《香港傭兵》: [Day 18－險中求液] PART 09
穿咗...穿晒...綠光刀刃由我個肚刺入...背後穿出...
逆行者一腳將我伸開！
綠光刀刃就由我個肚抽返出嚟！
『嗚呀！』我成個人就向後飛開！
肚嘅傷口好大！有大量紅色粒子噴出！
好痛！好撚死痛呀！
好彩嘅係唔係要害...精神能量仲未用盡（但應該都快㗎喇...）...
唔好彩嘅係逆行者冇打算俾我喘息！立即踏前一步...貼近我！
“嗡嗡！嗡嗡嗡嗡！嗡！”逆行者貼近我不停咁揮動綠光刀刃！
又失去武器嘅我就只可以一手撳住肚上嘅傷口...邊退邊避！左閃右避！
之但係歷戰咗咁耐...再加上身受重傷嘅我已經閃唔得幾多...避唔得幾多...
「咁唔識死吖啦？！」
雙臂已經中咗唔少刀...
「廢柴扮英雄吖啦？！」
胸口又中咗幾刀...
「英雄唔係咁逞㗎！」
雙腿又中咗幾刀...
「你挺身而出咁又點吖？人哋咪又係拔足狂奔！」
雖然傷口唔算太深...之但係...有唔少紅色粒子飄出...
唔得喇...再係咁落去...我真係...
「去死啦！」逆行者一腳踢落我頭！
『嗚呀！』我凌空轉體三周半！塊面直鏟落地！
唔得喇...頂唔順喇...真係...今次真係...
逆行者以忍步跑到我面前...
今次真係...
逆行者同時雙手舉起綠色刀刃...正要向我使出袈裟斬！
我仲要...仲要還返張通行證俾...梓翹！
我好自然...好似反射動作一樣...用右手喺大髀上拔出匕首...一擋！
擋住逆行者嘅最後一擊！
擋住咗...竟然可以用匕首...擋住...
大量嘅綠色粒子...由逆行者手上嘅綠光刀刃與我手上把匕首刀刃之中飄出！
我又好自然咁...用匕首推開逆行者...
逆行者都借勢退後幾步！同我拉開距離！
我反手手持匕首...向住擺出防禦姿態嘅逆行者擺出防禦姿態！
「點解...點解你會識得用匕首㗎？」逆行者把聲明顯帶點驚訝！
點解？我...我都唔知喎...
頭先...一瞬間...隻右手就好自然...好自然咁由大髀上拔出匕首...
我都冇諗過...乜都冇諗過...完全係自動波...
「傳說...就只有遠古嘅行者先識得用匕首...」逆行者仲要手震震咁...綠光刀刃震兩震咁...
『遠...遠古？』咩遠古嘅行者吖？
「你唔好扮嘢！你究竟係咩人？！」逆行者手震震咁都要用把綠光刀尖指住我！
『我都冇扮！』做咩咁多人都覺得我係扮㗎呢？我又唔係演員...
「你唔好再扮喇！你嘅出現...就感覺到奇怪...喺戰鬥期間...就更加奇怪...而家仲要識得用匕首！」逆行者手上把綠光刀刃閃著...閃著...
唔止...就連包圍住佢身邊嘅綠色粒子都閃著...閃著...好似螢火蟲咁閃著閃著...
『吖～你真係我遇過咁多逆行者之中，最多嘢講嗰個喎～』口水多過浪花～
「你...講到好似遇過好多個逆行者咁...都仲未死得？你果然唔簡單...」逆行者提高戒備...
『好話喇～知驚未？嗱～今日大爺心情靚～放你一馬～係咁先～』嘩屌...有機會走好走喇...
當我扮晒好型咁轉個靚身...打算偷個靚雞閃人之時...
「睇少我？！」
我感覺到背後...逆行者嘅氣息衝住我而來！
我又好自然咁一個轉身...反手用匕首一擋...
“吱！！！”匕首嘅刀刃就擋住綠光刀刃...
好輕鬆...真係好輕鬆...一啲力都唔使俾...綠光刀刃就飄出大量綠色粒子...
我好自然咁用匕首沿住綠光刀刃一轉...轉落逆行者嘅手背一片...
「吖！」逆行者手背被我片咗一刀...飄出大量綠色粒子！
逆行者退後一步...我又好自然咁踏前一步...貼近逆行者...反手一片...
“嗡！吱！”逆行者勉強以綠光刀刃一擋...再後退幾步...
逆行者呢幾步並唔足以同我拉開距離...我繼續貼住佢反手一片...再片...正手一刺...
