《香港傭兵》: [Day 21－現在過去] PART 15
“颼～颼～颼！”喺狂風推送之下，阿月挨一挨埋我身邊～
「嘩嘩嘩～真係吹走喇～」阿月捉實我手臂～
『小心吖～小心吖～』我都捉實阿月～
「真係好鬼爽皮吖～～～」阿月又試圖迎著風～
『喂睇住吖～唔俾風吹走，都好易吹到頭痛㗎...』咁鬼大風又吹到咁應仲要不停咁撲埋嚟...
「你就頭痛～」阿月又恥笑我～
『我先唔怕～我咁浪子～你聽日唔好頭痛到要我孭你落山～』我企直個人，跟住阿月迎著風～
「花哈哈～浪子喎～你咁鬼弱，我孭你就差唔多吖～」阿月對我莞爾一笑～
『你睇我而家，企得幾穩～邊似得你咁，要捉實我～』我又再企得穩啲～企直個人～
「你算罷啦～睇吓邊個企得穩啲耐啲～」阿月推一推我，就喺我身邊企到直一直～
『好吖好吖～睇吓邊個俾風吹走先～』我就同阿月鬥企定定～
“颼～颼～颼！”狂風無情咁撲埋嚟！
我同阿月都不甘向對方示弱！企到硬一硬！
企咗都一段長時間...好型又好瀟灑咁吹多一陣風...
『哎...哎...哎吖...』我都係頂唔順首先被風吹郁...
「花哈哈～都話你弱㗎啦～」阿月好開心咁彈彈跳跳～
『係係係...』係我讓你姐...唔係嘅話企到今晚啦...
「好喇好喇～時候都唔早喇～要開始紮營喇～」阿月跳多兩跳～就拎部電話出嚟～
『嗯...』扎營...
“颼～颼～颼！”風伯伯...可唔可以唔好吹得咁勁住？
俾我哋紮起個營先喇好嘛？
「呢邊呢邊～呢邊好似幾好～」
『嗯嗯～』
我同阿月兩個人，喺間石屋旁邊...
「唔係咁...唔係咁～」阿月拎住部電話喺手，邊上網睇說明，邊指指～
『係唔係㗎...』我就雞手鴨腳...
「係咁㗎～係咁㗎～呢度係咁寫㗎～」阿月指住部電話～
『哦...哦...嘩！』我就左手左腳...
「揸穩啲～用力啲～再用力啲～」阿月幫幫手～
『揸穩咗喇...好大力㗎喇...嘩！』
「拎嗰個俾我...唔係呢個吖～嗰個嗰個～」
『呢個吖嘛～係喇嘛？』
右手右腳...
「唔係吖～嗰個吖～」
『你唔係話呢個咩？』
甩手甩腳...
「就得喇...差少少...仲差少少...」
『掂喇！掂晒喇！』
鳳爪排骨咁搞咗好耐...幾經辛苦，終於都紮好咗個營...
『嘩...痴線㗎...真係痴線...痴線㗎真係...』我將其餘嘅物資都放入個營裡面先...
「花哈哈～都話實掂㗎啦～坐陣先～坐陣先～」阿月都將其他物資放晒入嚟～
“颼～颼～颼！”
“啪啪啪啪啪啪啪啪啪啪啪啪啪啪”
“颼～颼～颼！”
“啪啪啪啪啪啪啪啪啪啪啪啪啪啪”
『大風到吹到啪啪啪啪啪啪啪啪啪啪啪啪啪啪聲～真係好勁囉～而家都大風成咁...夜晚會唔會仲誇張啲？』我有啲擔心...如果再大風啲，會唔會真係連人帶營吹落山...
「上網睇話夜啲真係會再大風啲㗎～」阿月望住部電話，「不過我諗我哋兩個加埋應該冇咁易吹得走掛～」
『真係吖...我哋兩個加埋先夠吖...』一個嘅話必定吹走...
「係吖～再加埋個袋囉...電筒囉...各樣那樣囉...應該夠晒㗎喇～」阿月繼續喺個背囊裡面拎啲電筒吖...幾支水吖...
『係喎...點解冇雙人睡袋㗎呢？』我都放好個睡袋...
