「毒辣～執行者～」骨瘦如柴孱仔強就係毒辣！
真係毒辣到？
「快影...執行者...」爆炸頭就係快影...
同飛影有冇關係？
「瓦解。執行者。」綽姿冷冷放下一句。
『吞噬...隨行者...』今次冇人阻住我IM喇～
總算有返少少存在感～
等到大家都IM過之後，風化就接住講：「大家都應該清楚要做啲乜同報酬分配方式喇？」
吓？大家？包唔包括我吖？
老老柒柒我除咗知道要搵架車返嚟同要去捉人仲有邊個捉到人就分到80%之外，乜柒都唔知㗎喎...
「咁好啦！大家準備出發！」風化就除自己件黑色大褸！
吓？咁就好㗎喇？出得發㗎喇？
大家都跟住除褸...笠返頂帽...拉起衫領...
當大家都準備上車之時...
『係呢...架車得五個位...咁目標人物坐邊呢？』我好似突破咗盲腸...
係囉...大家有冇留意到架Benz得五個位，點坐六個人呢？
「Dom佢入車尾箱咪得囉～個車尾箱咁大～」毒辣一邊上車一邊講解，「定係你想坐車尾箱吖？上車啦～」
又得喎～
此時綽姿推一推我...示意叫我快啲上車！
『哦哦...』上咪上囉...
大家都上咗車之後，而家嘅坐法就係呢...快影坐喺駕駛座啦～風化就坐喺快影隔離個客座啦～然後後座就係毒辣坐喺我左邊～綽姿坐喺我右邊～我就俾佢哋兩個夾喺中間～
好彩我哋三個都係瘦底，坐得幾舒適～
大家都冇扣上安全帶...
“吼！依！”快影就開車！
“吼！”仲要開得好快！上波都上得好順！
話咁快就上到六波衝住去！
咦喂！真係識揸㗎喎！
「係呢...你跟咗瓦解幾耐？」風化突然問一問。
『我吖？我...三日...』三日...呢三日真係唔易過...
「三日咋？」身邊嘅毒辣有啲愕然，「唔怪之得你仲未死啦～」
嘩我屌你...你都係啱啱食完屎嚟㗎喎...
「隨行者過到三日都好叻㗎喇...」風化諗咗諗，「或者係佢嘅執行者保護得佢好呢。」
吓？綽姿保護我？有咩？唔覺囉...
綽姿粒聲唔出，靜靜咁坐定定，望出窗外。
「都係㗎...每次執行委託都兩個當一個計...」快影一邊揸車一邊講，「緊係要好好咁保住佢條命啦...」
「咁又唔係吖～」毒辣立即反駁！「利用完死咗咪下一個囉～隨行者咋嘛～」
吓？死咗咪下一個？！
「就好似你之前嗰個咁？」風化接住講，「Dom佢上前做餌，死咗仲可以攞埋佢嗰份。」
吓？出賣隊友都算...仲要出賣自己嘅隨行者？！
「你又唔好講到我咁衰～係佢自己廢姐～」毒辣望住我，「廢吖～呵？」
咩...咩意思吖...
「咁佢都廢唔過你上次嗰個嘅...」快影一邊掟個靚彎一邊講。
咦喂...咪住先...廢唔過上次嗰個...
「委託從來都係越少人分就越分得多...怪得邊個？」風化接住講...
越少人分就越分得多...
「係吖...今次委託嘅目的地...仲要得我一個知...」快影一邊直路加速一邊講。
今次委託嘅目的地...淨係得快影知？
唔對路...有啲唔對路...
佢哋三個係...識嘅？！
除咗風化同毒辣一齊嚟...頭先快影仲話我都廢唔過毒辣上次嗰個隨行者...
佢哋三個真係識得...咁講法...即係就算冇咗我同綽姿...佢哋都去到目的地？！
好唔對路...越諗越唔對路！
萬一真係為咗報酬...二對三...我哋好蝕喎！
「聰明嘅人係唔會多說話。」久久冇出過聲嘅綽姿終於開聲！
「呵呵～你都出咗聲喇～睇嚟你都唔聰明得去邊～」毒辣趁機恥笑綽姿。
「係咩？唔通而家仲唔明...點解我會坐喺司機位後面？」綽姿冷冷放下一句。
係...係喎！綽姿咁講我先驚覺...我太天真喇！
最壞嘅情況唔係二對三...最壞嘅情況我係會變棄卒！
綽姿之所以要我坐中間...就係萬一發生咩事...綽姿會第一時間解決揸車嘅快影...搵我嚟做盾，擋住身邊嘅毒辣同前面嘅風化...自己跳車逃走！
冇錯！以綽姿嘅性格...絕對唔會救我！只會利用我！
我真係太天真...原來我一直都置身喺險地之中！
行者之間會互相出賣，我尋晚已經領教過...之不過...又會唔會互相廝殺呢？
呢層...我就真係唔知...
唔知嘅事就要作好最壞嘅打算！提高警覺！
“依！吼！”自綽姿講完“唔通而家仲唔明點解我會坐喺司機位後面”後，大家都冇再出到聲。
或者係大家都推算到我頭先所推算嘅事...
而我就望望車外...漆黑嘅馬路只有一盞盞暗黃色嘅街燈照明...
而呢條又長又直嘅馬路...好熟口面...
呢條熟識嘅馬路...隔離長滿一棵棵光脫脫大樹嘅樹林...
呢度係...呢度咪係...
“依！”當快影停定架車之後，佢哋三個立即衝落車！
當然綽姿都好快速咁打開車門衝向樹林！
當我睇住三個發住紅光嘅身影衝入樹林...
當綽姿踏入樹林...發現我仲企路邊之時...
綽姿回頭：「你仲企喺度做咩？快啲跟住我！」
點會...點會咁...
點會係...目的地係...
『迷離大宅？！』