望住手上支Level 1...

今日已經精神化過一次...一陣又再精神化...得唔得㗎?

會唔會有副作用㗎?

生效時間又會唔會短咗㗎?

仲要得Level 1...要自己控制...



點控制吖?咩都唔做吖?

仲要淨係知個委託係要護送...護送啲乜又唔知...危唔危險又唔知...

「點吖?行得未?」綽姿已經行到去門前,唔耐煩咁望住我。

『得得...行得...』唔得都要得㗎啦...

同綽姿落咗樓,跟住佢行...



如果話真係要自己好好控制嘅話...就唔可以郁手...

遇到任何情況...至少都唔可以發動精神刀!

精神刀太耗精神能量...

仲有非必要都唔好提升五官六感!

避得就避...閃得就閃!



有咩事都...搵綽姿擋住!

可能好衰仔...之但係...係你叫我好好控制㗎嘛...唔怪得我...

跟住綽姿行,行到上輕鐵月台。

『係呢...我哋而家要去邊?』係喎...都未知要去邊...

「富泰。」綽姿雙手插住褸袋。

『富...富泰?』竟然係...

「有問題?」綽姿冷眼打量住我。

『呃...問題又唔係好大嘅...之不過呢...輕鐵好似唔到㗎喎...』我唔知呢廿年嚟,輕鐵路線有冇擴充到啦...



不過照我睇呢個唯利是圖嘅香港政府,同有加無減基制嘅港鐵,係唔會重視屯門呢啲被遺忘嘅區域囉!

如果唔係,又點會演變成而家咁嘅局面~

「已經冇其他公共交通工具。你係唔係有更好主意?」綽姿Keep住冷眼打量住我。

『我...又冇...係嘅~去東叔租架車揸過去會方便啲嘅~』好過行啦~

「我幾時有講過話要去東叔度租車?」綽姿繼續Keep住冷眼打量住我。

『你冇講過咩?咁...唔係諗住搭到去兆康再行過去嘛?』唔好咁痴線啦!

「仲要問?今次嘅報酬咁少,仲點會諗住租車?」綽姿一面嫌棄咁擰擰頭。



『咁你又接...』要接就接高報酬啲啦...

「你唔好唔記得,我哋有兩次失敗嘅記錄。唔搵啲易啲穩陣啲嘅委託賺返啲Sil,點過活?仲有,高報酬少少都有機會遇到逆行者。你話我一個人就仲有機會走得甩。帶住你?兩次都差啲冇命。仲好意思問...」綽姿不停擰擰頭。

怪我囉...

今次有乜事我第一個閃!你就真係唔好怪我喇!

“叮叮”兩聲,一道柔和嘅光線照一照…

一架殘舊破爛甩晒油嘅輕鐵埋站。

跟住綽姿行入殘舊嘅車廂,有四五個乘客。

綽姿就行去冇人嘅車尾,企定定望住車廂裡。



『咁我哋今...』我都未將“次要護送啲乜”問埋出口...

「殊。」就俾綽姿打斷咗。

好啦好啦~唔想講咪唔問囉~

保持安靜咁企喺綽姿身邊等...

輕鐵震吓震吓又搖吓搖吓咁…好似快要出軌咁過咗一兩個站。

“飃!飃!”冷風由破碎嘅玻璃窗吹入嚟...

又好似上斜冇力咁,好唔容易先上到天橋,埋一埋站。



好似過咗好耐...好耐先駛到嚟兆康站。

綽姿等到車上嗰五個乘客落咗車之後,再施施然落車。

我都跟喺綽姿身邊...

一落車,綽姿左望望,右望望,望望頭先一齊搭輕鐵嗰五個頭髮灰灰白白嘅男男女女,向住西鐵站方向行。

望住嗰五個男女上咗西鐵站之後,綽姿又行過去西鐵站。

同綽姿上到嚟西鐵站,佢又望住嗰五個男女入咗閘之後,就向住富泰嘅出口行過去。

行返出西鐵站之後...

『做咩?頭先嗰幾個人...識㗎?』總係覺得綽姿好在意佢哋咁嘅?

