《香港傭兵》: [Day 09－神秘少女] PART 05
“砰！砰！”兩下槍聲！
係槍聲！係唔係有槍戰？！
“砰！砰！砰！”又幾下槍聲！
真係槍戰喎！
嘩屌！走呀快走！
正當我想回身，背住槍聲嘅方向走之時...
唔係喎...香港有槍戰喎...香港有幾耐冇試過槍戰呀？！
咁難得有咁嘅機會...唔係唔去食花生吖化？
我就轉返身...
“砰！砰！”
跟住槍聲嘅方向行...
「咪走！企喺度！」
又跟住啲呼喝聲嘅方向行...
“砰！”
小心翼翼咁轉咗幾個彎...
“砰！砰！”
探頭望一望...
「唔好再追過嚟呀！」
我聽到有把...女仔聲？
我貼近牆角，再探頭望出去...
「放低槍！」
我見到...有四個藍帽子嘅背影！
係...頭先嗰四個？
睇清楚啲...的確...我認到黃浩然同...任達華！
佢哋四個都背住我...拔晒槍...指住前面...兩個女仔？！
嗰兩個女仔...一個紮住馬尾...用槍脅持住另一個短髮嘅女仔！
搞咩呀？搞咩要脅持人質呀？！
仲要用槍咁大鑊？！
「唔好再過嚟！我一槍打爆佢個頭！」個馬尾女用槍隊實短髮女個頭！
好似好認真喎...
但只見短髮女渾渾噩噩咁...冇乜反應...
係唔係驚到快要失去知覺...唔識反應？
「放低槍！你冇得走㗎喇！放低槍投降！」任達華用槍指住馬尾女正一正！
「我叫你哋唔好再過嚟呀！我真係一槍打爆佢個頭㗎！退後！退後！」馬尾女仲要一邊用短髮女掩護住自己，一邊用槍指實短髮女個頭！
睇佢個款...好似好熟練咁喎...
受過訓練㗎？
唔會掛...
我睇馬尾女大約都係廿歲左右姐...
而個短髮女...再睇清楚啲...大約都係十五六七...
搞咩玩到咁大？
綁架勒索呀？
又唔似吖...
個短髮女只係著住件白色病人袍...唔似係有錢人喎...
嗱又話唔埋喎！
可能係趁住有錢女入院，綁佢走呢～呢度都幾近法國醫院㗎嘛～
唔...再睇定啲先！
「嗱！持械就唔係坐好耐...但殺人就要坐一世...放低槍...放開個女仔...」任達華又講經...
呢啲對白喺PTU都聽講啦～
你估而家真係拍戲咩～
「我再講多次...」馬尾女再用槍指實短髮女，「再埋嚟我就一槍打爆佢個頭！」
嗱～都話冇用㗎啦～
現實就係都玩到咁大，唔通就憑你一兩句經就擺得平咩？
咁鬼僵...再咁落去...睇嚟短髮女個頭好大機會會爆開喎...
「放開個女仔先...有事慢慢講...」
「我真係一槍打爆佢個頭㗎！」
「聽我講...放低槍...」
「再埋嚟呀！再埋嚟我就同佢同歸於盡！」
就喺雙方各執一詞...互不相讓...正要出事之時...
「交俾我哋。」突然！喺另一條橫巷走咗三個人出嚟！
呢三個人...都係著晒成套西裝...帶住副黑超...梳咗個All Back髮型...
呢三個西裝友...
「你哋係咩人？」任達華問一問。
其中一個西裝友喺西裝褸裡面拎咗啲嘢出嚟：「國安局。」
國...安局？！
冇錯喇...
呢三個西裝友嘅造型...同前日嘅緊急委託...跟住片翼行...見到嗰班西裝友嘅造型係一模一樣...
點解會係...國安局？
其餘兩個國安局嘅西裝友就立即拔出槍！指向馬尾女！
「好好...」任達華對國安局嘅人都恭恭敬敬...同時收返埋支槍。
「你哋幫我疏散附近所有市民。唔好俾人行入嚟。」國安局嘅人再吩咐埋任達華做嘢。
「Yes Sir！」任達華向國安局嘅人俾個禮！「跟我嚟！」
任達華就帶埋佢班伙記離開！
我就避一避！
“咯！咯！咯！咯！咯！”等任達華佢哋走過！
再偷偷探頭睇睇咩情況...
