《香港傭兵》: [Day 23－殺戮特區] PART 01

喺...草原上...野草都長到上腰間...

四周都藍藍地...藍藍地...總係好似有一層...薄薄嘅藍色所包圍...

藍...成個空間都藍...總係好似鋪上一層薄薄嘅藍...

呢度係邊度？我...喺邊度...

我左望...右望...望望四周...再遠啲...有樹...大樹...



一棵棵大樹...長得好大...好高...十幾層樓高...

嗰啲係...咩樹嚟？點解可以長到咁高？

而喺大樹之間...仲有一棟棟...建築物...破爛嘅建築物...

破爛建築物嘅外牆掛咗唔少蔓藤...藍藍嘅空間...綠綠嘅蔓藤...

呢度...究竟係...咩地方？



而喺我面前...十米以外...企咗一個...黑色身影...

喺茂密嘅長草之間...再睇清楚啲...呢個黑色身影比較細粒...矮過我唔少...

被長草遮掩咗差唔多大半個身嘅黑色身影...佢身上著住嘅...有深色皮甲喺面嘅黑色長袍...

再睇清楚啲...唔止有皮甲喺面...仲有啲金屬板...裝甲...

由布...皮甲...同金屬裝甲縫製已成嘅裝備...



而頭部就笠起咗頂帽...仲戴咗面罩...睇唔到個樣...

“飃...”喺微風輕輕吹動長草之間...我仲隱約見到...佢腰間仲好似...有把...日本刀...

究竟...呢個神秘人...係咩人？

而我...喺我身上嘅係...輕皮甲裝？！

點解...會係...

再睇清楚啲...護手...護碗...護臂護腿護肩護胸護甲...全部都係以皮革製造！

呢身裝備...係咩裝備嚟㗎？

我望返住神秘人...同時我左手拔出綁喺大髀上嘅匕首...



黑色刀身...銀色刀刃嘅匕首...

銀色嘅刀刃散發出陣陣嘅寒氣...鋒利無比...

而刀身上仲刻有...刻有...SPIRIT？！

神秘人都微微彎前個人...前後腳...左手放喺腰間嘅刀柄上...向住我...

呢種情況...似係...一對一決鬥...

我...點解會同眼前呢個...神秘人決鬥？

“飃...飃...”微風吹動茂密嘅長草...擺動...擺動...



我同神秘人互相望實對方...喺擺動緊嘅長草之間...留意住對方...

然後...當微風停下...當茂密嘅長草都停下嘅一瞬間...

神秘人以忍步向我極速接近...

好快...超快...只係一瞬間就跑到嚟我面前...同時向我拔刀一閃...

“嗡！砰！”我以匕首擋住神秘人嘅拔刀一閃...同時長草叢被佢斜斬出一個半月形...

望一望神秘人手上把日本刀...黑色夾層刀身...銀色刀刃...複合式製造...

神秘人立即再向我揮幾刀...

“嗡！嗡！嗡嗡！”我左閃...右避...身邊嘅長草都被佢斬斷...



好鋒利...只要被刀刃接觸嘅一瞬間...長草都立即一分為二...喺空氣中隨風飛舞...

“嗡嗡！砰！嗡！砰！嗡！”我邊後退邊閃避神秘人嘅橫斬直砍...再以匕首擋住佢嘅迴身半月斬再跳後兩步避開佢嘅袈裟斬...

非常熟練...神秘人嘅刀術...

神秘人一收刀...再立即向我使出居合拔刀氣刃斬...

我立即彈後一步...神秘人嘅寒氣刀尖剛好就喺我胸前劃過...同時長草叢被佢斜斬出一個滿月...

太囂張...竟然睇小我...夠膽向我一直進攻...而家仲要用個背脊對住我...

我都以匕首向神秘人展開攻擊...



我一刀刺向神秘人背脊...

“嗡！砰！”神秘人立即轉身用刀刃一擋...

我再向神秘人一刺一片再片再刺...

“嗡！嗡嗡！砰！”神秘人用刀刃邊擋邊避...

