我竟然鍾意左...！？: 第三十章
「我估你都已經知道自己既身份啦？」
「嗯....」
「耶穌降世，係為我地捨命，為我地洗脫罪。而你既降世，係為左給予這世界愛。你既生存意義，就係將愛傳到呢個世界。」哇！雖然情景好嚴肅，但自己都覺得娜姐講得未免有點太誇張掛....
「咁...可以入正題啦掛....？」始終同娜姐講野，我既語氣即使嚴肅至極，但都有一種家人之間傾計既氣氛。令我都冇咁緊張....
「啊....一切就要由書展講起啦～」
「個一日，男孩同女孩喺書展認識，佢地可以話係情投意合啊～佢地因為一本書而相識左，而且仲要慢慢鍾意大家，情到濃時就當然....」
「一齊左？」
「當然就因為出現左少少事而冇咁快一齊啦～」大佬你係咪玩野....
「咁之後就因為一個轉校生既出現，當時男孩經常幫呢位女仔，個女仔有一次走去男孩讀既學校搵佢，點知好偶然咁見到個轉校生同男孩表白。」
「咁個女仔點？放棄左？」
「個男仔就真係冤枉啦！男孩正想拒絕轉校生既時候，呢個時候轉校生殺佢一個措手不及，一野嘴左落男孩塊面度，叫佢唔洗咁快比答覆 。女仔就當然好唔開心啦，但佢並冇咁就放棄喎，終於佢等到個男仔講出呢件事俾佢聽。」
「即係咁男孩同女仔就係我同雯雯啦，咁個轉校生係.....」
「嗰個人，就係我。」哇....我當時已經擺唔出任何表情，因為我根本就諗唔到娜姐竟然鍾意.....我！？
「但你係監察我既使者黎喎....」
「你再插嘴我就唔講啦！🤨」我忘記左娜姐唔鍾意人地打斷佢講野添～
（娜姐視角）
當時，我仲係一個好普通既凡人，而且鍾意左你添！可惜，你心入面根本就唔鍾意我，以我既直覺，你嗰陣已經心有所屬....
只係，我嗰陣比你熱愛幫人既性格吸引住，所以我決定用kiss黎拖住你。可惜根本就唔work....
後來我知道，無論我做咩都好，都係感動唔到你....你對我既好，只係適用於朋友關係之中...
而冇幾耐，你嗰日放學走得好急。好奇心之下驅使我偷偷跟住你，然後我見到嗰個女仔——雯雯。
唔怪得你會揀雯雯啦，天使般既臉龐，濃密而秀麗既長髮，再加上魔鬼般既身材....比起樣貌身材平庸既我，正常男人都識揀啦～
我冇怪過你膚淺，因為嗰個女仔靚既程度，就好似係身體每個部分都係上天為佢度身訂造一樣！講真我係仔都揀佢....
我由食飯跟到夜晚，仲好記得嗰日係平安夜，你地就喺掛滿燈飾既尖沙咀街道上面，為大家獻上深情一吻。
我只係希望，自己可以默默守護你....因為我真係好鍾意你！
事後，你亦都正式拒絕左我，同埋話俾我聽嗰一日既事俾女朋友見到，索性坦白夾埋表白。而我地都繼續做朋友，有時仲會同我講下你地既野添～
雖然我一直同自己講：「陳美娜，你都預左架啦！點解仲係咁唔開心架！？」
可惜，回應我既只係「滴，滴」聲，撞落洗手盤既淚水....
但我一直都冇改變過默默守護你既想法，我真係好傻啊可？
點解我要默默將自己既青春，時間交俾你？
點解明知冇回報，但都要咁傻，咁樣做?
內心既交戰，都係改變唔到我既想法，唔係我唔想改變，而係我過唔到自己嗰一關，因為：「我愛佢」
都唔知自己做左D乜既一年終於到左尾聲...當時你叫左我一齊去苗圃公園，你話仲有另一個朋友會黎，但當然我冇應承，但就偷偷去睇下你地做乜啦。
12月25號，對嗰陣既我黎講係黑暗既一日。
明明見到有個女仔幫你地影相，你地仲好sweet,但下一刻再比我見到你地既時候，鏡頭已經轉到由圓方走去苗圃嗰段必經既天橋
你地兩個好似鬧緊交，最後雯雯佢仲喊哂咁，仲係咁講三隻字，但聽唔到。但隱約見到類似「對唔住」既口形。
最後雯雯仲打算跳出去！咁你就當然係阻止啦
可惜，兩個人咁就跌左落去....跌落去既情景我仲瀝瀝在目！你先跌落去，然後雯雯就跌左喺你上面....
當時我唔敢望下面既情景，我唔想接受現實....
「冇可能架....冇可能架！....唔會咁架！！！！」當時真係反應黎唔切....過左1分鐘左右，我先理性返起黎，第一時間——call三條九！
「你唔好有事啊！」我一直留喺手術室前大哭起黎，我已經唔理任何儀態，我慢慢慢慢，就沉睡於哭泣之中。
其實，係因為我既自私...冇左你，等同於我冇左目標....
「你有一顆天使般既心，我比一個機會你。」突然漆黑一片既畫面被光明完全覆蓋。然後又一把聲音同我講。
「咩機會？」我不解。
「如果我比你守護住一個人，你想守護邊個？」呢吧聲音又問。
咁仲洗講？梗係.....「陳·啟·明！」
「好！接下來，就由你成為檢查陳啟明既使者！」呢吧聲音好有氣勢咁講。
「天使——陳啟明，首次死於2013年12月25日。再生(復活)之時為2013年12月28日。使者由陳美娜接替。完畢！」
「嗯....?」同樣不解。
「返到現實，你就明架啦～」
然後，當我醒返既時候，我訓左喺你既病床旁邊....
「你醒啦？」一把熟悉既聲音從頭上傳出。望一望上方，係....係你。
我諗諗夢入面講既野，可能真係存在：「阿明，記唔記得我係邊個？」我決定試一試阿明。
「娜姐你一定係想試我啦～我咪你堂細佬——陳啟明lo！」
後來再問醫生，昏迷緊既阿明的確於12月28日（今日）醒返。醫生仲話當時你已經冇左心跳，但之後突然又有返！但就處於昏迷狀態。
「即使係昏迷狀態，但我都已經替阿明打定輸數架啦，但佢竟然真係好奇蹟咁醒返！」
嗰一刻，我已經知道，夢係真架，你係天使，我係你既使者，呢種新生活，因「神」而開始......