火花不等人: 大病、過了、便好

眼見大家都沒有意圖為當前尷尬的場面作任何舉動，我唯有把故意阻擋不讓門關上的室友拉進衛生間，好讓衛生間的門可以關上。

「點解佢會無聲無息咁入咗嚟咖？」
「我啱啱正想出門口就見佢企咗喺度。」室友完全沒有打算掩飾自己幸災樂禍的笑容。
「頂你！咁你唔講？」
「咪就係想開門話聲你知囉。」
「唔該晒，咁你可以走喇下話？」
「走咖喇，喂話時話，得喎！識食﹗」室友左手在大力拍我肩膀，右手則向我高舉姆指。
「食屎喇你﹗」我把他推向另一間房的門口，逼令他從另一間房離開。
「我櫃桶有Dam呀！」關上門之前他補上一句溫馨提示，聽得出是發自內心對我的關顧。



回到自己房的那邊，我探頭出去。
「唔好意思，可唔可以求其拎條褲畀我？」
「洗唔洗咁大驚小怪呀？Boxer啫，又唔係三角。」袁頌婷給我遞上一條湖人隊的紫色波褲。
「唔該。」
穿好褲子，步入房間的我馬上穿回外套，尷尬的再向袁頌婷道歉。
「原來你都幾fit喎，有無六舊腹肌呀？一場嚟到睇下得唔得呀？」
「咁你都唔差，有無C呀？一場嚟到睇下得唔得呀？」
「低B！」
「出Common room食喇不如。」我提議



房間只有兩個書枱，日常自己食飯盒還可以，但多個人一同進餐就不知該如何安排，更重要的是，剛才口出狂言性騷擾完袁頌婷後，下意識將眼光向下移，看到她外套下的白色修身T恤，剛起床不久加上眼的的情況，令我自覺得如果繼續跟袁頌婷在房間獨處可能做出很多失禮的行為。

「好呀，行喇。」
「等我換條牛仔褲先。」
「去common room渣喎？」
「好快。」沒等她回覆我便走進衛生間換褲。

我住的那棟宿舍每層都有一間Common Room，二百呎左右的空間內裡有電視，有沙發，有煮食用品，有雪櫃，有張可以容納五至六個人的圓形餐檯。我倆坐進餐檯，吃著麥當奴外賣。



「下畫無煙肉蛋，食豬柳蛋喇。」
「我都唔鐘意煙肉蛋嘅。」
「下？」
「其實，你點解從來都無問，就會買煙肉蛋畀我嘅？」
「我以前買畀佢，就係買煙肉蛋。」
「哦。」
「習慣咗。」
「明明係你飛人，點解突然間好似係你好傷感嘅？」
「咪講咗囉，我都真係有唔開心咖。」
「OK。」
「喂，尋晚到底發生咩事啫？」
我將昨晚跟Michelle那幾句短短的對話告訴袁頌婷。

「嗯，咁你依家好啲未？」
「你講到我好似病咁喎。」


「哈，失戀就如一場大病。」袁頌婷用上一副文藝口吻。
「過了，便好。」還好我也懂得接。
香港電影<<12夜>>，2000年上畫時，帶點baby fat、還是很清純的張栢芝，配上很老正而又未變單春的陳奕迅，還有當年仍然很MK的謝霆峰在電影開場時及散場前客串。
「哈，你都有睇？仲記得添喎。」
「係呀，同佢睇，第一次約去街，就係去睇呢套戲。」
「噢‧‧‧‧唔緊要喇，可能你會好似陳奕迅咁，被張桑悅飛咗就遇到張柏芝呢。」
「哈，由張燊悅變成張栢芝咁開心？都好喎。但係張栢芝最後都飛咗陳奕迅然後遇上謝霆峰。」那時我們還沒知道在現實中張柏芝和謝霆峰之間的故事。
「咁你依家打算點呀？」
「頭先就講到好似我有病，依家就講到我好似啱啱放監咁。無呀，今天都星期五喇，打算今個weekend返屋企過，聽朝同阿媽飲茶，跟住溫下書，mid term喇就嚟。」
「哦‧‧‧咁都好呀‧‧‧」
說起上來，我還沒有回覆阿媽電話，於是馬上致電，並決定今晚回家食住家飯。
「咁我走喇‧‧‧無堂上‧‧‧我都返屋企喇‧‧‧」袁頌婷跟我說，並開始收拾餐檯。
「好喇咁。」
步出common room，我陪她等電梯，到她步入電梯，門正要關上之際，我伸手擋住了門。
「Thank you」


「嗯‧‧‧你有咩就‧‧‧打畀我喇‧‧‧」
停了半秒，我才收手讓電梯門徐徐關上。

那段本應上演的戲份最後都被導演剪走了，唯有寄望日後推出的DVD可找到這段Director Cut。

======================================================

「你知唔知由Campus行去又一城麥當奴再上Hall係幾辛苦呀？頂你食完嘢講兩句就算，扮下嘢都請我食飯喇。」袁頌婷真的很愛對著我翻舊賬，但這一筆我的確啞口無言，因為那天我真的應該好好感激她。
「咁我之後都請咗你咁多年喇係咪先？」
「有排你請呀話你知！」

願我可。