我再提高視力...睇清楚啲...

喺不遠處...出口前...正正就企咗一個...細細粒粒...著住黑色毛毛大褸...留有黑長髮...平陰嘅女仔!

仆街喇!

個女仔係幾時喺度㗎?

會唔會見到我飛落嚟㗎?



屌!使鬼見到我飛落嚟咩?淨係見我而家個Look咁古怪都夠死啦!!!

個女仔一步一步咁行過嚟...行埋嚟...

仆街喇呢次!

綽姿講過唔好俾人見到...而家就俾個女仔見到...

個女仔再行埋啲...再行近啲...



我再望清楚啲個女仔...眼大大...嘴細細...面尖尖...皮膚雪白細緻...睇起上嚟...都係同綽姿咁上下年紀...都係十四五歲...

點好呢...俾個小妹妹見到我咁嘅樣...我應該點做好呢?

個女仔再行近啲...行到嚟我面前...

點好呢...應該點好呢...我應該點...

「你係...SPIRIT嘅人?」個女仔帶住好奇嘅眼神望實我!



SPIRIT嘅人...個女仔噏得出...SPIRIT?

『呃...呃...係...』個女仔...知道我哋嘅事?

「太好喇!」個女仔笑得勁燦爛!「我好仰慕你哋㗎!」

仰...仰慕?

我有冇聽錯吖?個女仔係話...仰慕我哋SPIRIT?!

個女仔雙手捉住我隻手:「我呢~曾經俾你哋救過㗎!所以我一直都好仰慕你哋!估唔到...而家又可以遇到你哋~太好喇!」

哦?哦...原來係...曾經俾我哋救過...

我哋SPIRIT嘅行者...會救人?



會係咩情況?又會有行者咁好人?

我真係唔係咁肯承認...SPIRIT裡面會有好人...除咗仁慈...

「係呢係呢~唔知我哋可唔可以...交換Contact呢?」女仔仲要一面期待。

望住一副天真無邪嘅小妹妹樣...

『呃...好...好...』我就神推鬼擁之下...拎咗部電話出嚟...

個女仔一面天真咁由摟袋拎出電話...貼一貼埋我手上部電話:「多謝你吖~我會守秘密㗎~」

『哦...好好...』會守...守秘密...



「咁好啦~我哋保持聯絡啦~拜拜~」女仔帶住天真無邪嘅小妹妹笑容,一邊同我揮手,一邊行去出口。

『哦...拜拜...』保持聯絡...

目送個女仔行入出口...喺我嘅視線範圍之內消失...

『我...做乜柒?』

係囉...我做咗乜柒?

點解我會交換Contact㗎?!

屌我肯定係因為人哋係𡃁妹仔又靚又可愛又得意又天真無邪!被迷惑咗啦!!!

仆街喇呢次!俾阿月知道實扭我蛋...都算!



仲會恥笑足我一個月!!!

又會話:「你最鍾意嗰種𡃁妹仔吖~」

再唔係:「快啲去溝人啦~吖唔係~快啲去俾人溝啦~」

呢個阿月就係咁㗎喇!一有機會就入我!入晒我!!!

因為明知啲𡃁妹仔唔會睇得上我吖嘛!

呢樣都唔係重點!

重點係!我心裡只有阿月...



阿月知道...所以先成日拎我嚟開玩笑...

『唉...我一世都俾阿月食住㗎喇...』

我拎起部手機...望望...

『最近新增聯絡人...朱海羅...』個女仔叫做...朱海羅?

個名又會...咁奇怪...

可能呢個年代興掛...Whatever啦...

而佢又會唔會真係聯絡我?Whatever啦...

話唔定...人哋都只係隨口問我拎電話,唔會主動搵我...

啲𡃁妹仔係咁㗎啦~(講到好似好了解𡃁妹仔咁...)

好啦好啦~而家要做嘅係...應該係要去搵個地方...準備深層睡眠...

冇錯...搵定個地方,等自己進入深層睡眠。

我拉返低頂帽同衫領,行去出口。

由出口行返入樓層,再喺樓層搵搵路...

一心諗住搵部𨋢落返去...點知就俾我搵到...

『時鐘太空艙?!』

望住門口大大塊LED顯示板...

係唔係時鐘酒店啲Friend嚟㗎?

其實我都唔係好清楚...不過見佢又時鐘又太空艙咁...就即管入去睇睇~

拉門入去,就已經見到左右兩邊放滿一排排...箱?

低中高三層...一路行...一路左望右望...一個個米白色嘅正方形門...好多都已經閂埋咗...

