《我還是救護員的日子》: 2.8 難忘事件(二)

於學堂訓練既中期，學員係會有兩個星期時間到外面進行實習，出去體驗一下真正既救護工作。
 
知道即將要實習，心情當然好緊張，因為CPR既對象唔會再係模型公仔阿ANN，而係活生生既人。只要出到外面，咩情況都有機會遇到，到底能唔能夠將操班所學既嘢發揮返出黎，甚至乎能唔能夠成功幫到人救到人，當時的確係有啲期待。
 
由於只係實習生既關係，制服上既名牌位置只會貼住一塊「受訓人員」既牌，而唔會顯露真名…
 
其實我又唔係好明，點解紀律部隊當中就只有救護員要用名牌，要開真名。警察唔使，消防員唔使，入境海關懲教都唔使。
 
救護員顯露真名，其實係咪想方便啲市民？
 




因為當俾對方鬧既時候，可以有埋個全名俾人插？
 
最奇怪既係，明明消防同救護係隸屬同一個部門，點解剩係救護需要有名牌？
 
我懷住戰戰競競既心情去到指定既救護站報到，由於當時既我如同一張白紙咁新，見到咩人都阿sir前阿sir後，驚死人地唔知自己係新仔。
 
其實當去到出面，就唔會再有學堂入面嗰種文化，唔使吓吓都Morning sir / Good day sir，見到乜人都要立正俾禮。出到去其實係兩個完全唔同既世界，真實工作環境唔會再搞咁多呢啲禮儀嘢…
 
只係無咁多，但唔代表無。
 




報到完，見仲未正式開工，我就傻吓傻吓咁周圍問人有咩嘢需要幫手，一心諗住想留個好印象俾人地。
 
後來吸取到經驗，領略到假如有時間不如自己搵個地方休息吓，唔需要做埋哂呢啲門面功夫。加上，想留好印象既話，最緊要係做call既時候要醒目啲，要識執生，唔好做錯嘢。
 
呢行好怪，就算做咗廿件好事，只要之後做咗一件錯事，你就呢世都係錯，然後臭名遠播，繼而全行都會知道你個大名…
 
至於之前所做過既一切好事，係唔會有人記得。
 
或者係呢行比較特別，又或者呢個世界本身就係咁樣。
 




作為新人最驚既其中一樣嘢，大概就係遇到DBA，因為從來未試過近距離接觸死亡，所以會幾驚，再加上要落手做，彷彿有種「別人生命掌握在自己手上」既感覺，驚上加驚。
 
不過當每日都要接觸同面對既時候，呢樣嘢好快就會變成麻木。
 
好耐之前，曾經聽身邊一啲同樣係做救護員既叔父咁樣講過；「個個新出班都驚做DBA，我都驚過，但好快就唔驚。因為後來我明白到，無論我幾努力都好，十個有九個都係救唔返。我既責任只係掌握住CPR三十比二既黃金比例，然後就可以一邊諗住等陣下午茶食西多好，抑或食薯條好…」
 
