「黎到呢度就可以啦,我知你有好多野都好想知,我地過果邊慢慢講啦。」個女仔指住公園入面嘅長櫈。

 我望下周圍,原來我地已經番左去阿峰樓下嘅果個公園。我望番我地頭先行嘅果條路,我見到有一團黑色嘅霧係大路嘅中間,我地就係穿過果一片黑霧行過黎。

 「好啦,你有咩想知就問啦,我咩都會答你架。」個女仔臉帶微笑咁望住我。我feel到隻手仲係暖嘅,姐係個女仔仲係捉住緊我隻手,個女仔望落都唔錯,同個咁靚嘅女仔拖到手睇緊我今晚都幾大收獲,撞多幾次鬼都覺得抵呀。

 「Err⋯⋯你係咪隔離班個班長呀?」我問個女仔。

 「係呀,你係C班架嘛,我叫海澄呀,你係咪驚得滯傻左呀?」海澄一邊拍我膊頭一邊笑。





 海澄佢係我地學校入面都算幾靚,但一直都仲係Keep住A0。海澄佢係短頭髮,啱啱好到頸嘅長度。眼大大無戴眼鏡,海澄對眼就好似珍珠咁靚。佢今日仲要係著背心同短褲,真係靚過平時著校服嘅佢多多聲。但我真係估唔到海澄佢細細粒,身型咁瘦弱都可以係咁恐怖嘅環境入面救得番我出黎。

 我唔可以一直都掛住望人個樣地,我都要講番D野先得:「唔係呀,我驚你唔認得我,得我認得你嘅話咁咪好7?」我都拍番海澄膊頭。

 「我緊係認得你啦,阿洛呀嘛,我地學校有邊個會唔識你呀,sing-con冠軍喎。」

 「係喎,話時話,點解海澄你一個女仔夜媽媽會係果度嘅?」

 「阿洛你知唔知今日係咩日子?」海澄好認真咁問我,佢呢個問題一剎那就將成個氣氛變到好凝重。





 「我聽個Friend講話今日好似係鬼門開呀,係咪呀?」其實我都唔知係Anson鳩Up定係講真,不過就算唔係都睇怕唔係D咩好野。

 「無錯,今日係農曆七月一日,鬼門大開嘅日子。D鬼魂就會好似放監咁係地獄入面放番曬出黎,直都七尾鬼門關之前都可以任意住返呢邊同果邊。當中有D鬼魂嘅怨念會重D,佢地嘅力量同對人世嘅恨意都會比較重。就好似你頭先見到果個咁,佢有足夠嘅力量去捉實你成個人,咁睇黎佢生前都應該帶著唔少怨念咁離去。所以你頭先見到嘅並唔係人,而係鬼。」海澄好詳細咁解釋緊頭先所發生嘅事,而我心入面嘅不安感亦越黎越勁。

「咁點解佢又要咬我呀?咁嘅話我覺得佢似彊屍多過似鬼喎。」

「頭先都講過,D鬼魂嘅怨念越重,力量就越大。頭先攻擊你果隻鬼對人世嘅恨意都好強,同埋佢地要係留係人世間嘅話就要吸收人類嘅陽氣,就好似我地要呼吸一樣。睇怕頭先果隻鬼都係想吸你嘅陽氣。比鬼吸走陽氣嘅話少則會成個人都覺得好攰,當你比鬼吸盡你嘅陽氣就會好似比鬼抽走個靈魂一樣。」海澄非常認真咁同我解釋。
 
「但唔係話普通人係見唔到鬼架咩?聽人講話要有陰陽眼先見得到架喎。」我繼續問落去。





 「你都可以咁講,但事實係每個人都可以見到鬼,並無所謂普通人同陰陽眼之分,只係在於你係幾時開眼。一但開左眼之後,你就可以見到屬於另一個世界嘅野,只不過有好多人一生都無機會可以開眼,所以先會話有人有陰陽眼就可以見到鬼。照我睇黎你應該係第一次見到鬼,你見到鬼之係可能係遇到D事先會無啦啦開左眼。」海澄開始用番個正常Tone去講野,氣氛都無頭先咁緊張。

 聽到海澄咁講,我就load到啱先燒衣紙果個呀婆,我將成件事一五一十咁同海澄講番。

 「如果我無估錯就係個呀婆知道前面有唔妥,但又驚直接同你講會嚇親你,佢就做左D野開左你對眼想比你睇清楚條路,但點知你又一支箭咁衝左埋去⋯⋯然後就搞成咁啦。不過給果係咁嘅話個呀婆都幾勁,可以隔住對面馬路開到你對眼。」

 「吓,咁我有冇方法合埋對眼呀?我唔想成日都見到呢D野呀!」我捉著海澄隻手,好緊張咁問佢。

 「你唔洗咁驚住,雖然對眼一開左就收唔番,不過都可以靠自己意志去控制開合,好似眨眼咁樣。但呢樣都唔係一時三刻可以練得到,咁你要忍一忍啦。」海澄講到最尾果句就開係係度取笑我。

