《香港傭兵》: [Day 23－殺戮特區] PART 10
竟然會喺呢個時候有緊急委託...
而且委託仲要係...“清算西貢獻命”...
單睇個標題...基本上都已經知要做乜...但都要撳入去睇睇...
喺個緊急委託嘅任務裡面就寫住...滅絕所有在屯門裡的西貢獻命...收集他們身上的完整紋身...每個10 Sil...
每個就只係值...10 Sil...走狗果然唔值錢...
之不過...咁講法...只要殺得越多...報酬就越多...
西貢獻命有咁多人...殺晒佢哋...報酬都唔少...
咁又會係咩人委託我哋去清算佢哋呢？
我再睇睇...竟然真係有列出委託人係...國安局？！
竟然係...國安局...
解放軍就一定唔會...我哋已經反咗面㗎喇嘛...等我仲以為...會係我哋SPIRIT自己想鏟除西貢獻命...好等我哋有個乾淨嘅地方同解放軍大戰添...
不過...國安局委託我哋SPIRIT...而且仲要係緊急委託...睇嚟都好大手筆...
『你哋都收到...強迫委託？』我望望佢哋三個...隨口噏咗句廢話...
「嗯...唔止...」日倫點完頭再擰擰頭，「唔止我哋...仲有其他...行者...」
仲有...其他行者？
我立即睇睇成員...唔止...唔止有其他行者...仲有好多...好多好多...
就咁睇個List...數以百計嘅稱號...碌幾碌都未到底...
咁多...竟然有咁多行者參與...咁講法...同狩獵有咩分別？
唔怪得知...逐個紋身計...收集紋身越多...就越多報酬...
竟然...竟然會有咁嘅玩法...
「今次弊...」綽姿好緊張咁撳撳部電話，放喺耳邊，「喂！你而家喺邊？聽住！留喺屋企！唔好出去！聽到咩聲都唔好八卦！唔好望出去！總之聽我講！留喺屋企！鎖好門窗！」
係打俾茵婷？
睇綽姿咁緊張嘅樣...一定係...
「記住記住記住！我夜啲會打俾你！係咁...」等到綽姿收咗線之後...
“砰！砰砰砰！砰！砰！”出面就傳嚟槍聲...
好遠...距離呢度都好遠...不過就好響...
日倫望一望出窗外：「開始喇...」
「嗯...」羅羅點一點頭，「我哋都要快啲喇...唔係嘅話...就俾其他行者殺晒...」
「嗯...」日倫行入我同阿月間主人房...
過咗一陣...
日倫就拎咗...四支Level 3出嚟：「因為唔知要搞幾耐...都係用Level 3穩陣。」
『Level 3...』我由日倫手中拎起支Level 3精神液...『咁就真係要落力啲先抵到數...』
綽姿同羅羅都各自由日倫手中拎起支Level 3後...綽姿眼定定咁望住手中嘅精神液...
『做咩？』我望住綽姿...
「冇...」綽姿拎拎頭...
然後...我哋四個同時用力一捏...
手中嘅精神液立即粉碎...分散成紅色嘅粒子...
無數發住紅光嘅紅色粒子就喺我左手手掌中飄出...飄到去手背...
手背上出現一個發出紅光...倒轉咗嘅五角星...
寒意由手背傳遍手掌…傳到手臂…全身...
當道寒意游到上頭之時…
「媽咪...媽咪喺邊吖...嗚嗚...」女仔聲...
「好驚...好驚吖...」又女仔聲...
「點解...郁唔到...手手...腳腳...好凍...好...好...凍...救...救命...救...」又係女仔嘅...求救聲...
“吱！”突然個頭痛一痛！
“吱！吱！！！”刺痛...好似被針吉咁！
『呀...』我雙手撳一撳住個頭！
痛...痛...
「呀...」就連綽姿都雙手撳住個頭...
仲係...仲係好似...被針吉...一支又一支...好多支針...逐支逐支咁...吉入個...腦...
做乜...點會...
我同綽姿雙手撳住個頭好一陣子...
然後...慢慢...慢慢...再冇針吉入...刺痛嘅感覺...消失...
羅羅扶一扶住我：「你哋冇事吖嘛？」
『冇...冇...』我擰擰頭...望一望綽姿...
綽姿都擰擰頭...又呆咗咁諗一諗...
消失晒...被針吉嘅刺痛...好似從來都冇出現過...
冇任何殘留嘅痛楚感覺...就只有...似是而非嘅記憶...
