(與主線劇情無關)
 
三星期後。

KC坐在學生會會室裡,靜靜看書。

他在閱讀的,是「富蘭克林傳記」,一本美國暢銷書。

「外賣到,外賣到!」一群人衝到房間裡,個個興高采烈,手中是熱騰騰的台灣小吃。





「唔該你哋。」KC微笑,他可不是狂歡的類型。

「唔好睇書住,食嘢先!」會長阿傑說:「我重帶左啤酒嚟,好好慶祝,哈哈。」

KC放下書目,開掉各個瓶子:「陣間重要開會呀,咪飲太多呀。」

「得啦,副會長,我幾時醉過?」阿傑吹牛起來。

KC沒有回應,只顧微笑,沒心思與阿傑爭論。





KC從不喜歡當隊伍的領袖,不喜歡成為射燈下的主角,所以才當上副會長一職。

「好,慶祝第43屆SU由我哋Sky接任!!!」阿傑首當其衝,舉起酒瓶,其他人紛紛碰杯,場面熱鬧而歡愉。

坐在阿傑旁邊的KC,則保持一貫風格,穩重而低調。

對,Sky最後獲勝,而且是高票當選。

KC心中明白,是與那人的幫助有巨大關係。





不過,現在塵埃落定,到底Chris是自暴其短,還是遭人陷害,根本無人得知。

也根本不重要了……

他只是知道,Chris現在淪為笑柄,既要抽煙,又要行賄隱瞞,又要主動辭職。

「哈,真係峰迴路轉,本嚟對家氣勢幾勁,不過個Chris居然整左啲咁嘅嘢出嚟。」其中一人說:「真係搞笑。」

「係囉,我真係完全估唔到。」阿傑也訝異。

「同埋究竟邊個爆料呢?咁敏感嘅時期都捉到痛腳。」

房間裡,只有一人知道真相。

此刻,他喝上一大口啤酒,裝作事不關己。





對的,這一萬六千元報酬,是由KC自己掏錢。

他卻心感值得。

「唔好講人啦,已成定局,講下啲開心嘢!!」阿傑轉過話題:「你!!你係咪出Pool呀!呢餐你嘅!!」

「嘩,有冇搞錯呀!!出Pool唔請食飯!!」

「梗係啦!!」

「啊哈哈哈!!!」

 KC沒有與世隔絕,不時加入高談闊論,畢竟這是建立人際關係的學問。





他的腦海裡,在想其他事情。

「…」

兩小時後。

大家心滿意足,開始收拾房間。

學生會需面臨排山倒海的工作,慶祝過後,便要馬上投入各項事務。

整理規條文件、聯絡校委會、安排活動細節、應付投訴、處理財政問題、設計新海報、剪輯新影片、校對稿件、訂製學生會紀念品、邀請贊助……

一般來說,不同崗位負責不同項目,然而他們合作無間,不時調換工作,以增加效率。

「好啦,係時候開會。有Agenda(議程)?」阿傑變得認真,主持會議。





這一來,便由晚上九時談至深夜。

然而,剛接手工作,各人都非常積極,沒有露出疲憊的樣子。

燃燒青春,大約就是如此。

而一旁的KC,則等著機會。

「我諗……我哋係時候傾呢個問題,我之前都大約講過,而家想提出多次。」KC主動發話。

「你講SU Fee嘅問題?」阿傑問。

「嗯。」





每個學期,學生會都會向同學收取費用,以維持運作,而學生會亦會籌辦活動,定期派發福利。

然而,近年很多學生不願交SU Fee,導致收入每況愈下,長遠而言或影響運作。

「係,你諗到咩解決方法?」阿傑看向KC。

「我留意到其他大學嘅SU都有呢個舉動,所以特登分享下。」KC井井有條,語氣沉實:「將SU嘅錢投資落儲蓄項目,例如儲蓄保險、基金。」

「哦?」其中一人訝異:「估唔到其他U有呢樣嘢。」

「都冇乜問題嘅,只要係穩健就得。」另一人回答。

「我哋SU多年嚟積存左超過一百萬,係時候投資下,唔係嘅話,根本蝕埋通脹。」KC看向眾人,眼神堅定。

各個成員紛紛點頭,示意贊成。

聽上去,是多麼有遠見。

「我覺得幾好,收下利息,增加少少收入。」阿健也說:「但搵邊間同邊個產品呢?始終要好好比較。」

「不如就俾我搵。」KC自告奮勇。

「等等先……」其中一人說:「咁重大嘅嘢,我諗都係搵多一兩個人幫KC手。」

KC斜視一眼,樣子變得更加嚴肅。

他內心明白,這事必須由他一人負責,才可以實現計劃。

「我諗我自己搞得掂。」KC回答。

「唔好嘅,搵多個人幫你,保障啲。」這人死纏爛打。

可惡……

然而,KC早有防備。

KC盯著阿傑,暗示一件事情。

阿傑心中明白,便打斷KC的對手:「我信得過KC,就俾KC一個負責。」

「…」

由主席發言,眼前的傢伙立刻無話可說。

每個人,都有不同的故事。

當初阿傑是由KC推舉的,阿傑當然順KC意。

二人互相覷視,阿傑不懂KC的目的,只知道自己欠了KC一個大恩。

「…」

翌日。

「三叔,我幫你搞掂左。」KC致電。

「幾多?」對方問。

「一百萬。大單嘢啦。」KC回答。

「哈,咁嘅保單,我收唔少佣。」三叔笑著:「我分返三萬俾你?」

「我要四萬。」KC回說,語氣還是那麼沉靜。

「好。」三叔爽快回應:「見係一場親戚。」

「得閒飲茶。」KC掛線,嘴角終於上揚。

接著,KC收拾背包,前往學生會會室,準備繼續工作。

途中,他碰見阿傑。

「喂KC。」阿傑打招呼。

「嗯?你唔係上堂?」KC微笑。

「係呀,陣間就去。」阿傑也回以一笑。

「呀係,琴晚開會真係唔該你。」KC答謝對方。

「哈,冇所謂,冇你我都做唔到Chair啦,我一定幫你。」阿傑按著後腦:「但係呢……」

但是?

KC沉默不語,只是盯著對方。

「不過唔怕啦,你為人咁低調謹慎。」阿傑說:「反正我都達成心願,只要唔好俾麻煩我就得啦。你想做咩,我盡量方便你。」

「哈哈。」KC真正笑起來。

「的確係個知進退嘅主席。」KC心想。