 「吓,咁我見到鬼咁點算呀?我咪死緊囉!」我兩隻手一齊捉住海澄,比頭先更加肉緊。

 「唔洗怕啦,有我保護你呀嘛。」海澄輕輕咁放左隻手係我手背上面。

 「吓?你得唔得架?」





 「咩呀!頭先邊個救你架!我屋企世世代代都係捉鬼架!我呀爺個呀爺仲係國師黎架,係宮入面做野架!」海澄好激動咁講,一邊講一邊動力打我膊頭。

 「得啦得啦,知你勁啦,你話架,你要保護我呀。」我笑笑口咁同海澄講。

 「哼,邊個要保護你呀?」海澄將個頭另埋一邊。「你呀,比部電話我呀。」海澄對住我伸左隻手出黎。

 「做咩呀,拿。」我擺左部電話係海澄隻手上面。

 「你無我電話嘅話你有事果陣點搵我呀。拿,入完啦,拎住啦。」海澄又係將個頭另埋一邊再伸隻手過黎。「咁我走先啦,有咩事就搵我啦⋯⋯無事嘅話⋯⋯你想搵說搵啦,bye bye。」海澄講完之後就起身行左去。

 「知啦,我會搵你架啦。」我對住海澄嘅背影叫過去。

 海澄聽到之後停低左,但佢無另轉頭,停低梳左一下頭髮之後海澄又繼續向前行。目送完海澄嘅背影之後,我就番上去同阿峰仲有Anson一齊打邊爐。





「喂,幾點呀老細,阿洛哥,你吹個風吹成兩粒鐘喎,吹左去邊撚度呀。」阿峰咬住支牙籤,腳un un 咁問我。

「係囉,你去左邊呀,咁耐嘅?我地見你咁耐都唔番黎就食埋你果份啦。」Anson指住個得番D肉碎同埋菜渣嘅煲。

「我屌你地啦,真係一塊牛都唔留番比我架喎,契你個弟吖!」我用筷子係個煲入面攪下攪下。

「點留比你呀大少,D牛呀丸呀再擺就臭曬架啦,你估依加整臭豆腐咁整呀?」

阿峰拎住D碟同我講。
「屌⋯⋯咁你屋企仲有冇野食呀仆街,我正話都未撚食飽呀。」我行入廚房開始尋珍寶。

「哇,你老母買咁撚多公仔麵嘅?唔怪之得食到你咁虧啦。」我隨手就執起兩包麻油味出前一丁。

「屌你食就食啦,比麵你食仲唔謝主隆恩?仲咁多嗲喎。」阿峰開番著個Gas爐比我煮麵食。

「喂阿洛,你都未話比我地知你頭先去左邊喎?」Anson幫我放左兩個麵餅落煲入面。





「呢度樓下咋嘛,無咩野呀。」我拎起對筷子想整散個麵。

「屌,你落去兩個鐘做左D咩呀?唔撚好同我講係下面餵左兩個鐘頭蚊呀。」Anson好好奇我頭先做左D咩。

「講你都唔信架啦,我頭先係下面撞鬼呀。喂,你地平時食公仔麵中意乾撈定放湯架?」我將包麵嘅味粉倒落個碗度。

「我就食撈麵嘅,不過你落曬成包粉就咪撈啦,鹹死你呀,到晚就真係食到你虧啦。」阿峰打量緊我個碗入面嘅味粉。

「屌,阿峰你咪撚叉開話題啦。阿洛你係真係撞鬼定鳩Up架?」Anson成個人控埋我果邊,睇黎佢真係好有興趣。

我一邊食我嘅乾撈公仔麵一邊講:「屌,我呃你做乜柒呀,我頭先⋯⋯」
「哇屌,鹹到瀨屎呀,真係頂唔順,加D湯落去先。」我落得太多味粉去撈麵,搞到成個麵都非常之鹹。

「話左你架啦,落咁多粉都仲要撈。我呢就食公仔麵大嘅,我敢講食公仔麵全校無人夠我多呀。」阿峰講到拍曬心口咁。





「喂呀,阿洛你唔好食住先啦,我想知你點解撞鬼呀。」Anson一手就搶走左我碗麵。

「咪係條街度見到個呀叔,個口飛D金銀衣紙出黎囉。」我係Anson手中搶番我嘅麵。

「哇唔撚係呀?咁邪?你鳩Up架咋?」Anson聽到都O曬嘴。

「咪玩啦,你唔係信佢呀?家下拍戲咩。」阿峰都加把口一齊講。

「都話你地唔會信我架啦,唉我今日真係好攰,我番屋企訓先啦。」食完碗麵我就放番低隻碗走人先。

「小心番去又撞多次鬼呀。」Anson係我臨出門口之前同我講。我一落到街就望下隻錶,原來咁搞下已經成1點幾。唔知係咪因為開左眼,就咁望落去係街上面嘅人好似多過平時。因為唔知果D係人定係鬼,我都唔夠膽周圍望,急急腳咁就行番屋企。 
已有 0 人追稿