“砰砰砰！砰！砰！”出面都仲係有唔少槍聲...而且都仲係幾遠...應該...至少遠到去安定...友愛嗰邊...
羅羅就雙手翹住我手臂：「好喇～大家都精神化咗喇～咁我哋不如分Team啦～」
『分Team？』係想...兩個人一Team？
日倫點點頭：「分Team都好...西貢獻命嘅人多...但只係普通人...分Team進行有助我哋獵殺得比其他行者多。」
的確係咁...
對住西貢獻命呢啲冇得精神化嘅普通人...一刀一件...
唔好話兩個人一Team...我哋四個獨自行動都綽綽有餘...
羅羅帶住真誠嘅笑容點點頭：「嗯嗯～啱吖啱吖～咁我哋就不如...分Team鬥殺得多～」
鬥...殺得多...
綽姿都點點頭：「咁我同吞噬一Team...妖邪同黑影一Team...」
羅羅立即谷起面豬登：「吓...點解喎...我想同吞噬一Team喎...」
綽姿擰擰頭：「吞噬係我嘅隨行者...應該要同我一Team...」
羅羅再谷住塊面豬登：「咁你快啲死咗去...吞噬就跟我啦～」
日倫企喺羅羅同綽姿中間：「好喇好喇...再唔快啲就真係俾人獵殺晒㗎喇...就跟解瓦咁分啦。」
“砰砰！砰！砰！”出面嘅槍聲此起彼落...
羅羅谷到就快噴紅色粒子：「哼...瓦解話事囉～」
又會咁...順攤？
等我仲以為羅羅會...死纏爛打...
我唔係話失落...只係以為羅羅同綽姿總係貼錯門神咁...總係鍾意乜都鬥一餐...
又估唔到...今次唔鬥姐...
或者真係時間緊迫...
或者...或者...或者係...
日倫就一邊拉高衫領...笠起頂帽...一邊行近窗邊...打開隻窗：「咁好啦...行動。」
日倫向窗外一跳...羅羅同綽姿都拉高衫領...笠起頂帽跟上...
我都不敢怠慢...立即拉高衫領...笠起頂帽向窗外一跳...
我哋四個就由六樓俯衝落地面...
喺馬路旁邊嘅行人路著地...羅羅就立即拉住日倫跑向警署方向：「唔准跟住嚟㗎！」
望住羅羅同日倫嘅背影越跑越遠...
『我哋應該去邊？』望望四周...
“砰砰！砰砰！”槍聲都好遠...
「我...冇西貢獻命情報...」綽姿擰擰頭...
『咁樣...』邊度會多啲西貢獻命嘅人...
「呢啲都係調查型行者會比較清楚...唔怪之得...嗰個妖邪今次咁順攤...」綽姿好似恍然大悟...
如果單單喺街上搵西貢獻命嘅人嚟殺...唔夠多...
「佢一早就諗住可以借助黑影嘅情報...可惡...果然詭計多端...」
應該要...喺邊度落手...
「睇嚟要上情報庫買...」
應該要...搵到第一個...
「之但係...而家上情報庫買...一定變得好貴...」
邊度可以搵到第一個...十字路...我望住...十字路口...
「就算貴都要...」
正當綽姿想拎部電話出嚟...我撳一撳住佢隻手...
綽姿冇再打算拎部電話出嚟...只係企定定望住我...
我就望住十字路口方向行...行出馬路...一步一步...向住十字路口方向行...
綽姿就喺行人路上跟住我...慢慢行...同我保持一段距離...比我行得慢...
我就一步一步...一步一步...行到去十字路口嘅中間...企定...
企定定...企定定喺十字路口嘅正中心...聽一聽...留心聽一聽...
“砰砰！砰砰砰！”我聽到遠處有唔少槍聲...
“砰！砰砰！吱～砰砰！吱！”仲夾雜住...引擎聲...
“吱～砰！吱！砰砰！吱...”係由電發動嘅引擎聲...
我望住新墟方向...馬路嘅盡頭...一個彎位...剛好就有一架白色輕型貨車轉出嚟...
係...西貢獻命嘅輕型貨車...
“依！吱！”白色輕型貨車一轉彎出嚟...立即加速...
已經以高速衝咗一段距離...喺呢個距離...佢一定見到我企正喺馬路中心...
“吱！吱～”冇任何減速...冇任何偏移...直衝埋我身處嘅位置...
係想...直接撞向我嘛？
好...
我微微彎前個人...前後腳...左手放喺腰間嘅精神刀柄上...對向住㗎白色輕型貨車...
“吱～”白色輕型貨車向住我勢凶夾狼咁衝埋嚟...
