【內含HEHE】月下漫步東京同遊: 4.5

4.5

　　我們從商店街回到大街，沿路走過幾個街口，再進入了一棟大廈，乘電梯到樓上。
　　電梯門一開，眼前出現一間地方敞大的足浴咖啡店，內有數個足湯池，顧客不多，寧靜的環境令人放鬆。
　　店員安排我們坐在靠近窗口的位置，剛好可以看到黃昏的街景。
　　水池的水不算燙，把腳泡在裡面很舒服，水裡還有不同的物件讓客人踩著把玩，就像裕貴，他雙腳一放進水裡就霸佔了一個網球，把它夾在兩隻腳底間不斷搓揉。
　　「裕貴，你隻腳會唔會好臭？」我憂心地問他。
　　「做乜噉問？」他皺著眉，對於我問題的用意大惑不解。
　　「我怕你浸到啲水臭晒，傳染啲腳臭畀我。」我笑。
　　「你就臭！」他作勢把腳提起來，「你聞吓，香噴噴。」


　　「你都聞吓，我都好香。」我也把我的提了起來。
　　兩個長不大的大朋友就這樣在安靜的店裡胡鬧地切磋了幾下腿法，水花四濺。店員見狀為了阻止我們，及時送上飲品，還對裕貴說了幾句日文。我見到裕貴尷尬地微微鞠了躬，說了兩次「輸咪乜腥」，店員那串日文的意思大概是勸喻我們別要在他們店裡比試腿法吧。
　　「係咪鬧我哋玩腳？」店員走開後，我悄聲問裕貴。
　　「冇啊。」裕貴呷了一口紅茶。
　　「吓，噉你做乜同佢道歉？」
　　「佢話我朋友，即係你，對腳好臭，一除鞋就搞到其他客人急急腳走，佢哋陣間仲要換水同將水池消毒，問我過唔過意得去。」他說得正經八百，差點把我騙倒。
　　「繼續吹。」我比了個邀請的手勢。
　　「我講真㗎。」他一口喝掉半杯紅茶，「哇，好熱！」他燙到了舌頭，吐出來散熱。
　　「做乜飲得咁急？」
　　「快啲飲完快啲走，聽佢講完我真係覺得好唔好意思。」裕貴一臉困窘。


　　「吓，你講真㗎？」我半信半疑。
　　「你真係唔覺得你對腳好臭？你一除鞋我就聞到喇喎，除埋隻襪我仲差啲暈。」他扭曲著五官，一臉難受。
　　「點會啊，我同我對腳相處咗咁多年，都唔覺佢臭。」我嘗試提起腳，把它拉近鼻子，猶如表演瑜珈動作。
　　「可能腳臭嘅人係唔知自己有腳臭，因為由細到大都係噉嘅味，聞慣咗。」裕貴說。
　　「真……係……唔臭……啵！」我的鼻尖幾乎碰到腳趾頭了。
　　「喂，你喺度做乜嘢？」裕貴發現了我是瑜珈高手的事實，露出錯愕的表情，眼睛睜大得連眼球也差點滾出來了。
　　「聞……吓……隻……」
　　「你咪黐線！」他強行把我的腳拉下來，「由而家開始請你講普通話。」
　　「吓，點解要講普通話？」
　　「唔好畀人知道你係香港人，好失禮。」他說。