「唔係...」綽姿邊行邊擰頭,「只係小心啲比較好。」

『小心?』小心啲乜?

「小心...你到而家都仲唔明,小心謹慎有幾咁重要?」綽姿眼眉望一望我。

『我...我明!我梗係明啦~小心吖嘛~謹慎吖嘛~』係冇你咁小心謹慎,就連對路過嘅途人都提高警覺姐...

綽姿冇我咁好氣,繼續行。

我都只好跟住喺綽姿身邊行。

行到過嚟呢邊,相比起市中心嗰邊更加荒涼。

街上冇人唔再講,就連街燈大多數都係唔著。

燈火最通明嘅,應該就係嶺南大學。

仲有學生喺嶺南大學讀書?

照我估計...應該有...

中小學都有學生返學,大學都應該唔例外。

而且應該仲有學生寄宿。

話唔定仲有Hall雞添~

而我哋今次嘅委託...唔通係同大學有關?

只見綽姿直行直過...應該就唔關嶺南大學事。

咁...究竟我哋要去邊?又要護送啲乜呢?

繼續跟住綽姿身邊行,行到差唔多到富泰...

「用精神液。」綽姿一邊除褸,一邊講...對眼仲要紅咗一紅!

『哦哦...』我左手插入褸袋...一邊除褸一邊用力一捏支Level 1精神液!(今次順利!)

當道寒意由手背傳遍手掌…傳到手臂…全身...

「好凍...好攰...」我又聽到喇...

「嗚嗚...好驚吖...嗚嗚...」我又聽到女仔聲...

「救我...我唔想...」每次都係...每次一用精神液...

「跟實我。一陣我做乜,你就做乜。」呢把係綽姿把冷淡聲!

綽姿已經笠好頂帽,拉高衫領。

『哦...好好...』呢個就係我今次嘅任務?

我都笠返頂帽,拉高衫領,跟實綽姿。

當我跟住綽姿行過富泰商場,將我哋件大褸放埋一邊,繼續行。

要行去邊呢?呢個方向...好似係...燒烤場?

的確,綽姿係向住燒烤場嘅方向行!

係燒烤場?去護送雞翼吖?

燒雞翼~我鍾意食~

但當我哋行到差唔多見到燒烤場...係...貨倉?

我見到燒烤場原址...有一座座好似貨倉咁嘅建築物!

我跟住綽姿身邊行...再行近啲...睇清楚啲...

的確係貨倉!!!

冇錯...其實燒烤場變貨倉並唔需要驚訝...

試問呢個時勢,仲邊有人燒嘢食?

我之所以驚訝...係因為...我見到貨倉入口企咗兩個...光頭佬!

跟住綽姿身邊...再行近啲...

嗰兩個企喺門口...點緊煙嘅光頭佬係...西貢獻命?!

點解會係佢哋?

點解佢哋會喺度?

只見綽姿繼續行,並冇減慢腳步...亦唔見有咩舉動...

我就只好繼續跟住綽姿行...

綽姿講過㗎嘛!佢做乜我就跟住做乜!

真係冇問題咩?

當我哋差唔多行到去嗰兩個光頭佬面前...

「喂!到喇?好準時喎!」其中一個光頭佬就擔住支煙同我哋揮揮手!

唔係真係㗎嘛?

喺我仲行緊過去佢哋面前之時,我都仲喺度諗緊唔係佢哋...

只係咁啱經過遇到...

但而家...已經唔可以再否應...唔可以再呃自己...

今次嘅委託人係...西貢獻命!

點會...

「我哋要護送嘅嘢呢?」綽姿簡單一問。

其中一個光頭佬抽住煙答:「我哋仲準備緊...」

另一個光頭佬又接住講:「橫掂都係咯,入咗去先啦不如!穩陣呀!」

另一個光頭佬又抽一抽飛煙:「嗯...都係嘅!跟我入嚟先!」

兩個光頭佬一轉身,我就見到佢哋左頸後方都有個紋身!

而家可以100%肯定...係西貢獻命!

