[新手]兵都可以做將軍: 七.投票日

係完咗答問大會既一個禮拜之後，就真係到最後衝刺，因為一個禮拜後就係投票日。
係li一個禮拜，我哋內閣差唔多全部容許宣傳既時間，我哋都會宣傳，相反，王子俊佢就咩都冇做，好似已經放棄咗咁。
「宇誠，你覺唔覺王子俊好似有D奇怪，佢咩都冇做，好似放棄咗選舉咁。」
「放心佢唔係放棄咗選舉，係想打心理戰，佢想我哋覺得佢仲有贏面，想嚇窒我哋，我搵人查過佢哋真係冇哂辦法，佢哋既內閣成員更加已經知自己內閣輸硬，所以佢哋依家只係希望個日有奇蹟既發生。」冇錯，佢哋真係一早放棄咗 。
以下係我同王子俊既Whatsapp內容
———————————————————————————
王子俊:hi？聽日lunchtime得唔得閒？
我:做咩？如果有嘢講既就係依度講，唔係好想同你見面。
王子俊:咁好啦，我諗今次學生會既選舉你已經贏咗喇，我必須承認我低估咗你，我估唔到你竟然有辦法反打我一波，我一開始諗住你冇哂D宣傳物資既時候，你會感到徬徨唔知點算，然後就會放棄，點知你竟然可以有辦法拆解li D問題，仲可以咁樣反勝我，最後既答問大會我估唔到你答我第一條既時候會咁答，你既答案將成個答問大會既劇本改變咗，我真係佩服你，我唔應該睇少你，應該咁講你係有領導能力既，禮拜四點完票無論輸贏可唔可以影張相？





我冇再應佢機，去到投票日，我哋學校係早會既時候投票，放學就點票，個日完全冇心機上堂，連數學同通識測驗都係hea做，時間過得真係快，好快就放學，放學之後我哋整個內閣齊齊整整咁行到去學生會室點票，而對面既內閣只係得主席同埋兩個副主席加兩三個幹事嚟監票，睇嚟佢哋真係放棄咗。
聽完學生會負責老師既廢話，點票開始，點票過程我哋由頭領先到尾，最後而437票比153票贏咗王子俊既內閣，個刻我完全唔覺得開心，畢竟佢都係我識咗3年幾4年既朋友，反而我想安慰佢，去到最後由上屆學生會主席既手接得學生會室既鎖匙，大家影埋張相就話今晚一齊食飯，
「你哋去酒樓攞位先，我一陣過嚟。」
叫咗大家走之後得翻我同王子俊加幾個老師
「喂，你係咪想影相？」
「係呀！你係咪同我影？宇誠我真係唔應該睇少你，你令到我知我係li間學校唔係無敵，起碼有你li個人可以擊敗我，我會同呀威道歉㗎啦，最後要多謝你令到我成長。」
影完相就搵咗呀威佢哋，
「今日宇誠請食飯，大家任叫，唔駛睇價錢，想食就叫啦！」呀威咁講，仆街啦，好彩平時家姐有時都會俾下錢我，如果唔係的話，我成個月食麵包都請唔起，最後大家都飲下酒，曉琳都有飲，結果飲咗少少就暈暈地，我見咁樣又唔想掃大家興，就擺低錢就送曉琳翻去。沿途我都係扶住曉琳，行陣就見到的士，當時當然諗都冇諗就上咗架的士，結果送到曉琳翻去個陣聽多佢細細聲講佢鍾意邊個，但係真係太細聲，我只係聽到「其實我真係好鍾意...」然後就聽唔到佢講咩，不過個陣我真係冇諗D咩，因為我覺得我高攀唔起女神。

《不懂愛恨情仇煎熬的我們 都以為相愛就像風雲的善變-江南》