我每一刺一片...都係對住神秘人嘅心藏...喉嚨...要害攻擊...

神秘人嘅防禦同迴避動作都好快...睇嚟都係經歷過多次...無數咁多次...殺人...出入生死之間...無時無刻面對死亡...唔係你死...就係我亡...生存喺殺戮之中多時嘅生還者...

身體每一個細胞都係為求生而活動...

“嗡嗡！砰！嗡！砰！”我再向神秘人刺兩刀...佢以刀刃擋完再避之後...向我反擊...

神秘人向我橫斬直砍...

我一避再以匕首一擋...沿住神秘人把刀刃反片過去...

神秘人一避再向我揮兩刀...

“嗡！砰！嗡嗡！砰！嗡！嗡嗡！砰！”我同神秘人就喺長草之間你攻我防...我刺你擋...互有攻守...

長草叢都被我哋斬刺砍片到斷開晒...隨住微風喺空氣中輕舞...飛揚...

秘神人想利用佢把刀刃長度嘅優勢...拉住一個中近距離同我對打...

就算係對我進攻又好...對我嘅進攻作出防守都好...秘神人都係一直拉住一個中近距離...

但我就一直想再拉近啲...再拉近啲個距離...

我手上嘅武器...匕首...只有拉得越近...先會越致命...

“嗡！砰！嗡嗡！嗡！”我再向秘神人條頸片兩刀...引秘神人避開我再反斬一刀之時...

“砰！吱！！！”我以匕首一擋...再沿住神秘人把刀刃順勢拖埋去...

我極速貼近神秘人...以匕首格住佢把日本刀...一手捏住佢條頸...

喺咫尺嘅距離...電光火石之間...我望到...神秘人嘅銀灰色肩甲之上...有一個...一個紅紅地...甩甩地色...褪褪地色嘅...圖案...

呢個圖案係...解放軍嘅...軍徽？！

一個紅紅地...甩甩地色...褪褪地色嘅...

雖然...雖然已經睇唔清...已經又殘...又多損傷...

之但...之但係...

“砰！嗡嗡！”神秘人趁住我稍一分神...立即推開我...向後邊彈跳...邊揮兩刀拉開距離...

雖然...雖然喺電光火石之間...只係睇咗一眼...已經甩色甩到唔係好認到...

之但係...的確...的確係傳說中嘅解放軍軍徽...

傳說中...呢個曾經稱為香港嘅地方...西邊某個小島...有一個世界以外嘅軍隊...名為解放軍嘅基地...

傳說...我地而家呢個地方...係屬於一個叫“中國”嘅國家...

中國有國家嘅軍隊...名為解放軍...

而香港呢個地方...亦駐有解放軍...

西邊某個小島...就係佢哋嘅基地...

而家嘅中國...一直都喺外面...包圍...亦久唔久都會派人入嚟...喺外圍嘅地方...調查...

而西邊某個小島...而家已經變成著住解放軍裝甲嘅食人怪物...

點解眼前呢個神秘人...肩甲上有解放軍軍徽？

佢絕對唔係食人怪物...

佢有意識...同班怪物唔同...

係喺邊個區域...天上？定地上？

屬於邊個組織？

睇佢身上嘅裝備...睇唔出...就係睇唔出...

好似樣樣都有啲...而家仲要有...解放軍軍徽嘅肩甲...

唔通係....係拾荒者？

佢都有去過...西邊小島？

應該都係...佢有去過西邊小島...執到肩甲...製造自己嘅裝備...

假如真係入到去...又平安咁出得返嚟...呢個人...一啲都唔簡單...真係要認真對付...唔係嘅話...呢度就係我嘅終點...

我反手手持匕首...向神秘人擺出防禦姿勢...

神秘人收刀...微微彎前個人...前後腳...左手放喺腰間嘅刀柄上...向住我...踏前一步...立即以忍步向我使出一閃...

“嗡！砰！”我立即以匕首一擋...打算再沿住神秘人把刀刃拖埋去...

“吱！”但今次神秘人嘅反應快咗好多...匕首都未拖到埋一半...佢就一個轉身再用力抽刀一推...將我推後兩三步...