只見本來係由四名藍帽子用槍指住馬尾女...而家就變咗三個西裝友用槍指住馬尾女...
有分別咩？少咗人囉...
其中一個國安局嘅人就平淡咁講：「將佢交返俾我哋。」
將佢交返俾...國安局？！
係指...短髮女？
短髮女係國安局嘅人？
點睇都唔似喎！
短髮女睇起上嚟冇神冇氣咁...
定係國安局接到命令，要救返短髮女？
咁國安局係負責啲咩㗎？短髮女又係咩人呀？
好複雜...等我再八八先！
馬尾女再用槍大大力隊向短髮女個頭：「就算要我死...都唔會俾返你哋！」
好堅決咁喎！
喂...留得碌鳩在，那怕冇閪屌？
有時候，唔係為啖氣嘅...（其實係我唔想睇到爆頭咁嘔心...）
國安局嘅人仲係平啖咁講：「你知道唔係咁簡單。」
啱吖啱吖～唔係咁簡單㗎～
咁可以有幾複雜？
點解唔簡單你又可以講到咁平啖？
「我唔理...我一定要帶佢走！」馬尾女帶住必死嘅決心！
喂真係唔使㗎喎...為條女姐...有乜咁重要呀？
「你帶走佢都冇用...而且你再唔快啲將佢交返俾我哋...嚟唔切。」國安局嘅人講到好似好迫切咁！
但其實又有乜咁迫切呢？
我仲係睇唔到，喺短髮女身上有乜咁特別...
我只係覺得佢好似...好呆...好攰...眼神死...失去靈魂一樣...
「只要你將佢交返俾我哋...我哋可以放你走。」國安局嘅人開出條件。
但直覺話我知...信唔過！
「我係唔會信你哋㗎！！！」馬尾女大嗌一聲！
嗱～英雄所見樂瞳吖～
之不過...而家嘅情況...接近失控...
喺我完全得唔到任何情報之下...應該點做？
應該當咩事都冇發生，頭也不回轉身離開？
定抑或...用精神液？！
偷偷望住個僵局...
假如想得到更多嘅情報...
話唔定就要...要用精神液...精神化...
值唔值？
用一支Level 1精神液...換取一個同國安局有關嘅情報...
我唔知道國安局負責啲乜...同短髮女有乜關係...
更唔知道馬尾女因乜事要捉短髮女...同國安局有乜過節...
假如用一支精神液...可以換取有關情報嘅話...
我左手插入褸袋...用力一捏支Level 1精神液！
當道寒意由手背傳遍手掌…傳到手臂…全身...
「救命...有冇人可以...救我...」我又聽到...
「放我...放我出去...」我又聽到女仔聲...
「呢度係...邊...度...」每次用精神液...都總係會聽到...女仔聲...
「唔好再行過嚟呀！」呢把係馬尾女嘅大叫聲！
好！爭取時間！
我除件褸，放喺雜物上！
笠起頂帽！拉埋衫領就行出去！
“咯 咯”一步一步，專登行得有啲大聲！
馬尾女都已經望到我...仲要眼都大埋！帶點驚訝！
見到咁嘅我都仲係帶點驚訝咋？
等我仲以為會嚇到腳軟...
而短髮女依然冇嚟神氣咁...雙眼放空...
“咯 咯 咯”行唔夠多幾步，國安局嘅人都留意到我！
其中一個國安局嘅人繼續用槍指住馬尾女，望過嚟...
我就一路望住國安局班人...一路行...行過佢哋身邊...行到去國安局與馬尾女之間。
我企正喺佢哋兩邊嘅中間，望實國安局班人！
企喺中間嗰個國安局嘅人用槍指住我：「係...SPIRIT...」
果然...都知道我哋嘅存在...
中間嗰個國安局嘅人繼續講：「果然...你哋同黃傘都有交易...」
同黃...黃傘有交易？
交易應該係指委託...
咁黃傘呢？
會唔會同身後嘅馬尾女...或者短髮女有關？
三個國安局嘅人一邊用槍指住我，一邊慢慢向後退...
係以為我係受咗黃傘嘅委託，知道冇辦法同我鬥，所以撤退？
突然！眼前三個國安局嘅人大為緊張咁...
“砰！砰！砰！”同時開槍！
仆街！
自然反應之下，不知不覺之間就提升咗五官六感！
同時！我拔出精神刀柄！紅光刀刃隨即亮出！
望住三粒子彈正向住我身處嘅方向飛埋嚟！但...角度偏向左右兩邊...