呢啲就係...太空艙?

再行入啲...我就見到其中有一個道門打開咗嘅...

『嘩屌...乜撚嘢太空艙?棺材似啲喎...』望入去“太空艙”入面...細到呢...

張床薄到...好似淨係放咗塊海綿上去...再搵塊布鋪過面...

枕頭又係勁細勁扁...仲要成個艙都係得一盞燈...冇喇...

你話喇...係太空艙定棺材喇?

仲要收成...

『四百蚊一個鐘?!』嘩我屌!你俾我呀?!

咁鬼細嘅空間瞓一個鐘都要四百?!

仲要唔知乾唔乾淨!

真係好過去搶喎!

所以話呢~喺香港最好做咩吖?梗係做地主啦~

而香港最大地主係邊個吖?

李加乘?

錯!

係香港政府呀傻仔!

而最大問題係...

『不接受現金交易!』

我屌你啦!咁撚煩!

我記得銀行戶口好似得返五十蚊...即係又要對錢啦?

屌!

我只好快快手拎部電話出嚟撳入SPIRIT App將1 Sil對返一千蚊港幣!

好喇好喇!先俾錢,後上床嘛!

『Set...租一小時...一小時應該夠㗎喇...』再將部電話拍埋去感應器...

“啫叮~”

咁就唔見四舊水...

好喇!上床喇!

我爬入棺材...

『嘩...好窄...好細...好難轉...轉身...個枕頭衰撚到...屌...』幾經辛苦先瞓好個人!

“啪!咔!”道門隨即關上!鎖埋!就連盞燈都熄埋!

嘩屌!係唔係要升空喇?急尿咁點算吖?

好喇好喇...唔好理咁多喇...我都係想深層睡眠姐...

而家要做嘅就係...放鬆...放鬆...係唔係放鬆就得㗎喇?

呃...呢層我又真係...

突然...意識開始模糊…

四肢乏力…

開始…失去…



..

.

企喺士多旁邊等...

望望不遠處嘅巴士站...

再抬頭望望天色...

仲好早...不過就灰雲滿佈...

陽光被灰雲遮掩,不見天日,有啲凍...

『仲要等幾耐呢...』我雙手攬住自己...

呢個阿月...平日都好少會遲到...搞乜今日過咗五分鐘都仲未見人?

係咪跌咗落屎坑...

仲話一齊食早餐...都唔知仲夠唔夠時間...

企定定,對眼就周圍望...成座燈塔咁...

仲有唔少學生妹趕住返學...

青春真好~尤其係初中學生妹~

十三四歲仲成個無知小女孩咁~

雖然話我而家都唔係好老...但已經開始懷念...懷念中學生涯嘅美好...

突然!

“咯 咯 咯”幾下急步聲走近!

接住落嚟就係阿月用手上堆書,一嘢拍落我心口!再向住巴士站方向跑:「有車喇!仲企喺度?快啲上啦!」

『哦哦...』明明就係你遲到...仲講到好似我錯咁囉...

同阿月趕上101巴士,坐喺下層...

「點吖你?𥄫學生妹𥄫到迷晒~一陣仲考唔考到試吖?」一坐低,就俾阿月單打。

『我邊有𥄫姐...』自然反應一定係否應!(蔡生教嘅!捉姦在床都要死口唔認!)

「仲話冇?頭先嗰個著灰色校裙嘅學生妹...細細粒粒幾可愛吖~睇起上嚟都係中一二...仲要係你最愛嘅平陰高馬尾...」阿月古古惑惑咁打量住我...隻手仔仲要偷偷放喺我大髀上...慢慢向上摸...

『你...你...你...你唔好亂嚟...』我一手捉實阿月隻手仔!『都係你啦!咁鬼遲!跌咗落屎坑吖?』

「嘩你把口咁臭嘅?食咗屎嚟吖?」阿月縮返開隻手仔,冷眼望住我,「人哋啱啱嚟M吖...所以咪搞耐咗囉~」

『哦...咁你痛唔痛吖?』我用隻手按喺阿月嘅小腹上。

阿月每次嚟M,都總會痛到面容扭曲...

其實係唔係個個女仔嚟M都係咁?

高登仔話扑得嘢多嘅女仔,嚟M嘅時候就冇咁痛...

咁我係唔係要同阿月扑多啲嘢?

「有你隻手就冇咁痛喇~」阿月摸住我隻手,甜絲絲咁望實我莞爾一笑。

『嘩...做咩咁嗲?』一定有陰毛!

