一個 2019DSEer 的心情日記: 31-10-2018

10月31日   還有149日

今日考左一份中史加一份中文綜合，有讀中史嘅人應該知道，呢個係一個非常玩命嘅組合，考完隻手絕對唔駛要...

呢個禮拜其實都係咁過，做卷派卷對卷，然後溫書嘅溫書，補習嘅補習，我發覺自己已經習慣左測驗，以前一入課室會問：「喂，今日有咩功課？」而加就變左「喂，今日有咩test呀？」，可能呢d就係所謂嘅心境提升左一個層次。

最近開始想爆一爆中文，上個禮拜派番份2018dse pp得Lv3，範文同文言炒哂，然後每次說話練得1+1，我覺得個中文老師開始有d唔妥我...所以而加要日日溫一課範文，oral就盡量1+2先求合格...

值得一提係星期一去左長州石灘做Rocky Shore，浸下水玩下螺爬下石。d石有半個人咁高，爬5-10分鐘，都幾危險下架，我到而加都想知有咩理由驅使我喺無買保險嘅情況下去爬石。講真我係無試過咁爬，所以淆底到一隻手攞工具，一隻扶住隔離d石，三秒先行一步，如果唔係跌落去斷手斷腳絕對見紅。然後我完全唔明點解有條友可以邊爬石邊擔住把傘咁勇...後來有條友扶住我話要借力，嗰時因為近岸邊加上潮漲關係，有d石已經俾水整濕，條友企都企唔穩就跌親，扯埋我隻手落去，絕對係雷友黎...





唔知大家有無留意，今日黃昏個天好紅，好鮮豔，好有層次，幾靚...有時，不妨放低手機，耳筒，由其是搭巴士嘅朋友，我相信你之所以唔搭鐵係因為唔想迫，唔想咁快翻屋企，而我只係想走馬看花，睇下出面風景，睇下d人點笑，睇下一個社區難得嘅人情味。既然係咁，點解仲困喺只有自己，冰冷嘅電子世界，唔珍惜難得嘅平靜，難得嘅悠閒？


（19：32）