《香港傭兵》: [Day 24－三合成立] PART 27
散喺路面上...魂導兵D嘅殘骸慢慢化成紅色粒子...
飄到上嚟我同綽姿面前...喺空氣中飄散...消失...
我同綽姿都收返好把精神刀柄喺腰間...然後以忍步喺公路上疾跑...
喺幾架私家車同貨車之間穿過...跑咗唔係好耐...就已經見到車尾被撞到凹晒嘅黑色Benz...
仁慈見到我同綽姿跑緊過去...佢都減慢車速...
我同綽姿就一左一右咁跑到去車旁兩邊...打開後座車門...上車...
“啪！啪！”一上到車...閂返埋車門...
「真係唔同咗喎～」仁慈望一望倒後鏡中嘅我～
『吓？』我回頭望一望車後...睇睇仲會唔會有追兵...
仁慈半帶恥笑：「同我第一次見到你嘅時候～」
『呃...』第一次...遇到仁慈嘅時候...
講起上嚟真係失禮...
仁慈留意住路面情況：「聽到宋本木話要我嚟救你哋...我仲質疑單憑我一個救唔救得成...佢個死老鬼就話“飛揚嗰個少年...今時唔同往日喇～應該係～”我都半信半疑㗎咋～畢竟我都俾佢陰過唔少次...」
唔好話係唔係俾宋伯伯陰過唔少次...以我喺發電廠嘅表現都夠死十次啦...
“吼！吼～”仁慈一俾油：「真係估唔到...個死老鬼又真係知㗎喎...」
『究竟宋本木仲知到啲乜嘢？』又會唔會知道...我想知道嘅...
「唔知佢喇～」仁慈擰擰頭，「佢話要知嘅...到時就會知～個死老鬼成日都係咁～我真係懷疑SPIRIT嘅風格都係由佢帶出～」
只要知道自己需要知道嘅事...
十二預行者之一嘅Owner同宋本木...
Owner就去開咖啡店...宋本木就另起爐灶...
仁慈望一望倒後鏡中嘅我：「你係點做到㗎？」
『我？我...』講起上嚟...
「哈～」仁慈笑一笑，「唔止心狠手辣咗～仲唔多講自己嘅事～你真係成為咗一個行者喇～」
『唔係...唔係唔想講...係...應該係...我返咗過去...再由過去返翻嚟之後...』應該...就係...
仁慈打量住倒後鏡中嘅我：「你真係返到去過去吖？」
『嗯...不過佢哋話我只係深層睡眠咗好長嘅時間...』我指一指住綽姿...
綽姿冇出聲...只係點一點頭...
「係吖...」仁慈一邊諗諗...一邊好專心咁揸車...
「唔好講廢話...」綽姿冷冷放下一句，「究竟EVE收埋喺邊？」
乜關於我嘅嘢真係咁廢咩？
仁慈望一望倒後鏡中嘅綽姿：「我而家...帶緊你哋去～」
帶...帶跟我哋去？
『我哋...我哋係SPIRIT嘅行者...你帶我哋去...去搵EVE？』會唔會...有問題...
會唔會...係一個陷阱？
啱啱先差啲俾Owner害死...
而家係逆行者身份嘅仁慈話帶我哋去EVE度...
好難唔起戒心㗎喎...
「士別三日...」仁慈望一望路面，又望住倒後鏡中嘅我，「你真係唔同咗好多～你哋都已經睇過精神液係點樣製造...應該唔會想繼續留喺SPIRIT㗎啦？」
精神液...
綽姿冇出到聲...好似喺度諗緊...
我諗...綽姿應該係諗緊...茵婷差啲就俾人捉去抽取靈魂...製造精神液...
再唔係就俾國安局拎嚟做實驗...變成異常生命體...變成魂導兵...
咁講法...唔怪得頭先綽姿對住魂導兵手軟腳軟咁...原來...
「個死老鬼真係講得啱...」仁慈點點頭後...俾一俾油...
“吼！吼～”黑色嘅Benz就喺公路上飛馳...
