[真人真事][校園][純愛]《兩個我加一個妳》: 第六十三章

嗰個蛋散係邊個

就係芊靈前男朋友呀偉

之前都有提過嘅

佢見到我地，

就好驚訝咁樣望一望



之後就微笑咁樣同我地打招呼

係呀有對住我打

唔係淨係望住芊靈

跟住佢就行過嚟啦

呢個時候我就自動彈開咗，



示意俾佢兩個慢慢傾

各位唔好屌我住

基本上我每次出街遇到呢個情況我都係咁樣做，

有時我同Cyrus兩個行，

如果佢有啲friend行過嚟搵佢而嗰個人我係唔識嘅



我就會行埋一邊等佢兩個慢慢傾

因為佢兩個講嘅野我又唔知

我喺度嘅話又阻住佢地兩個

倒不如行開陣啦係咪先

所以今次見到呀偉我下意識都係咁樣做

之後我就行埋一邊啦，

喺度睇佢兩個傾乜撚

老實講你估真係好似電視情節咁樣咩



隔好撚遠都聽到佢講乜

重要一字一句都好清楚

大約過咗幾分鐘

芊靈就行返過嚟，

亦都見到呀偉行咗去第二邊

芊靈:「走喇我地 」

我:「走囉 」



跟住一路行嗰陣

我就特登觀察芊靈

睇下見返舊情人有冇野

反而佢同未見之前冇分別喎

重係同我有講有笑

跟住我特登講極幾句氹佢，

又係同平時一樣偷笑

就咁睇完全冇分別



所以決定陣間入到去坐低食野嗰陣問佢

睇下有冇端倪

跟住我地照原定時間入座

入到去就坐低，

跟住就叫邊個套餐同埋邊個湯底，

我全部俾晒佢負責

我淨係同佢講唔好叫辣



因為小弟虧頂唔順

好彩佢冇波台巴打上身啫

如果唔係我就大撚鑊

叫完之後就喺度整嗰啲醬啦

咁我就叫佢出去拎醬先啦，

反正我都坐喺度

拎完返嚟佢就喺度搞

芊靈:「你唔出去嘅 」

我:「傻先點醬

我從來唔點醬 」

芊靈:「即係話我傻啦 」

我:「係呀你又知嘅

好醒喎 」

芊靈:「我依家同你隔得遠咋

出到去你就死 」

因為嗰陣我地兩條友係坐卡位

卡位亦都幾闊

所以佢坐低伸直隻手都掂唔到我隻耳仔

一定要企高先得

搞下搞下啲料就開始嚟

我就特登問佢

我:「撞返舊情人冇野咩 」

芊靈:「可以有咩野 」

我:「唔使扮晒蟹喎屌

你地啲女人見到舊情人單拖出嚟唔會覺得心涼咩 」

芊靈:「冇你諗到咁黑暗囉

又喺度黑化我 」

我:「會唔會一啲野都冇呀 」

芊靈:「壹仔呀壹仔

好心你唔好睇電視睇上腦啦

唔係每一個人見返舊愛都囉囉攣架 」

我:「係唔係呀 」

芊靈:「講真係學校見到都冇咩特別

當然都係少見啦

同埋都隔咗咁耐咯，

頭先係分手以嚟第一次喺街見到佢

原本以為自己個心都會好忐忑

但係經歷完頭先之後真係發覺冇乜特別 」

我:「難得你睇得咁開

學到野學到野 」

芊靈:「唔通你睇唔開咩 」

我:「以前小學雞鍾意人嗰啲囉 」

芊靈:「依家點會冇鍾意人呀

快啲講係邊個 」

我:「冇呀真係諗起以前小學雞鍾意嗰啲人 」

芊靈:「依家呢

唔好睇少我直覺 」

我:「依家咪你囉你又唔信 」

芊靈:「一定唔係囉

講嚟聽下啦最多我唔同人講 」

我:「嗰條友好撚蠱惑

成日偷笑唔認

重好鍾意用扭人耳仔

極度懷疑佢有暴力傾向 」

芊靈:「因為你太好扭先至扭你

我要澄清我係冇暴力傾向 」

我:「你咁講即係認啦 」

芊靈:「咩……喎……唔係囉

唔睬你呀死人頭我出去拎野食 」

我:「幫我拎啲蟹子丸 」

芊靈:「自己拎啦死人頭 」

我:「幫手啦 」

芊靈:「個碟有位先算啦 」

結果佢返嚟嗰陣，

碟上面咪又係有五粒蟹子丸

講咁多