點解會係佢哋?

我哋唔係同佢哋...有過節㗎咩?

只見綽姿跟住兩個光頭佬身後行!

我都只好跟住綽姿...

綽姿做乜...我都要跟住做...

兩個光頭佬一直帶住我哋行...行過去貨倉嗰邊。

夜幕之下,有一盞盞射燈作照明。

呢啲貨倉裡面,係存放啲乜㗎呢?

而我哋今次要護送嘅...又會係乜呢?

委託人係西貢獻命...要護送嘅係...

當我同綽姿跟住兩個扯緊煙嘅光頭佬行...行到嚟一架泊喺貨倉門口嘅中型貨車前...

一個企喺中型貨車旁邊嘅光頭佬就擔住飛煙大嗌:「喂!嚟咗喇?啱喇你兩個!快啲過嚟幫手啦!」

「哦哦...係係係...」兩個帶我哋過嚟嘅光頭佬用力深深一扯飛煙,Dom支煙頭落地,就立即衝入去貨倉。

企喺貨車旁邊嘅光頭佬就望一望我同綽姿:「你哋喺度等等啦...仲差少少...」

綽姿企定,再偷偷望望周圍...

我都扮晒提高警覺咁觀察四周!

綽姿左望右望,又行兩步...

我又跟住綽姿行兩步,左望右望!

我同綽姿都扮晒進入戒備狀態。

而事實上,我想望嘅係...西貢獻命班人...要我哋護送啲乜呢?

當我同綽姿都行到嚟貨倉門前...我見到...兩個光頭佬正正抬住一個...女仔!

係女仔...一個仲著住小學校服...應該係小四五嘅...小妹妹!

個小妹妹仲好似不省人事咁,被兩個光頭佬一前一後抬手抬腳咁抬上貨車!

點會...點會咁㗎?

我哋今次護送嘅...就係呢個被西貢獻命擄走嘅小妹妹?

唔止...唔止呢個...

貨倉又有兩個光頭佬,一前一後抬手抬腳咁抬個仲著住中學校服...睇起上嚟應該仲係初中嘅學生妹!

又係不省人事...被抬上貨車!

「喂!輕手啲呀!」企喺貨車旁邊嘅光頭佬大喝一聲!「小心啲呀!唔好整親佢哋呀!老闆話要活嘅!冇損傷嘅!有乜差池,你哋同我都唔撚掂呀!」

「係係係~知道知道~」兩個光頭佬又走入貨倉。

真係冇問題?

只見綽姿不為所動咁...

要幫佢哋護送擄走返嚟嘅女仔...真係冇問題?

綽姿仲係冷眼旁觀...

「喂!你哋睇撚住呀!都話輕手啲咯!」

綽姿冇理由唔知...

「話就話打咗麻醉藥姐!但有乜損傷,老闆怪罪落嚟,我哋就仆得街㗎喇!」

望住一個又一個不省人事失去知覺嘅女仔被抬上貨車...

冇理由唔知呢班女仔都係被西貢獻命擄走!

「仲有幾多個吖?快手啲啦!」

真係可以唔理?

「唔能夠準時交貨,又俾人屌㗎喇!」

真係可以當唔知?

一直...綽姿都冇任何舉動...

我真係唔知綽姿諗緊乜...

我淨係知...我唔想咁樣...

我唔想睇住一個又一個不省人事失去知覺嘅女仔被抬上貨車...

雖然我唔知西貢獻命班人要運班女仔去邊...做啲乜...

之但係正常有道德良知嘅都會認為,唔會係一個好地方做乜好事啦!

咁...我又唔知可以點做...

綽姿冇動靜...我都唔可以有動靜...

我...係幾時變得咁乖?

我...我都唔知道...

我唔知道喺呢啲情況...喺呢啲環境...應該點做...

我從來都唔係...唔係一個決策者...

我只係...一粒細小嘅齒輪...

一直都係被帶動...被推動...

小事又好...大事又好...都係一樣...

我一直都只係等...

一直等綽姿...等綽姿郁手...