從來都係講就易，若然要真正明白，係需要經過確切體會同親身感受。
 
實習頭幾日，做既call都無乜特別，都係一般頭暈發燒，幾乎乜工具設備都無實際用過。
 
直至某個夜更，我終於遇到我人生中既第一次DBA。
 
時間係凌晨三點，地點係私人住宅。
 
去到現場，我當然係騰哂雞，根本唔知道應該點樣開始，亦唔清楚自己可以做啲乜，但眼見其餘三人已經好熟練咁自動埋位，各自各做自己應該做既事。




 
當時我屬於救護車入面既第四人，其實我呢個角色係可有可無。假如無我既存在，佢地做嘢或者會做得更加順暢更有效率，因為無咗個新人喺度阻住哂，唔使成日好似湊仔咁湊。
 
「新師兄，機會難逢啊，你過黎做CPR！」主管示意我埋位。
 
「哦！」我心裡唸住，成人CPR既比例係三十比二，三十吓心外壓，然後俾兩吓氣。
 
我一邊幫傷者施行心外壓，一邊喺心裡面幫自己打數…
 
一啊…二啊…三啊…四啊…五啊….頭嗰幾吓，我都唔敢壓得太大力。
 
當時心諗原來真人既胸口都幾硬，好似有種阻力同自己一雙手抗衡咁，所以壓唔得深。
 
「咁樣唔夠架！壓深啲！你想救到人就要壓深啲！」旁邊既主管話。
 




「哦！」
 
於是我試圖俾多啲力，嘗試再壓深一啲…
 
啪啦啪啦！啪啦啪啦！
 
係胸骨既爆裂聲！係因為我出力既關係，所以壓爆咗對方既胸骨！
 
嗰一刻我感到有啲不知所措，有種「傷害到別人」既心虛。
 
主管見我表現有啲猶豫，於是又話：「正常架，繼續！記得要壓深啲，你壓得唔夠深架！」
 
於是我全程專注於CPR。過咗一陣，主管宣佈執嘢離場，當我將阿伯從地下抬上救護車床既時候，我發現感覺同平時有啲唔同，好似摸空咁…
 
原來阿伯係無咗一隻腳…由於佢著住長褲，所以剛才一直無留意到。




 
過程中最吃力既大概就係Moving CPR，要一邊行走一邊進行心外壓，若然太專注於CPR而無望清楚前面環境既話，可能會與無為意到既物件發生碰撞，增加受傷機會。
 
只係去到半路中途，都仲未上到救護車，我雙手已經開始感到有啲攰，但仍然要繼續。
 
上到救護車，我經已成頭大汗，部分汗水固然係因為緊張所致。
 
跟車既係一名阿婆，佢係阿伯既太太。
 
佢一直呼天搶地，緊握住阿伯隻手喊得好淒涼，講咗好多「點解唔等埋我先一齊走」之類既說話。
 
阿婆既舉動某程度對我造成阻礙，但我無理會，只係埋首繼續做CPR。
 
「阿婆你坐返好先，扣返好安全帶，你咁樣我地開唔到車架！」主管態度強硬要求阿婆坐低，並且為佢扣上安全帶。
 




阿婆既喊聲一直無停，我一雙手亦一直無停過，壓夠三十吓，就拎起BVM 俾兩吓氣，主管一邊做佢自己既嘢一邊監察住我，間中會從旁指導吓我。
 
由於車速都幾急，每逢轉彎我都幾乎企唔穩，要用手扶實車廂裡面既欄杆先不至於跌低。同時，其實我已經有少少暈車浪…
 
當時心諗，原來做救護員真係唔易。
 
我透過窗口望一望出街外，以我地現時位置，距離醫院仲有一段路程。保守估計，起碼仲要CPR多大約四分鐘。
 
「師兄，要唔要轉人？」車上另一位師兄問，原本施行CPR既應該係佢，但基於我係實習，所以啲嘢讓咗俾我做。
 
「唔使，我OK。」當時有少少逞強心態，雖然係攰，但未至少頂唔住要人接替。
 
況且，之後出到班唔會再有人問我需唔需要轉人。
 
我繼續CPR，主管則負責俾氣。
 
汗水開始滲入眼，但我無暇處理，只係鬆一鬆膊頭，用手臂位置輕輕擦一下眼角，然後繼續。
 
呢個時候，我隱約聽到車上有電話響起，電話鈴聲係一首歌，我留意到聲音既來源係阿婆既手袋。
 
我感到有啲驚訝，因為唱呢首歌既歌手係張衛健，估唔到阿婆咁in，用張衛健既歌去做電話鈴聲。
 
同時亦覺得有啲傷感，因為呢首歌既歌名叫《身體健康》…
 
  
 