每一下攻擊都好自然...好似反射動作咁...仲要都係對住要害嚟攻擊！
點解...點解會咁？
我全身上上下下都不由自主咁...向住逆行者貼埋去...向佢施以致命嘅攻擊！
“嗡！吱！嗡！吱！嗡嗡！吱！”逆行者都只可以勉強以綠光刀刃一擋...後退幾步再擋...
而逆行者每擋一下...綠光刀刃都會擦出大量綠色粒子！
好似...要用好多能量...消耗咗極大能量！
“嗡！吱！”逆行者以綠光刀刃用盡全力擋住我嘅橫片...再借勢向後一跳！將散喺地上嘅木板踢向我！
望住兩塊木板飛埋嚟我面前...我反手一片...再片...將兩塊木板都片開之後，接住一個轉身飛把匕首刺去逆行者！
“嗡！砰！”逆行者立即揮刀一擋！
我又好自然咁...好似早就預咗咁...跳到上空中...左手接住把匕首...由上至下...從天而降咁片落逆行者！
逆行者立即側身避開！我再由下而上...反手一插！
逆行者再勉強後退...
「呀！」但胸口都被我輕輕片咗一刀！飄出綠色粒子！
好自然...一連串嘅動作都好自然...
唔單止...唔單止係自然咁簡單...仲好似...好似預料到...下一步...下一個動作...
就好似...頭先嗰兩塊木板飛埋嚟...就喺逆行者向住木板堆一跳之時...就已經知道佢會踢兩塊木板過嚟...
而我頭先之所以咁夠膽將我唯一武器都向逆行者投擲過去...係因為我預咗佢會擋...擋到上空中...我會接得返...
點解...點解所有嘢...都好似喺我預料之內...曾經遇過....發生過...
既視感？
呢啲算唔算係...阿月曾經提過嘅既視感？！
逆行者單手撳住自己胸口...少量綠色粒子由傷口飄出...
我都唔知算唔算係既視感...
只係...將會發生嘅下半秒...我都好似...已經喺腦海之中...曾經遇過嘅回憶...身體會自動作出反應...動作...
我左手手持匕首...以忍步向逆行者衝過去！
逆行者一手撳住自己胸口...邊退幾步邊向我揮幾刀！
“嗡！嗡！嗡！嗡！”綠光刀氣就由逆行者手上嘅綠光刀刃飛出！飛向我面前！
我向住綠光刀氣衝過去...同時好自然咁正手一擋...再反手一擋...然後再一個轉身再擋兩擋...
所有綠光刀氣都俾我好輕鬆咁以匕首化解！
而且仲已經俾我...跑到嚟逆行者面前！
逆行者邊後退邊向我舉刀...一砍！
“嗡！吱！”我立即以反手持匕首姿態一擋！同時側身一推！卸開綠光刀刃之時轉身一片！
逆行者勉強及時向後一退！匕首就喺佢手臂上劃咗條深深刀痕！
「呀！」大量綠色粒子就由逆行者手臂傷口飄出！
我並冇因為聽到逆行者嘅慘叫而心軟停落嚟...而係接住向佢嘅心臟位置一刺！
“嗡！吱！”逆行者又邊後退邊勉強用綠光刀刃擋開！
我早就已經料到...再正手手持匕首...向逆行者喉嚨位置一刺！
逆行者退到木屋牆身...立即揮刀擋開我嘅攻擊...同時向右邊一跳！想同我拉開距離！
當我手上把匕首一插入木板...我就立即將幾塊木板勾出！飛向逆行者！
“嗡！嗡！嗡！”逆行者邊後退邊揮動綠光刀刃！砍開木板！
當幾塊碎開咗嘅木板向住我飛返埋嚟之時...我跳！就跳上木板！再一跳！借另一塊木板再跳高啲！
我就由上而下...從天而降咁反手手持匕首兜頭插向逆行者！
逆行者立即側身貼近地面...以綠光刀刃邊擋住我嘅攻擊！順勢向右邊一避！
雖然逆行者總算嚟得切避開我嘅致命一擊...之但係匕首都係插中佢大髀！劃出一條長長嘅傷口！
「呀！呀...」逆行者半踎半跪咁撳住自己大髀上嘅傷口...但亦都阻止唔到綠色粒子飄出！
逆行者身上已經有幾處深深嘅傷口...大量綠色粒子飄出...
睇嚟唔使幾耐...唔使幾耐就會耗盡能量...如果會耗盡嘅話...
係喎...其實我都唔知...逆行者會唔會耗盡能量...同我哋一樣都會進入深層睡眠㗎喎...