“砰...砰...砰...”身後亦有三下槍聲！
我輕輕揮動精神刀，當紅光刀刃格擋面前三粒子彈後...有三粒子彈由我右後方飛出！
三粒子彈嘅飛行速度越嚟越快...越嚟越快...分別直轟落三個國安局嘅人嘅額頭！
望住三個國安局嘅人額頭穿咗個窿...噴出血紅色嘅腦漿...
“啪啪啪！”三個國安局嘅人同時倒地！
望住三具屍體...地上開始有紅色嘅血...
頭先仲生勾勾...而家就...
「點解要幫我？」背後傳嚟馬尾女把聲。
我回頭望一望，望到馬尾女一手箍住短髮女條頸，用槍指住我。
『點解要殺佢哋？』佢哋本來都諗住要走㗎啦...
「點解？」馬尾女皺一皺眉，「我可以話係幫咗你...俾佢哋返去匯報有SPIRIT幫我哋黃傘力量，你哋都好麻煩！」
俾國安局嘅人知我哋SPIRIT幫過佢哋黃傘力量...
黃傘力量...睇嚟係一個組織...
而且應該係...反政府組織？
但點解...俾國安局嘅人知我哋SPIRIT幫過佢哋會好麻煩？
睇嚟...呢個馬尾女知道唔少我唔知道嘅事...
「你哋SPIRIT唔係唔做我哋生意㗎咩？做乜幫我？！」馬尾妹手震震...槍震震...
我哋SPIRIT唔做佢哋生意？
即係話...我哋係唔會接佢哋嘅委託？
唔怪之得...國安局嘅人會話“果然...你哋同黃傘都有交易...”...
呢句說話當中...仲包含住...不信任...
睇嚟國安局對我哋SPIRIT都唔係好信任...
而聽馬尾女嘅口吻...好似都幾了解我哋...
『咁你哋應該清楚...』我轉一轉身，向住馬尾女踏前步，『我哋其中一樣工作係...搜集情報...』
就等我拋一拋佢！
馬尾女退後一步：「唔好行過嚟！」
『你知槍係傷唔到我。』講就咁講...咁近嘅話...嚟唔切反應擋，硬食好撚柒㗎嘛...
馬尾女用槍指返住短髮女：「唔好行過嚟呀！」
『我唔係幫國安局做事...唔怕你一槍打爆佢個頭。』繼續拋！
「你...你真係唔怕咩？話唔埋...話唔埋會有咩事發生㗎！」馬尾女睇起上嚟好肉緊！
『個女仔係咩人？點解你哋黃傘同國安局都咁重視佢？佢...睇起上嚟好似...有啲唔妥...』個短髮女仲係...雙目無神...遊緊魂...
「我...我係唔會講你知！同歸於盡都唔講！」馬尾女再用槍大大力隊向短髮女個頭！
『好...』我一邊轉身，一邊行，『你而家唔講唔緊要...我遲早都會知道。』
呢個時候...都係唔好迫佢太緊...
呢個時候...行返入後巷...拎返件大褸！
著返件大褸之後...我就跳到上牆角！
由上空跟住...馬尾女佢哋！
而家呢個時候...係要玩跟蹤！
精神化期間嘅我，要跟蹤一個普通人並唔難！
喺高處飛簷走壁咁跟住馬尾女拉住短髮女走出後巷...
再喺高處跟住佢哋跑，避開警察跑到出路邊，上咗架紅色的士...
我再繼續喺大廈與大廈之間，跟住架的士又彈又跳又飛...
跟咗一大段路...去到幾座...工業大廈附近...
『呢度係...』我望望四周...雖然唔係好識路...但就好似係...九龍寨城？！
的確係九龍寨城！個公園仲喺度！
點解會走咗過嚟...九龍寨城？
當我跳到落一座工業大廈嘅平台之時，的士都停低咗！馬尾女都拉住短髮女落車！
望住馬尾女拉住短髮女衝入對面座工業大廈...
點解會走入工業大廈？
唔通...係黃傘力量嘅基地？
我又好唔好...走入去睇睇？
唔...都係唔好理住...
今次總算得到少少情報...為免打草驚蛇...都係撤退先。
但正當我想轉身，喺平台上搵出口之時...我望到身後不遠處...企咗個...
少女？！