我竟然鍾意左...！？: 第四章

返到屋企之後，沖左個涼，再煮個公仔麵食就返左房休息。訓左喺張床既我不斷喺度諗今日啊凌同啊天究竟係咪有野瞞住我，定只不過係我諗多左。諗下諗下就不知不覺地訓著左了...

「畢竟係最後一節宗教堂，等大家放鬆下吧。跟大家講個坊間傳說啦!相傳.....」我又再一次被老師的呼喚從夢中醒過來。望一望手機，原來已經10點。我發現自從識左雯雯之後，相隔呢一個禮拜晚晚都發呢個夢，比起以前頻密左好多。「我諗都係自己錯覺姐，自己發夢關人地咩事吖～」起左身之後，我照舊沖個涼、執返好個髮型，換左件白色T-shirt配一條黑色運動短褲就出左門口食早餐。

「你有一則新訊息」喺我食緊早餐既時候電話突然響起。打開後見到一個唔似推廣的whatsapp訊息：
「Hi啊明！我係上次書展嗰個女仔，雯雯啊！仲記唔記得我啊？本書我睇完啦，我覺得真係好好睇^_^唔知你下個禮拜得唔得閒出黎攞本書呢？如果你ok的話就再約時間地點啦！」

「你咁靚女，我點會唔記得你吖，哈哈！我下個禮拜唔洗上堂，所以全個禮拜都應該好free啊。至於時間地點都就你啦！」

「你真係識講野姐^_^咁9月2號，1點鐘旺角地鐵站等，到時再電聯好唔好？」



「ok，到時見👋🏻」

「到時見👋🏻」
呢個禮拜都冇咩特別要做既我唔知點解好期待嗰日既來臨。唔知係咪太期待9月2號，搞到我呢個禮拜過得特別漫長，即使每一日都約啊天出黎踢街場波，但就係每分每秒都幻想到時見面既情景，根本就冇心機去玩。最後搞到咩都派膠....

「喂啊明，你呢幾日搞咩啊你？做乜都好似冇心機咁，仲要一落到場就係咁派膠，場場都唔知你係度做乜春！今次真係佛都有火啊！你為錢定為女所困啊！？」就連出左名好脾氣既啊天都咁話我。

「sorry，可能呢排有少少唔舒服，我保證再冇下次！」我都好內疚咁同啊天say sorry。都唔知點解自己咁在意9月2號既見面。我成日都同自己講只不過係攞返本書姐，點解自己會咁期待架！明明feel到自己唔係為左本書，但就唔肯承認自己想再一次見到雯雯...
但幾經辛苦，終於，我終於都等到9月2號既來臨.....