每次見到阿月呢個不懷好意嘅笑樣...總係有不祥預感...

「嗲吓你唔好咩~」阿月繼續Keep住莞爾一笑。

『好...好...』阿月呢個笑樣...其實都幾吸引嘅...

我唔可以話見過好多女仔笑...但阿月呢種笑容...真係冇喺其他女仔面上見過...

每次見到阿月用呢種笑容望實我...都總會令我個心...軟一軟...

「係吖~我呢...一陣同唔到你食早餐喇~」阿月摸住我隻手。

『吓?點解吖?』而家去食...仲有啲時間㗎喎...

「Jen Jen話...陣間個Quiz有啲唔識...想同我邊食住早餐邊一齊溫溫喎~」阿月又嗲聲嗲氣咁。

又係嗰個Jenny?!

點解老是要霸住我嘅月月?都算!

『咁我哋三個一齊邊食邊溫囉...』總係要阻住我哋二人世界時間!我都算!

「唔...唔係咁好嘅...你知啦...Jen Jen對你有啲...偏見㗎嘛...」阿月又尷尷尬尬咁嘅樣...

最大問題就係點解偏要搶走我嘅月月呢?!

個八婆有冇搞撚錯呀?

佢當自己係邊撚個呀?

我先係月月嘅男朋友呀!

『我對佢有直見添呀!』講起我就扯火!

「唔好咁啦~唔好咁啦~大人有大量㗎嘛~最多請你食塊Oreo喇~」阿月喺個手袋仔拎咗包Oreo出嚟。

『Oreo呀?我唔要!我唔要!我要同你食M記!』唔好以為一塊Oreo就可以Hea走我!

「乖啦~」阿月當正我係小朋友咁!

『我都有嘢唔識㗎...講好話一齊邊食早餐邊溫㗎嘛...』講好咗又唔算數...

「你咁醒~自己溫都得啦~」阿月又氹我。

『咁嗰個八婆係唔係智障先?』講句公道說話吖!

「嗱~唔可以咁爛口㗎~」阿月扮晒媽媽口吻!

『唉...咁係吖嘛...已經好多次喇...』自從一齊讀I大開始,識咗呢個八婆Jenny之後,你有幾多次因為佢而甩我底吖?

佢話想搵你一齊去買啲嘢,你就叫我自己搵嘢做仆住過去!

明明約好咗話一齊睇套戲,飛都買埋!佢突然話想睇你就Dom低我同佢睇!

諗住一齊做功課,你又話要同佢一齊做!

放學想送你返屋企,你又話佢想同你行街,唔返去住!

而家你係同我拍拖定係同個八婆拍呀?

你唔好以為我唔知,條八婆Les㗎!

「咁我哋...唔同吖嘛~我哋仲有大把時間一齊~我哋有五五十十十年計劃㗎嘛~」阿月又嗲嗲我。

『好多時間都已經俾佢搶走咗啦...』呢啲咁嘅八婆...擺明有心想拆散我哋啦...

「時間搶走咗...都搶唔走我個心嘅~」阿月捉實我隻手,「我個心...一直喺你手上...我哋係命中注定㗎嘛~」

望住阿月呢個甜絲絲嘅莞爾一笑樣...

『唉...好喇好喇好喇...咁...我哋唔一齊食早餐...一齊食Lunch啦...』真係冇晒阿月辦法...

我一直都係俾阿月食住...

仲肯肯定會食足一世...

究竟我做錯啲咩呢?

點解個天要俾我咁早就遇到命中注定要遇上嘅你呢?

「好~呀!Lunch都唔得吖~」阿月拍一拍我隻手,「Jen Jen一早約咗我去食過橋米線喇~」

『吓?佢一早約咗你就唔推得嘅?我就得嘅?』平公咩?

「唔好咁啦~唔好咁啦~」阿月再摸摸我隻手,「最多今晚一齊食飯啦~」

『唉...到今晚你又會話“對唔住吖~Jen Jen話想同我食吖~”咁㗎啦...』唔好話我睇死你...你到時一定又係Dom低我...

「唔會唔會~今晚一定唔會~佢點講我都只會同你食~」

『聽住先啦...』

「我哋勾勾手指尾喇~」阿月向我伸出手指尾。

『勾住先啦...』我都伸出手指尾...

阿月用手指尾勾落我隻手指尾後,用佢隻手指公掂落我隻手指公...

「錫晒你~」

望住阿月同我隻手指公...

整個空間漸漸變成灰色…分裂…

分裂到阿月同我隻手指公...粉碎...飄散...