沿住象山路一直全速前進...路面上都好似...再唔見有其他車輛...
越係接近荃灣工廠區...越係唔對路...
唔單止我哋呢邊線...就連對面線都唔見有車...
係因為頭先我哋同魂導兵喺公路上大戰嘅關係？
唔知...都唔理得咁多...
冇錯...而我哋行駛緊嘅方向...正正就係去緊荃灣...
咁講法...我哋係去緊...返緊入屯門？
我有冇估錯？
其實早喺見到有兩架黑色Chevrolet追緊過嚟之時...我就奇怪緊我哋駛緊去邊...
而當啱啱頭先仁慈話帶我哋去EVE度...我就更加覺得奇怪...
點解唔係行返上粉嶺公路入元朗...
咁講法...EVE唔係收喺元朗...亦唔係收喺天水圍...唔係收喺...逆行者嘅勢力範圍？
“吼！吼～”當我哋架車駛到嚟荃灣...唔單止我哋呢邊嘅來回線...就連下面...都唔見有車經過...
就連搵架貨車望望都冇...
點會...唔通係解放軍加強對荃灣工廠區嘅封鎖？
又唔似...
我提高視力...睇清楚...盡量睇清楚荃灣街上嘅情況...
荃灣嘅街道上...冇車又冇人...又冇解放軍嘅軍車...又冇士兵...
做乜好似...好似完全...撤離？
點會咁...明明尋日...因為我哋對神秘工廠做嘅好事...解放軍佈重兵喺呢度...
今日就撤離晒？又會咁快...
我一路細心觀察...
“吼～吼...”當差唔多駛過荃灣之時...仁慈開始減速...
而我...我就留意到...深井嘅方向...好似有...有煙飄到上空中？
睇清楚...再提升視力...望上前...望遠啲...望去深井方向...
真係...真係有一團團黑煙飄上空中！
“吼...吼...”仁慈以緩慢車速...慢慢駛向深井...
越駛越近...越近就越清楚可以見到...一團團厚厚嘅黑煙...飄到上空中...
深井嗰邊...發生咗咩事？
再慢慢駛近...慢慢駛向深井...
當我哋轉到落青山公路之時...就已經見到...地上有解放軍士兵嘅屍骸...
當我哋再駛近啲...駛過屍骸之時...我再望清楚...
一件件...分成幾件咁...散喺地上嘅Full Gear解放軍士兵屍骸...
唔止呢幾件...前面又有幾件...左右兩邊都有好多件...
而再駛多前少少...就有一架打斜分開兩截嘅解放軍裝甲車...著晒火...濃煙湧上天空咁喺路旁燃燒...
好明顯...呢堆一件件散喺地上嘅Full Gear解放軍士兵屍骸...同打斜分開兩截...燃燒緊嘅解放軍裝甲車...都係由精神刀造成...
「果然真係...」仁慈小心翼翼咁扭一扭軚...俾一俾油...翹過架著晒火嘅解放軍裝甲車，「SPIRIT向屯門集結...」
『你都知？』我再望清楚四周...烽煙四起...
「嗯...」仁慈點點頭...又輕輕扭一扭軚...俾一俾油...避開散喺地上嘅解放軍士兵殘骸，「宋本木提過我...話返嚟嗰陣，深井嘅解放軍應該就已經被趕入去屯門集合嘅SPIRIT行者血洗完～慢慢揸就應該遇唔到佢哋～可以放心喎～頭先踩得咁行...逃避魂導兵嘅追截...幾驚過到嚟佢哋都仲打緊...」
原來宋伯伯都知道...
頭先Owner都有提及過...喺出面嘅行者殺緊入嚟集合...差唔多殺到去深井...
佢哋兩個...又會知道...仲好似咁清楚...
佢哋係點樣收集呢啲情報？
如果話有逆行者潛伏喺SPIRIT裡面都唔出奇...
之但係...Owner呢？
又話Owner同逆行者冇關係...
但單憑Owner一個...就算曾經係預行者...又可以做啲乜？
“吼...吼...”仁慈一直好小心咁慢慢揸...