阿婆無接聽電話，我眼角餘光留意到佢正在掩面痛哭。
 
電話一直喺度響，或者係阿婆既仔女知道阿伯出咗事，於是打黎了解吓情況。
 
唔知點解，我覺得呢首歌出現既時機有啲巧合，我單方面對號入座，覺得歌詞既內容好似係阿伯臨終前想同阿婆講既說話…
 
 
  
 
 
阿伯無咗隻腳，估計一直以來既起居飲食都係由阿婆照顧。
 
然後，我幻想起好多阿婆照顧阿伯既畫面，越諗我就傷感，越傷感我就越無法專注。
 
今次係我第一次咁近距離接觸死亡，原來真真正正落手救一個人既感覺係咁艱巨同難受。
 
 
  
 
其實，死亡係咪只係一個人既事呢？
 
一個人死，會導致身邊既人沉重哀傷一段日子…
 
 
 
  
 
 
唔知點解，我當時心裡出現咗一個想法，就係好想呢轉call快啲結束，因為我有啲攰，而呢種攰係包括精神上。
 
如果阿伯救唔返，阿婆就要獨自一個承受失去另一半既痛...
 
然後我諗起自己爸爸媽媽，假如有朝一日訓喺呢張床上面既係佢地，我又會點…
 
失去親人既滋味，只係簡單幻想一下，就已經覺得心如刀割…
 
 
  
 
做完人生中第一轉DBA，感覺有啲沉重。
 
精神上既攰，唔係一般文字可以形容得到。
 
但作為救護員唔能夠太感性，因為喺往後既日子裡面幾乎日日都會遇到呢種事。
 
日日都咁感性既話，相信好快會精神崩潰。
 
然後，我記起教官喺學堂講過既一句說話：
 
「做救護員，最忌將情感積累。」
 
========================================================================
 
救護日常：
 
操班既時候，曾經聽阿sir講過關於模型公仔阿Ann既名字由來。
 
其實我都唔知堅定流，但佢咁講，我就咁聽。
 
事件係發生於好多年前既外國，當時科技仲係好落後，而故事主要係圍繞一名男醫生。
 
醫生原本有一個幸福美滿家庭，有個賢良淑德既老婆，天資聰穎既女。
 
醫生當初選擇做醫生，單純係因為想幫人救人，同大家想成為救護員既原因一樣。
 
某日，醫生趁住放假，同家人去咗屋企附近既湖度嬉戲。醫生仲特登整咗架小木船，載大家出去遊湖，享受天倫之樂。
 
佢同太太坐喺小木船上傾計，而當時只有十歲唔夠既女兒伸手出船邊玩水。
 
期間，女兒突然失重心從船上面跌咗落湖。
 
醫生立即跳落湖將女兒救起，但救起既時候發現女兒已經奄奄一息，而且當時正身處於湖中心，趕返去醫療室拎醫療設備都需要一段時間。
 
最後，女兒因為延遲醫治，最後失救而死。
 
醫生痛不欲生，明明自己身為醫生，但自己女兒出事既時候竟然咩都做唔到…
 
佢非常後悔同苦惱。
 
苦惱既其中一個原因，係佢覺得延遲醫治係一個非常嚴重既問題，佢唔希望類似既事情再一次發生。
 
佢希望能夠發明出一個方法…
 
一個當發生意外既時候，人人都能夠做到，為病人進行搶救既方法。
 
後來，呢個醫生發明咗CPR，為咗研究及方便後人學習CPR，佢仲發明咗專為CPR而設既模型公仔。
 
由於CPR係因為自己過世既女兒而起，為咗紀念女兒，佢以女兒既名字為呢個公仔起咗個名，而佢女兒既名字就係叫做阿Ann。
                                                                                          
呢個故事到底真唔真，我無去考究過。
 
就咁聽，故事水分既成分似乎相當高，但同時又幾有故事性。
 
真定假，對我黎講唔重要…但自從經過嗰次之後，我永遠都記得阿Ann名字既由來。