但一直等...都只有等...

係唔係我過份樂觀?

係唔係我天真到覺得綽姿會睇唔過眼...出手救呢班無辜嘅女仔?

SPIRIT...係傭兵組織...收錢做事...

為求完成委託,不擇手段...埋沒良心...罔顧一切!

呢一個禮拜...我已體會得好清楚!

而綽姿...係一個冷血嘅資深執行者...

我仲痴心妄想綽姿會有良心發現嘅一刻?!

我就只有...無奈咁...呆望...

呆望住一個又一個不省人事失去知覺嘅女仔被抬上貨車...

直至到...

「最後一個喇!最後一個喇!」最後一個不省人事嘅學生妹,被兩個光頭佬,一前一後抬手抬腳咁由貨倉抬出...

我望到呢個好似熟睡中嘅睡公主...係...茵婷?!

我睇清楚...提高視力睇清楚!

呢個...熟睡中嘅...睡公主...係茵婷!

我可以好肯定!被兩個光頭佬一前一後抬手抬腳咁抬緊上車嘅係綽姿嘅同學...謝茵婷!

連茵婷都俾佢哋...擄走...

只見綽姿都仲係無動於衷...

你唔係真係可以視而不見吖化?!

嗰個係你個同學...係你個好姊妹喎!

「上晒車喇!可以出發喇!」四個負責搬運嘅光頭佬行近指指點點嘅光頭佬身邊。

要出發喇喎...唔係真係就咁就俾佢哋運茵婷唔知去邊吖化?

「咁好啦!上車!」指指點點嗰個光頭佬再扯一扯飛煙!

唔係真係...

當五個光頭佬都準備上車之時...

「你哋要運班女仔去邊?」綽姿終於開聲!

指指點點嗰個光頭佬停下腳步,回頭望望綽姿:「你哋唔使知要運去邊,上車得㗎喇。」

「我再問一次...」綽姿轉一轉身,望住指指點點嗰個光頭佬,「你哋要運班女仔...去邊?」

在場所有光頭佬都停下腳步,望住綽姿!

氣氛瞬間變得...緊張!

「我就話咗...你哋冇必要...」指指點點嘅光頭佬擔住飛煙,都未將句說話講完...

“嗡!”綽姿就拔出精神刀,亮出刺眼嘅紅光刀刃,指住指指點點嘅光頭佬條頸!

同時!我都拔出精神刀,亮出紅光刀刃,擋住其餘四個...已經拔出手槍嘅光頭佬!

四個光頭佬都拎住支手槍,指向我哋!

手槍?哼!古老科技!

「講...要運班女仔去邊?」綽姿用紅光刀刃...指近指指點點嘅光頭佬條頸!

其餘四個光頭佬緊緊張張,手震震咁用手槍指向我...又指向綽姿...

我就踏前一小步...

呢個距離...未夠...

「我...我唔知...我乜都唔知...」指指點點嘅光頭佬擔住支煙口震震咁...

「係硬頸唔肯講喇嘛?」綽姿再用紅光刀刃指埋去!

再踏前一小步...

呢個距離...仲差少少...

「我...我只係負責揸去市中心...然後就有第二班人接手...其他我乜都唔知...」指指點點嘅光頭佬口震震...

「咁即係...你哋已經再冇任何價值...」綽姿冷冷放下一句...

「我!我冇聽過SPIRIT會殺死委託人!」指指點點嘅光頭佬仲要口硬!

「冇聽講SPIRIT會殺死委託人係因為...從來都冇活口可以講出口!」突然!感覺到身後嘅綽姿殺氣極大!

“嗡!”一聲...

我都踏前一步!橫刀一斬!

“嗡!”一道紅光同時劃過八隻手同四條頸!

“啪 啪 啪 啪 啪”屍首殘肢都散在地上...

「估唔到...你都有心狠手辣嘅時候...」綽姿回頭望一望我...

『我?睇人啦...我只係對住某啲人心狠手辣...就好似你對某啲人唔可以見死不救。』我收返埋把精神刀,揭開頂帽,拉低衫領。

不過頭先嗰一刀...又估唔到咁快咁準...

