點解我會變左做靚女架？: 07-約會

到左Lunch既時候，又係家寶同家欣講是非既時間啦。

食咩？咪又係「痰仔山哥米線」。都唔知ｄ女人做咩咁鍾意食米線，其實我覺得一ｄ都唔好食。

不過我唔想食又點喎，班女仔餐餐食米線，真係傻嫁。

今日我都係腩肉清湯，走韭芽，飲凍檸茶。

家寶：「你地見唔見呢？Tina個胸一時細，一時大，好似攝左野咁喎。」



家欣：「我都覺呀，真係鬼影變幻球。」

Katrina拍台哈哈大笑，無哂我心目中既儀態，所謂女神，原來都係八婆仔一個。

據我所知，Tina係我地班入面既一個靚女，異性緣好好，但就無乜女仔Friend。

我問：「乜你地好憎Tina咩？。」

家寶：「係呀，鬼叫佢成日姣仔。」



家欣：「係呀，佢同男仔講野會用一把好嬌嗲既聲，同女仔講又用另一把聲嫁啦。」

我話：「乜真係咁既咩？」

Katrina：「係呀，佢仲同一時間同幾個男仔曖昧，真係好狗。」

咦？點解好似講緊我咁既？我又係同時間吊住Carson，Jayden，同佢地曖昧緊嫁喎。

算啦，唔理啦。





到左星期六，終於要按照約定，陪Carson行街睇戲食飯。

著咩衫去好呢？最後我揀左件Oversize既上衣，著黑色Legging同Cons。

約好左係屯門西鐵站F出口等，然後就去戲院睇《鹹蛋獎門人3》。

睇完套戲，肚餓。

「呀清，我帶你去食美國菜丫，好唔好呀？」Carson問。

我：「好呀。」

跟住Carson一路行，一路行，終於停低左，停低左係間McDonalds門口。



我問：「下？說好的美國菜呢？」

Carson：「麥當勞咪就係美國菜囉，唔係咩？哈哈。」

我：「OK, u win.」

去到收銀台，我講：「唔該，我要一個開心樂園餐，食芝士漢堡，飲雪碧。」

收銀呀姐：「要邊隻玩具呀？」

我指住隻多啦A夢玩具。

Carson問：「乜你鍾意多拉A夢既咩？」



我：「係呀。」

Carson：「咁多拉B夢呢？」

我：「……」



跟住Carson同我一樣，都係叫開心樂園餐，仲送左隻大雄玩具俾我。

食食下薯條，Carson問我：「你知唔知天使同你有咩分別呀？」

我問：「咩料呀？唔知喎。」

Carson：「一個係天上面，一個係我心入面，哈哈。」



我：「……」

我沉默左幾秒，再問：「你平時都係咁樣撩女仔嫁？」

Carson：「唔係呀，對住你先係咁架咋。」

我：「哼，我先唔信。」

Carson：「真嫁。」

Carson：「仲有呀，你係第一個肯陪我挨M記既女仔呀。」

我：「痴線，邊個要跟你喎？你都痴痴地既。」



Carson：「係呀，我愛你愛到發哂狂，痴哂線啦。」

我：「收聲呀。」

食完麥當勞，Carson同我行左陣街。跟住過馬路，綠燈閃下閃下，Carson借機會拉住我隻手向前衝。

呢個時候，俾一個唔應該見到既人，見住我同Carson過馬路，隻手仲拉住我。

嗯，無錯，就係Jayden。