「咩雙人睡袋吖？點睡吖？你個腦吖～」阿月又恥笑我～
『兩個一齊瞓埋同一個睡袋冇咁易吹走吖嘛～』咩我個腦姐～你個腦又好好吖？
「係吖係吖係吖～返到去你先自己整啦～而家就出去睇風景先～」阿月就起身行出個營～
『喂喂等埋等埋...』我都立即跟住阿月～
一伸個頭出去...
“颼～颼～颼！”出面真係大風到痴孖肺...
我啲頭髮就俾啲風吹到成隻Angry Bird咁...
真係顧得個頭又理唔到個髻...
「喂喂～過嚟呢邊睇吓～」阿月已經走到去遠遠嘅另一間石屋旁邊...
『嚟緊...嚟緊...』我就抵住風咁跑向阿月身處嘅位置...
「你睇你睇～」阿月拉一拉住我～「呢度睇個景幾靚～」
『係喎係喎...』真係好靚喎～大自然嘅景色～
「真係好～星期六都冇人上嚟～」阿月一個自轉～
『係囉...真係估唔到...又話好多人上嚟嘅？』平日就話唔見姐...今日仲要係星期六喎...
「咁咪好囉～成個大東山都屬於我哋嘅～」阿月又走去另一邊～
『喂喂喂小心吖！成個山頭都冇人，有咩事真係得我救你㗎咋！』最慘係我都唔知自己救唔救到你嘛！
「你顧掂你自己先講啦～唔好要我救返你轉頭吖～」阿月就喺山頭上面走嚟走去～
我就一路跟住阿月跑～
阿月就好似一隻蝴蝶咁～喺空氣之中，拍吓拍吓對翼，輕舞～輕舞～
自由自在咁，喺空氣之中輕輕舞著舞著，都足以吸引世人嘅目光～
而我...就係其中一位世人...仲要係一直...一直...吸引住我...目不轉睛...眼中就只有阿月...輕舞...飛揚...
喺一大片人跡罕至嘅山頭上，跟住阿月又跑又跳又彈兩彈～
『喂喂...等等先...嗄...』跑唔夠幾步，我又頂唔順喇...
「乜你真係咁弱㗎～」阿月轉身行返轉頭，走過嚟扶一扶我～
『山嚟㗎...咁大運動量會缺氧㗎...嗄...嗄...高山症喇...嗄...嗄！』唔得唔得...真係頂唔順...要抖抖...要抖抖...
「呢度有幾高吖？高山症～你真係好鬼弱㗎～」阿月扶住我，半帶恥笑咁打量住我～
『係你無限能量咁姐...』痴線㗎真係...阿月都唔知係唔係人類嚟㗎...
「係你舊電壞咗吖～」阿月冇我咁好氣咁擰擰頭，再望望風景，「呢度嘅景色真係好靚～好彩冇帶相機嚟姐～」
『吓？點解唔帶相機先係好彩呢？』我又唔明喇...阿月句嘢怪怪地咁嘅？
遇到咁靚嘅景色，唔係應該要用相機影低...留下倩影咩？
「咁靚嘅景色就梗係留喺心裡面㗎啦～」阿月滿心滿足咁望住風景點點頭～
『留喺心裡面？』咁影埋相做Backup唔係更好咩？
「掛住影相，又依賴有相做Backup，就唔會用自己對眼去睇～更唔會好好咁記喺心裡面～」阿月又點點頭～
『哦～都係嘅...』掛住點樣去影靚相...
「你明吖？」阿月碌大對大眼仔住望實我～
『我明～掛住點樣去影靚相就錯過用肉眼欣賞美麗嘅風景～依賴有相做Backup...就唔會用心去記住吖嘛～』講到咁白都仲唔明？
「你終於開竅喇～」阿月拍拍我膊頭～對我莞爾一笑～
『許～係你成日睇小我姐～』你係叻～但我都唔係蠢嘅～
「係喇係喇～你睇～黃昏幾靚～」阿月指住大大個蛋黃～
『係喎～真係好靚～』拖住阿月隻手仔...望住夕陽...
此情此境...又要...