當我仲失緊平衡...向後退緊之時...神秘人再追上嚟揮兩刀...

“嗡！嗡！”我緊急迴避後，一站穩陣腳就想立即反擊神秘人...

但神秘人早就有準備咁...立即揮兩刀同時彈後一步...

拉唔近...仲係處於中近距離...喺神秘人刀刃最有利嘅距離...

“嗡嗡！砰！嗡！砰！嗡嗡！”繼續與神秘人喺廣闊嘅草原上拉鋸...

一大忽又一大忽草叢被我哋嘅刀光劍影斬斷...隨住微風喺空氣中輕舞...飛揚...

唔得...比起頭先...更難...更難拉近距離...

試過一次之後...神秘人進步咗...更加難拉近個距離...

我錯過咗...錯過咗一次解決佢嘅機會...

唔係頭先...解放軍軍徽...我就已經殺咗佢...

點會犯呢種錯...喺弱肉強食嘅世界裡求生...一次機會...好有可能就係唯一一次機會...

錯失咗...被殺嗰個...就會係自己...

喺廣闊嘅草原上...冇可能拉得近個距離...勝算接近零...

點好呢...應該要...

一邊同神秘人交手...一邊偷偷望...樹...大樹同建築物嗰邊...

好啦...

“嗡嗡！”我向神秘人片兩刀之後...立即轉身向住大樹同建築物方向跑...

神秘人亦跟住我背後跑...

果然...唔係佢死...就係我亡...冇得逃跑...

之但係...神秘人同我保持住一定距離咁追住我...

好小心呢...怕我會轉身突擊...呢個人...真係身經百戰...

究竟我係唔係真係再有機會殺到佢？真係要試過先知...

“㗳 㗳 㗳 㗳 㗳”喺長草之間跑咗一段路...衝入樹林...

再入啲...再跑得入啲...

跑到入幾棵大樹同長滿蔓藤嘅建築物之間...我轉身向神秘人突擊...

“嗡！砰！”神秘人反應都好快...立即以刀刃一檔再反斬...

不過身邊都係大樹同廢棄嘅建築物...神秘人嘅攻擊受到限制...

其實都唔止係攻擊...就連擋格都係...

“嗡！砰！嗡嗡！”神秘人並唔可以完全靠刀刃擋格...好多時仲要勉強迴避我嘅攻擊...

同時...我越貼越近...每一次攻擊都可以拉近我同神秘人嘅距離...

多大樹...多建築物...多障礙物嘅地方...果然對我有利...

“嗡！嗡！”神秘人揮多兩刀...差啲砍中大樹...斬中長滿蔓藤嘅牆身...

睇嚟佢都應該心知不妙...走咗入嚟呢個...天然陷阱...

今次...我唔會再錯失機會...唔會俾你有機會出返去...

“嗡！砰！“神秘人以刀刃擋開我一片...向後退兩步...

我就反手手持匕首...以忍步迫向神秘人...

神秘人一穩住步腳...就立即向我揮刀一砍...

“嗡！”我巧妙咁側身避開...同時...直接用匕首片向神秘人條頸...

神秘人嘅攻擊動作仲未完成...只能勉強以徒手捉住我前臂...

我再順勢一腳掃神秘人後腳...將佢掃低...

喺樹影之下...就喺神秘人失晒重心...就喺我反手手持匕首壓向神秘人條頸...壓到落草地之時...

神秘人頂帽揭起咗...面罩亦同時鬆開咗...我亦都...停咗...

我手上把匕首壓住神秘人條頸...停咗落嚟...

我冇兜嘢片落去...只係降住咗神秘人條頸...

我望住...望住神秘人嘅面容...冰冷嘅面容...中間分界...短髮...兩邊卻留有長長嘅鬢髮...

神秘人...神秘人就係...

『綽...綽姿？！』

剎那間...整個空間由薄薄一層藍...變成灰色...草地都變成灰色...分裂...分裂...

分裂到綽姿嘅鬢髮之間...冰冷嘅面容之中...粉碎...飄散...