我望住白色輕型貨車越嚟越近...越駛越近...
就喺接近到...就只有兩架私家車嘅距離...肯定想兜口兜面撞埋嚟...我用力踏前一步...就以極速衝向白色輕型貨車...
好快...超快...只係一瞬間就差唔多閃到埋去白色輕型貨車身邊...
我就喺架白色輕型貨車嘅右邊車身使出居合拔刀氣刃斬...紅光刀刃亦隨即亮出...
“嗡！吱！！！”紅光刀刃將白色嘅輕型貨車右邊車身連車轆打橫斬開...
擦住咁斬過之後...“嗡！”我一個轉身...就望住架白色輕型貨車失控咁...橫瞓喺路面上...滑行住咁鏟埋石壆...
“砰啪！”撞埋石壆停定後...並冇發生爆炸...
可能係電動嘅關係...乜都好...冇爆到就最好...
我手持住發出紅光刀刃嘅精神刀...一步一步...一步一步向住瞓喺路面上嘅白色輕型貨車行近...
行近多幾步...仲有成個路口加一段距離...白色輕型貨車嘅車門就打開...
然後...就有三...四個西貢獻命嘅光頭佬爬出車廂...
四個西貢獻命光頭佬都手持長槍...一仆一碌咁由輕型貨車跌落地上...左搖右擺...腳軟軟咁企返起身...
四個西貢獻命嘅光頭佬站穩陣腳後...都同時用長槍指住我...
“砰砰砰！砰！砰！砰！”子彈就向住我飛埋嚟...
我望住一粒又一粒子彈...緩慢咁飛埋嚟我身邊...我面前...
好幾粒都唔係好準...向住身邊飛過...
我輕輕一避...一閃...已經避開幾粒...
然後又有十幾粒向住我面前飛埋嚟...
我就一邊Keep住向前行...一邊輕輕揮動精神刀...
“嗡嗡！嗡嗡嗡！”將飛埋嚟嘅子彈逐一擋住...
不停揮動精神刀...子彈一接觸到紅光刀刃...立即化成輕煙...
一路向前行...向住四個正向我亂槍掃射嘅西貢獻命光頭佬接近...一路揮動精神刀...
“嗡嗡嗡！嗡嗡！嗡嗡嗡！”紅光刀影閃過不停...
一粒又一粒子彈一接觸到紅光刀刃...都立即化成輕煙...
然後...差唔多...接近到差唔多距離...我冇再等佢哋再向我亂槍掃射...
我用力踏前一步...瞬間就閃到去企得最前嘅西貢獻命光頭佬面前...
我立即揮動手中嘅精神刀...
“嗡！嗡嗡嗡！嗡嗡！嗡！”先將西貢獻命光頭佬手上嘅長槍斬開幾件...再隨即喺佢身上斬兩刀...接住一刀橫斬落佢條頸...
頭顱隨即飛到上空中轉兩個圈...
“啪...啪啪...”人體殘骸就散落地上...
然後個頭顱都未跌落地...我就立即閃過去另外兩個西貢獻命面前...
“嗡嗡！嗡嗡嗡！嗡嗡！嗡嗡！”再將兩個西貢獻命光頭佬手上嘅長槍斬開幾件...隨即喺佢哋身上各斬兩刀...接住一刀橫斬落佢哋條頸...
兩個頭顱隨即飛到上空中轉兩個圈...
“啪...啪啪...”人體殘骸就散落地上...
就喺呢個時候...
「喂！你咁斬斷條頸...個紋身咪唔完整囉...」綽姿喺我身後遠處嗌過嚟...
咁樣斬斷條頸...個紋身唔...完整...
我望住仲有一個西貢獻命光頭佬...
個西貢獻命光頭佬手震震咁拎住支長槍指住我...腳軟軟咁向後退兩步：「唔好...唔好...放過我...求求你...放過我...」
我向住個西貢獻命光頭佬行過去...再行近兩步...
「唔好...唔好呀！！！」西貢獻命光頭佬向我亂槍掃射...
“砰砰砰！”子彈向住我飛埋嚟...
“嗡嗡嗡！”我揮動手中嘅精神刀刃...擋幾十粒子彈後再向住西貢獻命光頭佬嘅面頰橫刀一斬...
“嗡！”西貢獻命光頭佬嘅半個頭顱就飛到半空中...
「吖...吖...」西貢獻命光頭佬向前一趴...
“咚...”半個頭顱就跌到落地上...
我回頭望住綽姿：『咁樣得喇掛...』