慢慢避開散佈滿地嘅解放軍士兵殘骸...慢慢駛過著晒火嘅裝甲車殘骸...
越駛近深井...屍體同裝甲車殘骸就越嚟越多...
睇嚟戰況都幾激烈...
唔係唔係...戰況唔係激烈...係解放軍被SPIRIT屠殺...
喺呢邊嘅解放軍裝備...雖然都算係先進...但都仲係未用上SPIRIT嘅物質...
用普通嘅裝備同武器對抗SPIRIT...只會被虐殺...
“吼...吼...”一路駛近深井...一路觀察...
好多...好多...真係有好多著晒火嘅裝甲車殘骸...一地都係解放軍士兵嘅人體殘骸...
我撳低隻車窗睇清楚...
斬到一舊舊...一件件...分晒屍咁...
有啲人體殘骸仲著咗火...一陣陣燒肉味就飄過嚟...
慢慢咁左穿...右插...避開路上嘅屍骸...殘骸...障礙物...
當差唔多駛到去深井之時...
“吼...依...”停車...
「唉...」仁慈抖啖大氣，「睇嚟要清清佢～」
我望返上前...就見到前路被幾架著晒火...大量黑煙霧出嘅裝甲車殘骸欄住...
『嗯...』我同綽姿都跟住仁慈落車...
“咔...啪...”落車後...反手閂返車門...喺烽煙四起之中...望一望...望一望深井...
遍地都係解放軍士兵嘅屍骸...人體殘骸...
除咗解放軍...仲有兩三架私家車受波及...被斬開...著火焚燒...
喺火海與濃煙之中...當然就冇平民百姓...
而喺濃煙之間...望到遠處嘅住宅高樓...窗簾都閂晒...不過有啲仲漏咗條罅...有八卦嘅人就喺條罅之間偷偷望...又有幾個拎住部電話...影緊落嚟...
當佢哋望到我正盯住佢哋之時...都立即縮返後...閂返實個窗簾...
「著晒火呢～」仁慈行到去架著晒火嘅裝甲車前...喺腰間拔出兩把精神刀柄...
“嗡嗡！”兩把綠光刀刃同時亮出...
仁慈向住架著晒火嘅裝甲車殘骸雙刀亂舞...
“嗡嗡嗡！吱！嗡嗡！吱！嗡！”綠光刀影就喺著晒火嘅裝甲車殘骸上亂劃...
架著晒火嘅裝甲車殘骸就分得再散啲...不過好似仲大火咗...
「呃...散啲易清理啲～」仁慈用兩把綠光刀刃將散喺地上...仲著住火嘅裝甲車殘骸撥開。
『都係嘅...』唔理著唔著火...最重要都係撥開啲殘骸...唔好擋住條路...
我就同綽姿一齊踢開著住火嘅裝甲車殘骸...又掉去路旁...掉埋一邊...
“嗡嗡！吱！嗡！吱！嗡嗡！”仁慈就繼續將擋住條路...著住火嘅裝甲車殘骸斬得散啲...
『EVE嘅能量...真係大...』我一邊將著住火嘅裝甲車殘骸掉埋一邊...踢去路旁...一邊感覺到仁慈身上嘅氣息...
「不過就好奇怪...」仁慈大大腳踢件裝甲車殘骸去路邊。
『嗯？』我同綽姿合作將件大大舊嘅裝甲車殘骸掉上行人路...
仁慈又拔出兩把精神刀柄...亮出綠光刀刃...對準裝甲車殘骸：「總係唔穩定...」
“嗡嗡！吱！嗡嗡嗡！吱！”綠光刀影就喺裝甲車殘骸上亂劃...
總係唔...穩定...
「唔知咩情況...」仁慈收返埋兩把精神刀柄，「又唔知咩原因...久唔久就唔穩定...」
唔知咩情況...又唔知咩原因...久唔久...
就喺呢個時候...我聽到...
「救...救...救...命...」聽到有人嗌...
「救命...救...救命...命呀...」普通話...嗌救命...