我自己都冇諗過...會咁熟練...

係因為...做咗行者咁多日?總有成長...

跟住已經收埋精神刀,揭開頂帽,拉低衫領嘅綽姿身後行,行到嚟貨車尾。

綽姿打開車門,擒入去單膝半跪喺茵婷面前,睇睇佢嘅情況:「我都覺得奇怪...茵婷好緊張今朝個Quiz...點會缺席?原來係俾人捉走咗。好彩...只係昏迷咗...」

『佢哋頭先話...要活嘅...冇損傷嘅...究竟西貢獻命要捉班女仔做乜呢?』我望望有如睡公主一樣嘅茵婷...再望望車廂裡面其他女仔...

「唔...」綽姿諗咗一諗,「呢個貨倉都好奇怪...冇其他人...淨係得頭先嗰五個...仲要冇CCTV...一啲戒備都冇...睇嚟真係覺得自己喺呢區大晒。」

『西貢獻命嘛~喺屯門區就係大晒㗎啦~之不過...』我又諗諗,『佢哋口中嘅老闆...會係咩人?』

佢哋口中嘅老闆...係咩人?同西貢獻命又有乜關係?

「或者...遲啲再查查...」綽姿公主抱咁抱起茵婷,「而家都係送咗佢返屋企先。」

『送佢返...等等先!你諗住親自送佢返屋企吖?』我打量住茵婷。

「當然。我知佢住喺邊,當然由我親自送...你唔好諗住打佢主意。」綽姿冷眼望住我。

『我打佢...喂喂喂你咩意思呀?!我都話我冇叫雛妓咯!!!』呢個綽姿仲係誤會緊我!

綽姿仲係極度嫌棄咁打量住我...

『我嘅意思係...咁其他女仔點吖?』仲成車女仔瞓晒喺度㗎!

「可以點?唔理得咁多。又唔知佢哋住邊。唔通帶佢哋去西貢獻命?你自己都時間無多喇。」綽姿打量住我。

我時間無多...的確...精神能量隨時耗盡...隨時進入深層睡眠...

「我送茵婷返去先。你自己都快啲返屋企。」綽姿講完,就抱住茵婷離開。

我望住成車昏迷咗嘅女仔...

點好呢...應該點做好呢?

邊度先係安全嘅地方呢?

安全嘅地方...嶺南大學?!

唔得唔得!從來都唔覺得大學係一個安全嘅地方...(成班唔係雞就狗公!)

咁仲有邊度安全...安全...大學...學...我諗到喇!

我立即閂返埋車門!上車!

“吱!”開著架貨車,立即駛離西貢獻命嘅貨倉!

我踩盡油!全速前進!

安全嘅地方...我就諗到一個!

之但係...呢條路啱唔啱㗎呢?

我都唔理得咁多!憑直覺向住安全地方進發!

好彩我嘅直覺都幾準,冇行錯冤枉路就嚟到目的地!

停喺大閘前,落一落車...

『放喺門外都唔係咁好...都係駛埋入去啦!』行去大閘前睇一睇,『之但係...鎖咗...』

我就跳入去!

“嗡!”精神刀一揮!砍開個鎖!

『Sorry~Sorry~我知破壞公物係唔啱~但...為咗救人冇辦法啦~』我打開閘門,上返車!

“吱!”將架貨車駛到入球場嘅正中心後...

『好喇...希望呢度真係安全啦...』落車閂返埋大閘,我都係時候返去!

喺夜幕之下,飛簷走壁!

好快就返翻嚟屋企!

入到門...

「返嚟喇?」綽姿比我更快返到!

『嗯...你送咗茵婷返去喇?』我行近床邊。

「嗯。你呢?咁遲先返到嚟,啲女仔點吖?」綽姿坐喺床邊打量住我。

『班女仔...』

突然…覺得有啲攰…

『我...』

好眼瞓…

「又進入深層睡眠…」

四肢乏力…

「真係好弱...」



..

.

TO BE CONTINUED