『好喇...差唔多喇...你都好快就會耗盡能量...趁未進入深層睡眠前好走喇...』我向住逆行者揮揮手...
「哈！好笑...雖然唔知點解你會識得用匕首...但你嘅能量已經薄弱到冇咁制喇！」逆行者勢凶夾狼咁手持綠光刀刃衝埋嚟！
我嘅能量已經薄弱到冇咁制？
咁即係點吖？
仲諗住Chok一Chok佢...睇吓逆行者係唔係都同我哋一樣，會耗盡能量...進入深層睡眠...
點知都係乜都Chok唔到...
“嗡！吱！”我反手輕鬆咁擋住逆行者嘅一閃...
『淨係識得一閃...』我用匕首一手格開綠光刀刃之後，就向逆行者身上刺埋去！
一刺一片...再刺再片...又片又刺！
每一下攻擊動作都好自然...行雲流水...
而且仲要向住逆行者嘅要害攻擊...接二連三咁攻向要害！
雖然話我並無致佢於死地嘅心...但就唔知點解好自然咁攻擊要害...
逆行者已經好努力咁邊退邊避邊擋！
「呀...呀...嗚...呀...嗚！」但根本就冇辦法完全化解我嘅攻勢！全身上上下下多處地方都被我片中！刺中！
大量嘅綠色粒子就由逆行者身上嘅傷口飄出！
差唔多喇...已經差唔多...分出勝負...
我一腳就踢落逆行者個肚！
「嗚呀！」逆行者向後飛開！
我就反手手持匕首，以忍步迫向逆行者！
逆行者一穩住步腳，就立即向我揮刀一砍！
“嗡！”我巧妙咁側身避開...同時！直接用匕首片向逆行者條頸！
逆行者嘅攻擊動作仲未完成...只能勉強以徒手捉住我前臂！
我再順勢一腳掃逆行者後腳！將佢掃低！
喺夜幕之下...明月影照之中...就喺逆行者失晒重心...就喺我反手手持匕首壓向逆行者條頸...壓到落地之時...
停咗...我手上把匕首壓住逆行者條頸...停咗落嚟...
我冇兜嘢片落去...只係降住咗逆行者條頸...
唔係...唔係話我落唔到手...唔係話我想放生佢...
係我...冇晒反應...
頭先嗰啲...自然反應...突然消失晒...
逆行者見我呆晒咁...立即一腳踩落我胸口：「死開吖！」
我被逆行者一腳踩開！失晒重心咁向後退咗幾步！
逆行者一個蜈蚣彈就彈起身！再衝向我面前斬幾刀！
我完全冇晒頭先嘅反應！只係識得用匕首鳩擋兩嘢！
“嗡！嗡嗡！嗡嗡嗡嗡嗡！”逆行者向住我亂刀咁揮！
『嗚！呀...嗚！呀！』我一邊後退一邊用匕首鳩擋...但完全擋唔到！身上已經有多處地方被綠光刀刃斬傷！
大量紅色粒子由傷口飄出！
「頭先唔係好勁㗎咩？！」
仆...街...
「做乜而家手軟腳軟咁呀？！」
呢次仆街喇...
「精神能量耗盡喇？！」
呢次真係...
「冇料扮四條！」
逆行者用精神刀柄一鑿！鑿落我額頭！再一腳踢落我個肚！
『嗚呀！』我成個人就飛後幾米遠...再喺地上碌咗幾圈...坐喺地上！
逆行者一步一步咁行到嚟我面前...雙手舉起綠光刀刃：「收！皮！啦！」
呢次真係...真係...
就喺逆行者正要向我使出袈裟斬之時...我感覺到...有道氣息...
呢道氣息係...
逆行者都感覺得到...立即回身一擋！
“鈴鈴”
“嗡！吱！”逆行者擋住神秘商人從後直砍嘅偷襲！
冇錯！呢度氣息...正正就係頭先走佬嘅神秘商人！
逆行者同神秘商人互相踢對方一腳之後...拉開距離！
「二對一...嘖！」逆行者立即向後一跳！再跳！逃走！
走咗...越嚟越遠...逆行者嘅氣息...遠到...感覺唔到...
“鈴鈴”
好喇...好喇...
“鈴鈴”
「要盡快離開呢度...唔係嘅話好快會有更多逆行者...」
好攰吖...
「喂你...你冇事吖嘛？」
好眼瞓…
「喂你唔係...唔係要進入深層睡…」
“鈴鈴”
四肢乏力…
…
..
.