[真人真事改編] 慘情四部曲．三個食檸檬的故事 [不定期更新]: 第一部 變格： Ch. 2 改變 Ep. 1

叮噹叮噹～～～

我由呢刻開始，我冇再講過野。好急步咁就行翻落課室，更加撇甩咗Vicky。我好快就坐翻埋位，由課室嘅門行翻入位嘅途中，經過一個一個嘅同學，佢哋目無表情，甚至有啲以鄙視嘅眼神咁望住我，感覺就好似死囚行入電椅房咁。面對住自己將要坐落去嘅果張櫈，我仍然空白一片，玻璃窗外就係一班見證人，佢哋唯一嘅職責就係睇住我死。我坐低喺電椅上面，我面前就係一個肩披長髮，身型苗條嘅劊子手。佢靜靜嘅背住我坐咗喺度睇書，可能係睇緊電椅操作說明書？但我諗以佢熟練嘅手法，應該唔係。冇耐，牧師入咗嚟坐咗喺我隔離。佢輕輕拍吓我隻手，然後亦攞起佢本書，仿佛按住聖經為我祝禱。我亦攞起我本Les Miserable Volume I Book 8嚟睇，短短呢20 分鐘嘅閱讀堂，真係令我感受到死囚嘅感覺，不過事實上我唔係死囚，因為其實我已經死咗。

我睇到Chapter II，女角色Fantine 喺病床上面握住Valjean 嘅手，眼望到幻覺產生出嚟嘅女，Cosette。佢越嚟越唔舒服，好快就過咗身。我唔敢將自己同Fantine比較，我邊會夠佢咁慘，但係問心嗰句呢三年幾四年嚟，我對Michelle 就好似Fantine 面對命運咁，做過好多野都卻係改變唔到命運。Fantine 賣頭髮，賣牙齒，賣身體，最終亦難逃收割者鐮刀之下嘅收割；我等待左三年，希望左三年，妄想左三年，最終亦難逃Michelle 嘅掌摑。

閱讀堂嘅安靜一直伸延到其他嘅課堂，老師嘅說話，同學嘅吵鬧，我少少到感覺唔到，一直就係呆坐咗喺位上面。Vicky 同肥行 小息見我唔出聲，佢哋都冇叫我落Canteen 買野食。偶然有幾個追逐嘅同學跑過撞到我，我哋都無視大家，好似撞到鬼魂一樣，大家視而不見。突然有一個紙波從Ronald 個位飛咗過嚟，我打開佢，裏面淨係寫住「Opps！」我望吓Ronald 果邊，果然Ronald 同Jayden 就以一個挑逗兼乞人憎，裝作憐憫我嘅表情望住我。我將張紙揸翻埋做一個波，塞咗入櫃桶，繼續我嘅發呆。

去到食晏，Vicky 同肥行走埋嚟搵我

「你一唔一齊食呀？」肥行好平啖咁問我。

我冇理到佢，望都冇望佢攞咗件冷衫，就咁就行咗落canteen，買咗個三文字同蘋果綠茶就行上7樓嘅小聖堂外面食埋啲野，然後就入去開咗部琴彈。我即興彈咗一啲音樂出嚟，好慢嘅minor 嘅歌，我將成朝嘅負能量方晒落去亂彈一通。彈咗好耐，我終於肯停，喺呢個時候有一把女聲。

「寫低佢咪作咗首歌囉。」

我冇開燈，喺好暗嘅小聖堂裏面，呢個唔係好高嘅女仔慢慢行入穿透咗花窗玻璃嘅陽光，喺七彩嘅暗光下稍稍見到佢個少少陰都冇嘅all back 頭。

                                                       



大家可以follow 我Facebook page。
歡迎大家留言，甚至DM 我。
有興趣聽吓我啲歌嘅可以Subscribe 我Youtube Channel 'TangTang'。