『夕陽無限好～好好好好～天色已黃昏～昏昏昏昏～』又要唱歌仔～
「喂喂喂...你唱歌好難聽吖...」阿月冷眼咁望住我...
『我？我喎？我唱歌就梗係難聽㗎啦～』我又唔係陳奕迅～
「咁你就唔好唱啦～」阿月望返個夕陽～
『有Feel吖嘛～本想去憑愛，去換最燦爛一生～』我唱到走晒音～
「喂...夠喇...唔好大煞風景好唔好...」阿月一手撳住我個嘴～
『唔唔唔...唱埋呢句～唱埋呢句～想不到長吻，帶來更永恆傷感～～～』個感字拉到勁長又勁有感情～
「喂吖！」阿月再一手撳住我個嘴！
『唔唔唔...唔唱喇唔唱喇...』唱兩句都唔俾...
「咁就乖乖地欣賞啦～」阿月拖住再拉實我隻手～
『嗯～』我都拖實阿月隻手仔～
喺人跡罕至嘅爛頭營上，同阿月欣賞住日落黃昏景緻～
天...漸漸由黃變橙...由橙變紅...由紅變藍...深藍....開始黑...已經天黑...
“颼～颼～颼！”風仲要越吹越猛...“颼～颼～颼！”越吹越狂...
『喂喂...得唔得㗎...會唔會搞到變山火㗎？』我坐喺大大個Gas爐前面，護住阿月起緊個爐...
「放心喎～一定無事嘅～」阿月起勢咁扭個打火器～
“啪...啪...啪啪...啪啪啪...啪啪啪啪...”
『係唔係真係得㗎...不如等我嚟啦...』我望住有啲雞手鴨腳嘅阿月...
「嘩你唔好吖你...俾你搞...爆炸都似...」阿月仲係好專心咁扭...
『你咁講我仲驚喎！』一陣真係俾你搞到爆炸咁點算...
「喂喂...咪走開啦！啲風吹晒過嚟點撻吖？」
『我驚爆炸吖嘛...』
「你搞就會！我搞就一定唔會！」
“啪啪...啪啪啪...啪啪啪啪...啪！”幾經辛苦，終於起到個火！
「得咗～嗱～我都話一定得㗎啦～」阿月啪一啪雙手～
『我冇話你起唔到個火...我係話怕會爆炸姐...』唔好睇少Gas爐...爆起上嚟都好甘...
「都話整到爆炸嗰個係你咯...」阿月送咗對冷眼俾我...
『係係係～我唔掂㗎喇～唔掂㗎喇～一陣爆起上嚟唔好賴我吖～』唔關我事～唔關我事～爆炸都唔關我事～
「係喇係喇～好喇好喇～我去拎啲嘢食出嚟先～你睇住個火～」阿月拍拍籮柚拍拍手，向住個帳篷行過去～
『我唔掂㗎～我唔掂㗎～』
「叫你睇咋嘛～都冇叫你掂～」
望住個火俾風吹到擺吓擺吓...
Gas爐嘅火都俾風吹到咁...
我用雙手護一護住個火...
你唔好熄吖...一陣熄咗又要阿月再起過...到時真係爆炸就大鑊㗎喇...頂住吖...唔好輸俾啲風吖...
「嚟嚟嚟～煮嘢食～」阿月左手拎住包牛扒～右手拎住包雞翼～仲有包牛油～彈吓彈吓咁彈過嚟～
『正吖喂～上山登膠食牛扒雞翼真係一流吖～』我都流晒口水～
起初真係諗住是是旦旦求求其其公仔麵加條腸就算㗎啦～
邊諗到會咁豐富吖～
「跟著我你有口福喇～」阿月得得戚戚咁望一望我～
『係喇係喇～食到你就最有口福～』我又古古惑惑咁打量住阿月～
「你個腦吖～你個腦吖～」阿月又恥笑我～
『咁你啲82年利賓納呢？』我又古古惑惑咁打量住阿月～
「吖～你提醒咗我添～」阿月放低咗啲牛扒雞翼牛油之後，又彈吓彈吓彈返去個帳篷裡面～
呢個阿月真係吖～